इंडिया पोस्ट पेमेंट बँक सर्वसामान्यांसाठी उपयुक्त जनतेनी सुविधेचा लाभ घ्यावा – राज्यमंत्री अर्जुनराव खोतकर

            जालना, दि. 18 – देशात टपाल कार्यालयाची एक वेगळी ओळख आहे.  सर्वसामान्य माणसाला सुख:दुखाचा संदेश पोहोचवणारे एकमेव माध्यम म्हणुन टपाल सेवेचा उपयोग केला जात असे. परंतू आजच्या आधुनिकतेच्या युगात देशातील सर्वसामान्य नागरिक व छोटे व्यावसायिक आजही बँकीक क्षेत्राशी जोडले गेलेले नाहीत अशा सर्वसामान्यांना इंडिया पोस्ट पेंमेंट बँक निश्चितच उपयोगी ठरेल असा विश्वास व्यक्त करत जनतेनी या बँकेचा लाभ घ्यावा, असे आवाहन राज्याचे पशुसंवर्धन, दुग्धविकास, मस्त्यव्यवसाय व वस्त्रोद्योग राज्यमंत्री अर्जुनराव खोतकर यांनी केले.

            येथील कृषि उत्पन्न बाजार समितीच्या आवारात इंडिया पोस्ट पेमेंटस बँकेसंदर्भात आयोजित कार्यशाळेचे उदघाटन राज्यमंत्री श्री खोतकर यांच्या हस्ते करण्यात आले. त्याप्रसंगी उपस्थितांशी संवाद साधताना ते बोलत होते.  

            व्यासपीठावर पंडित भुतेकर, कैलास काजळकर, पांडूरंग डोंगरे, श्री लाहोटी, कृषि उत्पन्न बाजार समितीचे सचिव गणेश चौगुले,  इंडिया पोस्ट पेमेंटस बँकेचे व्यवस्थापक ए.एस. गायकवाड, एस.टी. मुंडे, पी.एस. अहिरे आदींची प्रमुख उपस्थिती होती.

            राज्यमंत्री श्री खोतकर म्हणाले की, गेल्या 162 वर्षापासून टपाल कार्यालयाने विश्वासाची अखंड परंपरा जोपासली आहे.  देशाच्या प्रत्येक ग्रामीण भागात टपाल कार्यालये आहेत.  परंतू आजच्या आधुनिकतेच्या युगात या कार्यालयांना आधुनिकतेची जोड देऊन बँकींग क्षेत्राचा लाभ शेवटच्या घटकापर्यंत पोहोचावा या उद्देशाने इंडिया पोस्ट पेमेंटस बँकेची सुरुवात करण्यात आली आहे.    टपाल कार्यालये ही ग्रामीण भागापर्यंत सर्वदूर पोहोचलेली असुन बँक आपल्या दारी ही संकल्पना इंडिया पोस्ट पेमेंटस बँक या माध्यमातुन प्रत्यक्षात साकार होत आहे. येणाऱ्या काळात या बँकेला फार मोठे महत्व प्राप्त होणार असुन नागरिकांनी याचा लाभ घेण्याचे आवाहनही राज्यमंत्री श्री. खोतकर यांनी यावेळी केले.

            यावेळी इंडिया पोस्ट पेमेंटस बँकेचे व्यवस्थापक ए.एस. गायकवाड, एस.टी. मुंडे, पी.एस. अहिरे यांनी बँकेमार्फत देण्यात येत असलेल्या सुविधांची माहिती दिली.

            आयोजित कार्यशाळोत श्रीमती चंद्रकला प्रतापकुमार अग्रवाल यांचे ऑनलाईन खाते उघडुन शुभारंभ करण्यात आला.

            कार्यक्रमास पदाधिकारी, अधिकारी तसेच कृषि उत्पन्न बाजार समितीमधील व्यापारी मोठ्या संख्येने उपस्थित होते.

इंडिया पोस्ट पेमेंटस बँकेची मुख्य आकर्षणे ·        पोस्टमन आणि ग्रामीण डाक सेवकाकडून बँकींग सुविधा आपल्या घरापर्यंत ·        नि:शुल्क बचतखाते आणि चालू खाते उघडण्याची सुविधा ·        बिल भरण्याची सुविधा (मोबाईल, डीटीएच रिजार्च, वीज, पाणी किंवा गॅस बील, दान किंवा विमा हफ्ता भरणे ·        आईपीपीबीच्या पब्लिक ॲपवरुन मोबाईल आणि नेटबँकींगची सुविधा ·        ऑनलाईन इतरांना पैसे पाठविण्याची सुविधा ·        क्युआर कार्डवरुन सरल आणि सुरक्षित बँकींग ·        भाजीपाला, दुध, चहा, किराणा विक्रेते, रिक्शाचालक, तसेच छोट-मोठ्या व्यावसायिकांना चालू खाते (Current Account) व चेकबुकची सुविधा ·        व्यापारी सर्व प्रकारचे पेमेंट QR  कोडने करु शकतात. ·        बचतखात्यामध्ये कमीत कमी शिल्लक ठेवण्याची गरज नाही. ·        बचत खात्यामध्ये 4 टक्के वार्षिक व्याजदर ·        आईपीपीबी खात्याबरोबर डाकघर बचत बँक खात्याला लिंक करण्याची सुविधा ·        एक लाखापेक्षा अधिक रक्कम डाकघर बचत बँकेमध्ये ॲटोमॅटीक ॲटो स्वीप होईल. ·        कुठल्याही बँकेमध्ये तसेच कुठल्याही बँकेचे पैसे देवाण-घेवाणची सुविधा आईपीपीबी बँकेत उपलब्ध ·        शासनामार्फत दिले जाणारे विविध प्रकारचे अनुदान किंवा अन्य सामाजिक कल्याण लाभ

*******