स्वीपअंतर्गत मतदार जनजागृती कार्यक्रम संपन्न मतदानाचा हक्क बजावुन लोकशाही अधिक मजबुत करा जिल्हाधिकारी रवींद्र बिनवडे यांचे आवाहन

        जालना, दि. 14 – विधानसभा सार्वत्रिक निवडणुकीसाठी 21 ऑक्टोबर, 2019 रोजी मतदान होत असुन या दिवशी प्रत्येकाने आपला मतदानाचा हक्क बजावुन लोकशाही अधिक मजबुत करण्याचे आवाहन जिल्हाधिकारी रवींद्र बिनवडे यांनी केले. यावेळी गुरु गणेश विद्यालयातील दिव्यांग विद्यार्थ्यांनी गीताच्या माध्यमातुन प्रत्येकाने मतदान करण्याचे आवाहन केले.

            स्वीप मोहिमेंतर्गत जिल्हाधिकारी कार्यालयाच्या सभागृहात दिव्यांगासाठी मतदार जनजागृतीपर कार्यक्रमाचे आयोजन करण्यात आले होते.  त्याप्रसंगी श्री बिनवडे बोलत होते. 

            यावेळी निवडणूक निरीक्षक श्री सहदेब दास, उपजिल्हाधिकारी (निवडणूक) दीपाली मोतियाळे उपजिल्हाधिकारी श्रीमती अंजली पवार, जिल्हा पशुसंवर्धन अधिकारी डॉ. हनुमंत गुट्टे, शिक्षणाधिकारी (प्राथमिक) कैलास दातखीळ, दिव्यांग आयकॉन निकेश मदारे आदींची प्रमुख उपस्थिती होती.

            जिल्हाधिकारी श्री बिनवडे म्हणाले, विधानसभा सार्वत्रिक निवडणुका सर्वांना ॲक्सीसेबल व्हाव्यात त्यादृष्टीकोनातुन जिल्हा प्रशासन काम करत आहे.  दिव्यांगांना मतदानाच्यावेळी सर्व सुविधा उपलब्ध करुन देण्यात येत आहेत.  निवडणूक निरीक्षक श्री दास यांच्या प्रेरणेतुन मतदारांमध्ये मतदानाविषयी जनजागृती करण्यासाठी दिव्यांगाचा समावेश असलेल्या टीमच्या माध्यमातुन मतदानाविषयी जनजागृती करण्यात येत असल्याचे सांगत  दिव्यांगाचे आयकॉन असलेले निकेश मदारे हेही प्रत्येक ठिकाणी स्वत: उपस्थित राहून मतदानाविषयी जनजागृती करत असुन याबद्दल त्यांचे विशेष अभिनंदन केले. गुरुगणेश विद्यालयातील दिव्यांग विद्यार्थ्यांनी मतदान जनजागृतीपर  सादर केलेल्या गीताची प्रशंसा करत लोकशाहीला मजबुत करण्यासाठी 21 ऑक्टोबर रोजी प्रत्येक पात्र मतदाराने आपल्या मतदानाचा हक्क बजावण्याचे आवाहनही जिल्हाधिकारी श्री बिनवडे यांनी केले.

            निवडणूक निरीक्षक श्री सहदेब दास म्हणाले, विधानसभा सार्वत्रिक निवडणुकीमध्ये अधिकाधिक मतदारांनी आपल्या मतदानाचा हक्क बजावावा यासाठी स्वीप मोहिमेंतर्गत मतदारांमध्ये जनजागृती करावी. तसेच लोकसभा निवडणुकीमध्ये ज्या  मतदान केंद्रावर कमी मतदान झाले अशा ठिकाणी जनजागृतीवर विशेष भर देण्यात यावा.  त्याचप्रमाणे दिव्यांग मतदारांना मतदानाच्या ठिकाणी सर्व सोयी-सुविधा पुरविण्याबरोबरच दिव्यांगाचा समावेश असलेल्या टीमच्या माध्यमातुन मतदानाविषयी अधिकाधिक जनजागृती करण्याचे निर्देशही त्यांनी यावेळी उपस्थित अधिकाऱ्यांना दिले.