*क्रांतीज्योती सावित्रीबाई फुले बाल संगोपन योजनेसाठी अर्ज करण्याचे आवाहन*

जालना,दि.10(जिमाका) : महिला व बालविकास विभागांतर्गत जिल्हा महिला व बालविकास अधिकारी कार्यालय, जालना यांच्या माध्यमातून क्रांतीज्योती सावित्रीबाई फुले बाल संगोपन योजना राबविण्यात येत आहे. या योजनेअंतर्गत अनाथ, निराधार, एकल पालक असलेली बालके, दुर्धर आजाराने बाधित पालकांची बालके, कैद्यांची मुले, दिव्यांग, अंध तसेच मतिमंद बालकांना बाल कल्याण समितीच्या शिफारशीनुसार दरमहा 2 हजार 250 रुपयांचा आर्थिक लाभ दिला जातो.

या योजनेच्या पात्रतेच्या अटी व शर्ती तसेच सविस्तर माहिती क्यूआर कोडद्वारे उपलब्ध करून देण्यात आली आहे. पात्र व गरजू लाभार्थ्यांनी योजनेचा लाभ घेण्यासाठी परिपूर्ण अर्ज सादर करावा, असे आवाहन जिल्हा महिला व बालविकास अधिकारी यांनी केले आहे.

अर्जदारांनी अर्ज कोणत्याही त्रयस्थ व्यक्तीमार्फत सादर करू नये. अर्ज स्वतः जिल्हा महिला व बालविकास अधिकारी कार्यालय, प्रशासकीय इमारत, तळमजला, जालना येथे अथवा संबंधित तालुक्यातील बाल विकास प्रकल्प अधिकारी कार्यालय किंवा तालुका संरक्षण अधिकारी, पंचायत समिती/तालुका कार्यालय येथे सादर करता येईल.

या योजनेसाठी कार्यालयाकडून कोणतेही शुल्क आकारले जात नाही. योजना पूर्णपणे मोफत असून, अर्ज प्रक्रिया किंवा योजनेचा लाभ मिळवून देण्याच्या नावाखाली कोणत्याही व्यक्तीस पैसे देऊ नयेत. लाभार्थ्यांची आर्थिक फसवणूक झाल्यास त्याची जबाबदारी कार्यालयाची राहणार नसल्याची सूचना करण्यात आली आहे.

त्यामुळे पात्र व गरजू लाभार्थ्यांनी कोणत्याही मध्यस्थाच्या भूलथापांना बळी न पडता संबंधित कार्यालयाशी संपर्क साधून योजनेचा लाभ घ्यावा, असे आवाहन जिल्हा महिला व बालविकास अधिकारी कार्यालय, जालना यांच्या वतीने प्रसिद्धीपत्रकाद्वारे करण्यात आले आहे.

*****