Saturday, 31 October 2026
Friday, 30 October 2026
जिल्ह्यात रेशीम उद्योगासाठी कौशल्य प्रशिक्षण केंद्रे उभारणार रेशीम उद्योगाशी संबंधित सात अभ्यासक्रमांसाठी पात्र संस्थांकडून प्रस्ताव मागविले
जालना,दि.30
(जिमाका) : जालना जिल्ह्यातील रेशीम
उद्योगाचा सर्वांगीण विकास करण्यासह रेशीम उत्पादनाचे मूल्यवर्धन अधिक सक्षम करणे
आणि युवकांना रोजगार व स्वयंरोजगाराच्या संधी उपलब्ध करून देण्याच्या उद्देशाने
एकात्मिक कौशल्य विकास कार्यक्रम राबविण्यात येत आहे. या कार्यक्रमांतर्गत रेशीम
उत्पादनापासून त्यावरील प्रक्रिया, विणकाम, मूल्यवर्धन आणि तयार उत्पादन
निर्मितीपर्यंत आवश्यक कुशल मनुष्यबळ तयार करण्यासाठी जिल्ह्यात विविध ठिकाणी
कौशल्य प्रशिक्षण केंद्रे स्थापन करण्यात येणार आहेत.
या उपक्रमांतर्गत सिल्क
रिलिंग टेक्निशियन, सिल्क ट्विस्टिंग टेक्निशियन, सिल्क डायिंग अँड प्रोसेसिंग ऑपरेटर,
सिल्क वॉर्पिंग अँड सिल्क वेफ्टिंग टेक्निशियन, सिल्क विव्हिंग अँड लूम ऑपरेटर,
सिल्क व्हॅलू ॲडिटियन अँड स्किल अपग्रेडेशन स्पेशालिस्ट आणि सिल्क प्रॉडक्ट
डेव्हलपमेंट या सात अभ्यासक्रमांसाठी पात्र प्रशिक्षण भागीदार व संस्थांकडून
प्रस्ताव मागविण्यात आले आहेत. रेशीम क्षेत्रातील अनुभव, औद्योगिक क्षेत्राशी
असलेली संलग्नता, रोजगाराशी संबंधित जोडणी तसेच प्रशिक्षण पूर्ण केलेल्या
उमेदवारांना रोजगार उपलब्ध करून देण्याची क्षमता असलेल्या पात्र संस्थांनी
प्रस्ताव सादर करावेत, असे आवाहन करण्यात आले आहे.
इच्छुक
पात्र संस्थांनी आवश्यक कागदपत्रांसह https://short.do/2Bm9xl
परिशिष्ट 1 ते 10
मध्ये दिलेल्या नमुन्यानुसार दोन प्रतींमध्ये आपले प्रस्ताव दि. 29 ऑक्टोबर 2026
ते 2 नोव्हेंबर 2026 या कालावधीत सायंकाळी 5 वाजेपर्यंत जिल्हा कौशल्य विकास, रोजगार व
उद्योजकता मार्गदर्शन केंद्र, प्रशासकीय इमारत, दुसरा मजला, जालना येथे ऑफलाइन
पद्धतीने सादर करावेत. अधिक माहितीसाठी कार्यालयाशी संपर्क साधावा किंवा दूरध्वनी
क्रमांक 02482-299033 वर संपर्क साधण्याचे आवाहन करण्यात आले आहे.
-*-*-*-*-*-
विशेष लेख- / राष्ट्रीय एकता दिवस राष्ट्रीय एकात्मतेचे शिल्पकार सरदार वल्लभभाई पटेल!
भारताची विविधता हीच भारताची ताकद आहे. भाषा वेगवेगळ्या, संस्कृती वेगवेगळ्या, परंपरा वेगवेगळ्या; धर्म वेगवेगळे मात्र देश एक आहे. ही एकात्मता केवळ भावनिक पातळीवर टिकवून ठेवायची नसते, तर त्यासाठी दूरदृष्टी, संघटन कौशल्य, बंधुता, निर्णयक्षमता आणि प्रसंगी कठोर भूमिका घेण्याची तयारीही आवश्यक असते. भारताच्या इतिहासात या गुणांचा प्रभावी प्रत्यय देणारे नेतृत्व म्हणजे लोहपुरुष सरदार वल्लभभाई पटेल. म्हणूनच त्यांची जयंती 31 ऑक्टोबर हा दिवस राष्ट्रीय एकता दिवस म्हणून साजरा केला जातो.
राष्ट्रीय एकता दिवसाची सुरुवात कधी झाली
भारत सरकारने 2014 मध्ये सरदार वल्लभभाई पटेल यांची जयंती राष्ट्रीय एकता दिवस म्हणून साजरी करण्याचा निर्णय घेतला. 22 ऑक्टोबर 2014 रोजी केंद्र शासनाने या निर्णयाची घोषणा केली. त्यानंतर केंद्रीय गृह मंत्रालयाने 24 ऑक्टोबर 2014 रोजी राष्ट्रीय एकता दिवसाच्या आयोजनासंदर्भात अधिकृत प्रसिद्धिपत्रक जारी केले. 31 ऑक्टोबर 2014 रोजी पहिला राष्ट्रीय एकता दिवस साजरा करण्यात आला. महाराष्ट्र शासनाने 31 ऑक्टोबर 2017 रोजी एका आदेशाद्वारे त्यांची जयंती राष्ट्रीय एकता दिवस म्हणून साजरी करताना राष्ट्रीय एकतेची शपथ घेण्याचे निर्देशित केले आहे. शैक्षणिक संस्थांमध्ये वक्तृत्व, निबंध, नाटीका, व्याख्याने, आयोजित करण्याचे स्पष्ट केले आहे.
सरदार पटेल यांनी स्वातंत्र्यलढ्यात दिलेले योगदान आणि स्वातंत्र्यानंतर संस्थानांचे विलीनीकरण करून भारताची एकात्मता दृढ करण्यासाठी केलेले ऐतिहासिक कार्य नव्या पिढीपर्यंत पोहोचवणे, हा या निर्णयामागील प्रमुख उद्देश होता. या दिवशी ‘रन फॉर युनिटी’, राष्ट्रीय एकतेची शपथ आणि संचलन यांसारख्या उपक्रमांद्वारे देशाची एकता, अखंडता आणि सुरक्षितता जपण्याचा संदेश दिला जातो. म्हणजेच हा दिवस केवळ एका महान नेत्याच्या स्मरणाचा नसून, राष्ट्राच्या एकात्मतेप्रती आपली जबाबदारी पुन्हा अधोरेखित करण्याचा दिवस आहे.
शेतकऱ्यांच्या प्रश्नातून घडलेले नेतृत्व
31 ऑक्टोबर 1875 रोजी गुजरातमधील नडियाद येथे जन्मलेल्या वल्लभभाई पटेल यांनी वकिलीच्या क्षेत्रात यश मिळवले होते. मात्र महात्मा गांधींच्या विचारांचा प्रभाव आणि देशाच्या स्वातंत्र्याची ओढ यामुळे त्यांनी सार्वजनिक जीवनाचा मार्ग स्वीकारला. 1918 मधील खेडा सत्याग्रह हा त्यांच्या नेतृत्वाचा महत्त्वाचा टप्पा ठरला. पिकांचे नुकसान आणि आर्थिक अडचणींमुळे महसूल भरणे कठीण झालेल्या शेतकऱ्यांच्या प्रश्नावर त्यांनी संघटित लढा उभारला. शेतकऱ्यांच्या अडचणी समजून घेणे, त्यांना एकत्र आणणे आणि संयमाने संघर्ष पुढे नेणे, ही त्यांच्या नेतृत्वाची वैशिष्ट्ये या आंदोलनातून स्पष्ट झाली. निडर, निर्भय व बाणेदार नेतृत्व म्हणून ते हळूहळू राष्ट्रव्यापी झाले.
1928 मधील बारडोली सत्याग्रहाने त्यांच्या नेतृत्वाला राष्ट्रीय स्तरावर वेगळी ओळख मिळवून दिली. महसुलातील वाढीव आकारणीविरोधात शेतकऱ्यांनी एकजूट दाखवली. पटेल यांनी या आंदोलनाचे प्रभावी संघटन केले. शिस्तबद्ध, ठाम आणि अहिंसक संघर्षाच्या बळावर शेतकऱ्यांच्या प्रश्नाला न्याय मिळवून देण्याच्या या लढ्यामुळे त्यांना ‘सरदार’ही उपाधी प्राप्त झाली. ही उपाधी त्यांना शेतकऱ्यांनी दिली. सरदार म्हणजे समूहाचा प्रमुख, नेता, नेतृत्व, मान्यता मिळालेला आदराचा माणूस त्यामुळे सरदार ही उपाधी केवळ सन्मानाची नव्हती; ती जनतेने त्यांच्या नेतृत्वावर दाखवलेल्या विश्वासाची पावती होती.
जनसेवेपासून स्वातंत्र्यलढ्या पर्यंत
अहमदाबाद नगरपालिकेतील त्यांच्या कार्यातून प्रशासनाकडे पाहण्याची व्यावहारिक दृष्टी दिसून आली. शहरातील स्वच्छता, पाणीपुरवठा आणि आरोग्यविषयक व्यवस्थांमध्ये सुधारणा करण्यावर त्यांनी भर दिला. सार्वजनिक पद म्हणजे अधिकार गाजवण्याचे साधन नसून, नागरिकांच्या मूलभूत प्रश्नांची सोडवणूक करण्याची जबाबदारी आहे, हा दृष्टिकोन त्यांच्या कामातून दिसतो. पुढे या अहमदाबाद नगर पालिकेचा अध्यक्ष देशाचा लोहपुरुष म्हणून नावलौकिकास आला.
1930 च्या सविनय कायदेभंगाच्या चळवळीत आणि 1942 च्या ‘भारत छोडो’ आंदोलनातही त्यांनी महत्त्वाची भूमिका बजावली. स्वातंत्र्यलढ्यातील सहभागामुळे त्यांना कारावास भोगावा लागला. संघटनकौशल्य, निर्णयक्षमता आणि जनतेला एकत्र आणण्याची क्षमता या गुणांच्या बळावर ते राष्ट्रीय चळवळीतील प्रमुख नेत्यांपैकी एक बनले.
स्वातंत्र्यानंतरची ऐतिहासिक जबाबदारी
15 ऑगस्ट 1947 रोजी भारत स्वतंत्र झाला; पण स्वातंत्र्य मिळाले म्हणजे देशाची राजकीय एकात्मता पूर्ण झाली, असे नव्हते. त्या वेळी ब्रिटिश भारताबरोबरच 560 हून अधिक संस्थाने अस्तित्वात होती. ब्रिटिश सत्तेचा अंत झाल्यानंतर या संस्थानांच्या भवितव्याचा प्रश्न अत्यंत महत्त्वाचा बनला. अनेक संस्थानांचे स्वतंत्र राहण्याचे किंवा भारत-पाकिस्तान यांपैकी एखाद्या देशात सामील होण्याचे पर्याय विचाराधीन होते. अशा परिस्थितीत भारताचे राजकीय विभाजन टाळणे, हे नव्या नेतृत्वापुढील मोठे आव्हान होते.
स्वतंत्र भारताचे पहिले गृहमंत्री म्हणून सरदार पटेल यांनी संस्थानांच्या विलीनीकरणाची जबाबदारी समर्थपणे सांभाळली. व्ही. पी. मेनन यांच्यासारख्या अधिकाऱ्यांच्या सहकार्याने त्यांनी संस्थानिकांशी चर्चा, समजूत, मुत्सद्देगिरी आणि परिस्थितीनुसार ठाम प्रशासकीय निर्णय यांचा वापर केला. त्यांच्या नेतृत्वामुळे विविध संस्थाने भारतीय संघराज्यात सामील होण्याची प्रक्रिया पुढे गेली. हे काम केवळ राजकीय करारांचे नव्हते; भारताच्या भविष्यातील भौगोलिक अखंडतेचा आणि प्रशासनाच्या स्थैर्याचा तो पाया होता.
जुनागढ आणि हैदराबाद : निर्णयक्षमतेची कसोटी
जुनागढच्या संस्थानाचा प्रश्न निर्माण झाला तेव्हा भारताच्या भौगोलिक आणि राजकीय हितांचा विचार करून पटेल यांनी निर्णायक भूमिका घेतली. पुढे हैदराबाद संस्थानाच्या भारतातील विलीनीकरणाचा प्रश्न अधिक गुंतागुंतीचा ठरला. वाटाघाटी आणि प्रयत्नांनंतरही प्रश्न सुटत नसल्याने सप्टेंबर 1948 मध्ये ‘ऑपरेशन पोलो’ ही पोलीस कारवाई करण्यात आली. 17 सप्टेंबर 1948 रोजी हैदराबादच्या विलीनीकरणाचा मार्ग मोकळा झाला. या घटनांमधून राष्ट्रीय एकात्मतेच्या प्रश्नावर त्यांनी मुत्सद्देगिरीसोबतच आवश्यक तेव्हा कठोर निर्णय घेण्याची तयारीही दाखवली.
संस्थानांच्या विलीनीकरणाबरोबरच स्वतंत्र भारताची प्रशासकीय चौकट सक्षम करण्यावरही पटेल यांनी भर दिला. अखिल भारतीय सेवांच्या बळकटीकरणासाठी त्यांनी महत्त्वपूर्ण भूमिका बजावली. देशाच्या विविध भागांत प्रशासनाची सातत्यपूर्ण आणि समन्वयित यंत्रणा कार्यरत राहणे, हे राष्ट्रीय एकात्मतेसाठी आवश्यक आहे, याची त्यांना जाणीव होती.
एकसंघ भारताची पायाभरणी
स्वातंत्र्याच्या उंबरठ्यावर भारतासमोर केवळ परकीय सत्तेतून मुक्त होण्याचे आव्हान नव्हते; तर अनेक संस्थाने, विविध राजकीय हितसंबंध आणि अनिश्चित भविष्य यांना एकाच राष्ट्रीय चौकटीत आणण्याचेही आव्हान होते. अशा निर्णायक काळात सरदार वल्लभभाई पटेल यांनी दूरदृष्टी, मुत्सद्देगिरी, धैर्य आणि ठाम निर्णयक्षमतेच्या बळावर संस्थानांच्या विलीनीकरणाला गती दिली. त्यामुळे आधुनिक भारताच्या राजकीय एकात्मतेचा पाया अधिक भक्कम झाला. आज आपण एकसंध भारताचे नागरिक म्हणून अभिमानाने उभे आहोत, त्या ऐतिहासिक प्रक्रियेत सरदार पटेल यांचे योगदान अनन्यसाधारण आहे. म्हणूनच त्यांची जयंती राष्ट्रीय एकता दिवस म्हणून साजरी करणे, हा इतिहासाचा गौरव करण्याबरोबरच भारताची एकता, अखंडता आणि सुरक्षितता जपण्याच्या संकल्पाचे नूतनीकरण करण्याचा दिवस आहे.
प्रवीण टाके
उपसंचालक (माहिती)
विभागीय माहिती कार्यालय,
छत्रपती संभाजीनगर
9702858777
-------*
जिल्हा क्रीडा अधिकारी कार्यालय शालेय तलवारबाजी (14 वर्षाखालील मुले व मुली) क्रीडा स्पर्धाचे उद्घाटन उत्साहात संपन्ऩ
जालना,दि.30 (जिमाका) : क्रीडा व युवक सेवा, संचालनालय, महाराष्ट्र राज्य पुणे अधिनस्त़ क्रीडा व युवक सेवा, छत्रपती संभाजीनगर विभाग, छत्रपती संभाजीनगर, जिल्हा क्रीडा अधिकारी कार्यालय तथा जिल्हा क्रीडा परिषद, जालना व जिल्हा राज्य फेसिंग असोशिएशन यांच्या सहकार्याने राज्य़स्तर शालेय तलवारबाजी ( 14 वर्षाखालील मुले व मुली) क्रीडा स्पर्धाचे आयोजन दि. 29 ते 31 ऑक्टोबर 2026 कालावधीत जिल्हा क्रीडा संकुल, जालना येथे करण्यात आले आहेत.
दि. 30 ऑक्टोबर 2026 रोजी सकाळी 11.00 वाजता जिल्हा क्रीडा संकुल, जालना येथे राज्य़स्तर शालेय तलवारबाजी ( 14 वर्षाखालील मुले व मुली) क्रीडा स्पर्धाचे उद्घाटन जिल्हाधिकारी आशिमा मित्तल , यांच्या शुभहस्ते दिप प्रज्वलन करून करण्यात आले. यावेळी महापौर शहर महानगरपालिका, वंदना मगरे, प्रकाश काटोळे,महाराष्ट्र राज्य उपाध्यक्ष, उदय डोंगरे, सचिव, महाराष्ट्र राज्य फेसिंग असोशिएशन, विजय गाडेकर जिल्हा जालना तलवारबाजी असोशिएशन, जालना, राजकुमार सोमवंशी महारष्ट्र राज्य फेसिंग असोसिएशन कोषाध्यक्ष, जिल्हा क्रीडा संघटक, जालना संग्राम तारडे.जिल्हा जालना तलवारबाजी संघटना शिल्पा मोरे, तुषार आहेर, क्रीडा मार्गदर्शक तांत्रिक समिती सदस्य यांच्या उपस्थित संपन्न झाले.
खेळाडूंना शुभेच्छा देताना श्रीमती मित्तल, यांनी खेळाचा विकास साधण्यासाठी सरावात सातत्य असावे सराव करून खेळात प्राविण्य मिळवावे असे मनोगत व्यक्त केले. महापौर वंदना मगरे यांनी खेळ वाढवण्यासाठी खेळाडुनी मैदानवार उतरणे गरजेचे आहे.
या स्पर्धेकरिता पंच प्रमुख डॉ.दिनेश वंजारे, सागर मगरे, अजय त्रिभवन, राहुल फडोळ, सौरभ तोमर, म्हणुन काम पाहत आहे. ही स्पर्धा यशस्वी करण्यासाठी नरेंद्र पवार , जिल्हा क्रीडा अधिकारी, जालना यांच्या मार्गदर्शनाखाली सिध्दार्थ कदम, क्रीडा अधिकारी लता लोंढे, आरती चिल्लारे, क्रीडा मार्गदर्शक, सचिन पुरी, आशिष जोगदंड, क्रीडा मार्गदर्शक, वरिष्ठ लिपीक अमोल मुसळे,कनिष्ठ लिपीक राहुल राठोड, राहुल गायके, विजय गाडेकर, संग्राम तारडे, उमेश गायकवाड , भरत चोरमारे अंनत झाल्टे, सुभाष पारे, विनायक किनकीन, रोहन वाघमारे , हारूण खान, इत्यादीनी परिश्रम घेतले तर कार्यक्रमांचे सुत्रसंचलन यांनी आभार प्रदर्शन महमंद शेख, क्रीडा मार्गदर्शक यांनी केले.
ऊसतोड कामगारांच्या वारसांना आर्थिक मदतीचे धनादेश वितरित अपघाती मृत्यू झालेल्या कामगारांच्या कुटुंबीयांना प्रत्येकी पाच लाखांची मदत
जालना,दि.30 (जिमाका) : ऊसतोड कामगारांना सामाजिक सुरक्षा व आर्थिक आधार मिळावा, तसेच कामगारांच्या कुटुंबीयांना संकटाच्या काळात मदत व्हावी, या उद्देशाने लोकनेते गोपीनाथ मुंडे ऊसतोड कामगार महामंडळामार्फत आर्थिक सहाय्य योजना राबविण्यात येत आहे. या योजनेंतर्गत अपघाती मृत्यू झालेल्या ऊसतोड कामगारांच्या वारसांना पाच लाख रुपये, तर बैलजोडीच्या मृत्यूच्या प्रकरणात संबंधित कामगारांना 50 हजार रुपयांचे आर्थिक सहाय्य देण्यात येते.
या योजनेंतर्गत मंजूर झालेल्या अर्थसहाय्याचे धनादेश दि. 30 ऑक्टोबर 2026 रोजी जिल्हाधिकारी श्रीमती आशिमा मित्तल यांच्या हस्ते वितरित करण्यात आले. अपघाती मृत्यू झालेल्या ऊसतोड कामगारांच्या वारसांना प्रत्येकी पाच लाख रुपयांचे धनादेश, तर बैलजोडीच्या मृत्यूच्या प्रकरणात संबंधित ऊसतोड कामगारांना प्रत्येकी 50 हजार रुपयांचे धनादेश देण्यात आले.
यावेळी सहाय्यक आयुक्त, समाजकल्याण डॉ. अनिता राठोड, विशेष अधिकारी (शासकीय) स्नेहल मोदाळे आदी उपस्थित होते. सहाय्यक आयुक्त डॉ. अनिता राठोड यांनी लाभार्थी वारसांचे सांत्वन करून शासन त्यांच्या पाठीशी असल्याचे सांगितले.
दुष्काळग्रस्तांच्या मदतीसाठी विद्यार्थ्यांची माणुसकीची हाक! संस्कार प्रबोधिनी माध्यमिक शाळेच्या विद्यार्थ्यांकडून सिरसवाडी गावाला दोन पाण्याच्या टाक्यांची भेट विद्यार्थ्यांच्या सामाजिक बांधिलकीचा प्रेरणादायी आदर्श संस्कार व संवेदनशीलपणा
जालना,दि.30 (जिमाका) : समाजातील अडचणी केवळ पाहून न थांबता, त्या दूर
करण्यासाठी स्वतःहून पुढाकार घेण्याची वृत्ती विद्यार्थ्यांमध्ये रुजत असेल, तर
तीच खऱ्या अर्थाने शिक्षणाची फलश्रुती ठरते. याच विचाराचा प्रत्यय जालना येथील
संस्कार प्रबोधिनी माध्यमिक शाळेच्या इयत्ता 8, 9 वी व 10 वीच्या विद्यार्थ्यांनी आपल्या कृतीतून
घडवून आणला आहे.
जालना जिल्ह्यात निर्माण
झालेल्या दुष्काळी परिस्थितीची जाणीव ठेवून या विद्यार्थ्यांनी दुष्काळग्रस्त
ग्रामस्थांच्या मदतीसाठी स्वयंस्फूर्तीने पुढाकार घेतला. आपल्या खाऊच्या पैशातून,
तसेच सुजाण नागरिक व वस्तीतील एका घरातून पाच रुपये,याप्रमाणे एका विद्यार्थ्याने
वीस घरे अशा 61 विद्यार्थ्यांनी हा निधी संकलित करून तसेच सामूहिक प्रयत्नांतून
विद्यार्थ्यांनी तब्बल 19 हजार 400 रुपयांचा निधी संकलित केला.संस्कार प्रबोधिनी
विद्यालयातील उपक्रमशील शिक्षक रामदास कुलकर्णी यांच्या मार्गदर्शनाखाली
विद्यार्थ्यांनी या निधीतून प्रत्येकी 3 हजार लिटर क्षमतेच्या दोन पाण्याच्या
टाक्या खरेदी केल्या आणि त्या सिरसवाडी गावाला लोकहितार्थ भेट दिल्या.संस्कार
प्रबोधिनीविद्यालयाचे अध्यक्ष सुरेश कुलकर्णी,विजय देशमुख,विनायकराव देशपांडे, प्रा.केशर
सिंह ब गेरिया,भास्करराव काळे, मु.अ. ईश्वर वाघ यांच्या मार्गदर्शनाखाली हा उपक्रम
राबवण्यात आला.
या दोन्ही पाण्याच्या टाक्या
गावातील मंदिर परिसरात ठेवण्यात आल्या असून, त्यांचा उपयोग ग्रामस्थांना पाण्याचा
साठा करण्यासाठी आणि सामुदायिक गरजांसाठी होणार आहे. विशेष म्हणजे, दुष्काळाच्या
कठीण परिस्थितीत पाण्याच्या उपलब्धतेचे महत्त्व ओळखून विद्यार्थ्यांनी केलेली ही
मदत ग्रामस्थांसाठी निश्चितच उपयुक्त ठरणार आहे.
या उपक्रमाचे जिल्हाधिकारी अशिमा
मित्तल यांनी विशेष कौतुक केले. विद्यार्थ्यांनी आपल्या वयाचा विचार न करता
सामाजिक प्रश्नांची जाणीव ठेवत मदतीसाठी दाखवलेली तत्परता ही अत्यंत प्रेरणादायी
असल्याचे त्यांनी नमूद केले. समाजातील प्रत्येक घटकाने दुष्काळ निवारणासाठी
आपापल्या परीने योगदान देणे आवश्यक असून, विद्यार्थ्यांचा हा उपक्रम इतर शाळा,
संस्था आणि नागरिकांसाठीही प्रेरणादायी उदाहरण असल्याचे त्यांनी अधोरेखित केले.
यावेळी तहसीलदार, जालना राजू
निहाल, ग्रामविकास अधिकारी गजानन सातपुते, कलेक्टर थिंक टँक फेलो सुप्रवीण पाखरे,
आकांक्षी जिल्हा फेलो साक्षी उगले, शाळेचे शिक्षक, विद्यार्थी तसेच सिरसवाडी अर्जुन
ढगे पोलीस पाटील ग्राममहसूल अधिकारी मोहिते मंडळ अधिकारी कळकुंबे ग्रामपंचायत
कर्मचारी गावातील ग्रामस्थ उपस्थित होते.
विद्यार्थ्यांच्या कृतीतून
सामाजिक जबाबदारीचा मोठा संदेश!
आजच्या काळात विद्यार्थ्यांनी
केवळ शैक्षणिक प्रगतीपुरते मर्यादित न राहता समाजातील प्रश्न समजून घेणे,
संवेदनशीलता जपणे आणि सामाजिक कार्यात सक्रिय सहभाग नोंदवणे अत्यंत महत्त्वाचे
आहे. संस्कार प्रबोधिनी शाळेच्या विद्यार्थ्यांनी केलेला हा उपक्रम त्याचे उत्तम
उदाहरण आहे.
19,400 रुपयांचे योगदान, दोन
पाण्याच्या टाक्या आणि त्यामागे असलेली शेकडो विद्यार्थ्यांची संवेदनशील भावना! या
उपक्रमाचे खरे मोल केवळ आर्थिक मदतीत नसून, संकटाच्या काळात आपणही समाजासाठी
काहीतरी करू शकतो, या विचारात आहे.
विद्यार्थ्यांच्या
या कृतीतून समाजाला एक महत्त्वपूर्ण संदेश मिळतो — दुष्काळावर मात करणे ही केवळ
शासनाची जबाबदारी नसून, शासन आणि समाज यांच्या सामूहिक सहभागातूनच हा लढा अधिक
प्रभावी होऊ शकतो.
-*-*-*-*-*-
पसंतीच्या वाहन क्रमांकासाठी आरटीओ कार्यालयात अर्ज करण्याचे आवाहन
जालना,दि.30 (जिमाका) : जालना उपप्रादेशिक परिवहन कार्यालयांतर्गत (आरटीओ) बिगर परिवहन दुचाकी वाहनांच्या एमएच-21 सीक्यू या नवीन नोंदणी मालिकेतील आकर्षक व पसंतीचे वाहन क्रमांक वाटप करण्याची प्रक्रिया सुरू करण्यात येणार आहे. या मालिकेतील एमएच-21 सीक्यू- 0001 ते 9999 (MH-21 CQ-001 to 9999) हे क्रमांक दि. 2 नोव्हेंबर 2026 पासून उपलब्ध करून देण्यात येणार आहेत.
पसंतीचा नोंदणी क्रमांक घेऊ इच्छिणाऱ्या वाहनधारकांनी विहित नमुन्यातील अर्जासोबत राष्ट्रीयीकृत बँकेच्या धनाकर्षाद्वारे (डिमांड ड्राफ्ट) निर्धारित शुल्क, आधारकार्डाची स्वयंप्रमाणित छायांकित प्रत, पॅनकार्ड आणि भ्रमणध्वनी क्रमांकासह दि. 2 नोव्हेंबर 2026 रोजी दुपारी 2 वाजेपर्यंत उपप्रादेशिक परिवहन अधिकारी, जालना यांच्या कार्यालयात अर्ज सादर करावेत.
आकर्षक क्रमांकांचे वाटप महाराष्ट्र मोटार वाहन नियम व परिवहन आयुक्तांच्या परिपत्रकानुसार करण्यात येणार आहे. एखाद्या आकर्षक क्रमांकासाठी एकापेक्षा अधिक अर्ज प्राप्त झाल्यास त्या क्रमांकासाठी लिलाव प्रक्रिया राबविण्यात येईल. अशा वेळी संबंधित अर्जदारांनी निर्धारित मूळ शुल्कासह वाढीव बोलीची रक्कम स्वतंत्र धनाकर्षाद्वारे सादर करणे आवश्यक आहे. निर्धारित शुल्कापेक्षा सर्वाधिक रक्कम देणाऱ्या अर्जदारास संबंधित क्रमांक आरक्षित करून देण्यात येईल.
संबंधितांनी आपले धनाकर्ष उपप्रादेशिक परिवहन अधिकारी, जालना यांच्या नावे बंद लिफाफ्यात दि. 3 नोव्हेंबर 2026 रोजी दुपारी 1 वाजेपर्यंत कार्यालयात जमा करावेत. त्यानंतर कोणत्याही सबबीवर धनाकर्ष स्वीकारले जाणार नाहीत. त्याच दिवशी दुपारी 3 वाजता बंद लिफाफे उघडण्यात येणार असून, यावेळी सर्व संबंधित अर्जदारांनी उपस्थित राहावे, असे आवाहन उपप्रादेशिक परिवहन अधिकारी मनीष दौंड यांनी प्रसिध्दीपत्रकाद्वारे केले आहे.
अनुकंपा नियुक्तीसाठी जिल्हास्तरीय मेळावा संपन्न
जालना,दि.30 (जिमाका) : जिल्हाधिकारी कार्यालय, जालना येथे अनुकंपा नियुक्तीसाठी जिल्हास्तरीय गट-क सामायिक प्रतीक्षासूचीतील उमेदवारांचा मेळावा शुक्रवारी (दि. 30 ऑक्टोबर) आयोजित करण्यात आला. या मेळाव्यात उपलब्ध रिक्त पदांनुसार ज्येष्ठतेच्या आधारे पाच उमेदवारांची नियुक्तीसाठी शिफारस करण्यात आली.
जिल्ह्यातील विविध शासकीय कार्यालयांमधील ग्राम महसूल अधिकारी, लिपिक-टंकलेखक आणि वाहनचालक या संवर्गातील रिक्त पदे अनुकंपा नियुक्तीद्वारे भरण्याची प्रक्रिया राबविण्यात आली. यामध्ये ग्राम महसूल अधिकारी पदाचे एक, लिपिक-टंकलेखक पदाची तीन आणि वाहनचालक पदाचे एक, अशी एकूण पाच रिक्त पदे उपलब्ध होती. या पदांसाठी पात्र उमेदवारांची ज्येष्ठतेनुसार निवड करण्यात आली.
निवड झालेल्या उमेदवारांच्या कागदपत्रांची पडताळणी करून नियुक्ती आदेश निर्गमित करण्याची कार्यवाही करण्यात येणार आहे. दरम्यान, उपलब्ध रिक्त पदांपेक्षा जास्त उमेदवार उपलब्ध असल्याने उर्वरित उमेदवारांना पुढील रिक्त पदांनुसार अनुकंपा नियुक्तीची संधी देण्यात येणार आहे.
या मेळाव्यास जिल्हाधिकारी आशिमा मित्तल यांच्या अध्यक्षतेखाली संबंधित विभागांचे अधिकारी उपस्थित होते. यावेळी उपजिल्हाधिकारी, सामान्य प्रशासन विभागाचे अधिकारी तसेच विविध शासकीय कार्यालयांचे प्रतिनिधी उपस्थित होते.
लोकशाही दिनाचे 2 नोव्हेंबर रोजी आयोजन
जालना,दि.30 (जिमाका) : जिल्हास्तरीय लोकशाही दिन सोमवार दिनांक 2 नोव्हेंबर रोजी सकाळी 10.00 ते दुपारी 12.00 या वेळेत जिल्हाधिकारी कार्यालयात आयोजन करण्यात आले आहे. लोकशाही दिनात अर्जदाराने विहित नमुन्यातील अर्ज 15 दिवस अगोदर दोन प्रतीत सादर करणे आवश्यक आहे. लोकशाही दिनासाठी अर्ज देताना संबंधित तालुक्यातील तिसऱ्या सोमवारी तालुकास्तरीय लोकशाही दिनामध्ये अर्ज दिलेला असावा व तालुकास्तरीय लोकशाही दिनात एक महिन्यापेक्षा जास्त कालावधी होऊनदेखील कोणतीही कार्यवाही झालेली नसावी अशाच अर्जदारांनी टोकन क्रमांकाच्या पावतीसह अर्ज दोन प्रतीत सादर करावा.
लोकशाही दिनामध्ये न्यायप्रविष्ट प्रकरणे, राजस्वी, अपील, सेवाविषयक, आस्थापनाविषयक बाबी, विहित नमुन्यात नसणारे व आवश्यक ती कागदपत्रे न जोडलेले अर्ज स्वीकारण्यात येणार नाहीत. तसेच तालुकास्तरीय लोकशाही दिनातील टोकन क्रमांकाची तहसिलदार यांच्या स्वाक्षरीची पोहोच पावती व त्यासाठी दिलेल्या मुदतीत व नमुन्यात ज्यांनी यापूर्वीच्या आवश्यक कागदपत्रासह अर्ज केले असतील त्यांना तक्रार मांडता येईल. ज्यांनी यापूर्वी जिल्हास्तरावरील लोकशाही दिनी तक्रार अर्ज दिलेला आहे परंतु अद्याप कार्यवाही झालेली नाही, अशा तक्रारदारांनी पुन्हा अर्ज करु नयेत. तसेच लोकशाही दिनात द्यावयाच्या अर्जाचा विहित नमुना http://jalna.goy.in या संकेतस्थळावर उपलब्ध असल्याचे जिल्हाधिकारी कार्यालयाकडून कळविण्यात आले आहे.
Thursday, 29 October 2026
तुपेवाडी तलावातील अवैध पाणीउपसा बंद; प्रशासनाची धडक कारवाई
जालना,दि.29 (जिमाका) : बदनापूर तालुक्यातील मौजे तुपेवाडी परिसरातील तलावातून
मोटार व पाइपलाइनद्वारे सुरू असलेला अवैध पाणीउपसा प्रशासनाने तातडीने बंद केला आहे.
यासंदर्भात प्राप्त तक्रारीची दखल घेत जिल्हाधिकारी कार्यालयाने बदनापुर तहसीलादार
यांना त्वरित कारवाई करण्याच्या सूचना दिल्या होत्या.
त्यानुसार तहसीलदार बदनापूर,
गटविकास अधिकारी, कार्यकारी अभियंता (पाणीपुरवठा) मंडळ अधिकारी, तलाठी, महावितरण विभाग
आणि स्थानिक पोलीस प्रशासनाच्या पथकाने घटनास्थळी भेट देऊन पाहणी केली. माजी सरपंच
तसेच गावातील नागरिकांच्या उपस्थितीत तलावातील अनधिकृत पाणीउपसा करण्यासाठी वापरण्यात
येणारा वीजप्रवाह खंडित करून पाणीउपसा तातडीने बंद करण्यात आला.यापुढे या ठिकाणी अशा
प्रकारे अवैध पाणीउपसा होणार नाही, याबाबत संबंधित ग्रामपंचायत कार्यालय, स्थानिक पोलीस
ठाणे आणि महावितरण कंपनीला सूचना देण्यात आल्या आहेत.
प्रशासनाच्या या धडक कारवाईमुळे
तलावातील अनधिकृत पाणीउपसा रोखण्यास मदत होणार असून, उन्हाळ्याच्या पार्श्वभूमीवर तलावातील
उर्वरित पाणीसाठा सुरक्षित राहण्यास मदत होणार आहे.
ही कारवाई जिल्हाधिकारी
आशिमा मित्तल तसेच निवासी उपजिल्हाधिकारी शशिकांत हदगल आणि तहसीलदार तुषार निकम यांच्या
मार्गदर्शनाखाली करण्यात आली.-
Wednesday, 28 October 2026
जिल्ह्यात 16 हजारांहून अधिक निरक्षरांनी दिली नवसाक्षरता चाचणी
जालना,दि.28
(जिमाका) : केंद्र पुरस्कृत उल्लास
नवभारत साक्षरता कार्यक्रमांतर्गत जालना जिल्ह्यात निरक्षर व्यक्तींना साक्षर करण्यासाठी
विविध उपक्रम राबविण्यात येत आहेत. या कार्यक्रमाचा उद्देश 15 वर्षे व त्यावरील वयोगटातील
निरक्षर व्यक्तींमध्ये वाचन, लेखन आणि संख्याज्ञान ही मूलभूत कौशल्ये विकसित करण्यासोबतच
आर्थिक, कायदेविषयक व डिजिटल साक्षरता, आरोग्यविषयक जागरूकता आणि व्यावसायिक कौशल्यांना
प्रोत्साहन देणे हा आहे.
सन 2026-27 या वर्षात जालना जिल्ह्यातील एकूण 67
हजार 998 निरक्षरांना साक्षर करण्यासाठी 7 हजार 965 स्वयंसेवकांनी कार्य सुरू केले
आहे. याच उपक्रमांतर्गत 25 ऑक्टोबर 2026 रोजी रविवारी आयोजित नवसाक्षरता चाचणी परीक्षेत
जिल्ह्यातील 1 हजार 669 केंद्रावर 23 हजार 698 निरक्षरांनी सहभाग नोंदविला. यामध्ये 15 हजार
877 महिला आणि 7 हजार 821 पुरुषांचा समावेश होता.
तालुकानिहाय परीक्षेला उपस्थित राहिलेल्या निरक्षरांची
संख्या पुढीलप्रमाणे आहे. जालना तालुक्यात 2 हजार 954, बदनापूर 2 हजार 940, अंबड 3
हजार 476, घनसावंगी 2 हजार 110 , परतूर 1 हजार 762, मंठा 3 हजार 465, भोकरदन 4 हजार
583 आणि जाफराबाद तालुक्यात 2 हजार 407 निरक्षरांनी चाचणी परीक्षेत सहभाग घेतला.
या उपक्रमाच्या प्रभावी अंमलबजावणीसाठी केंद्र व
राज्य शासनाच्या मार्गदर्शनाखाली शिक्षण विभागामार्फत प्रयत्न करण्यात येत आहेत. परीक्षेच्या
आयोजनासाठी शिक्षणाधिकारी (योजना) लता सानप,
उपशिक्षणाधिकारी (योजना) रवी जोशी, सहायक योजना अधिकारी वसीम पटेल, प्राथमिक व माध्यमिक
शिक्षणाधिकारी तसेच तालुकास्तरीय गटशिक्षणाधिकारी, विस्तार अधिकारी आणि केंद्रप्रमुख
यांनी जिल्ह्यातील विविध शाळांना भेटी देऊन सहकार्य केले. जिल्ह्यातील निरक्षर व्यक्तींना
साक्षर करून त्यांना जीवनोपयोगी कौशल्ये प्राप्त करून देण्यासाठी हा उपक्रम महत्त्वपूर्ण
ठरत आहे.
-*-*-*-*-*-*-
राष्ट्रीय जंतनाशक मोहिम यशस्वीरित्या संपन्न
जालना,दि.28
(जिमाका) : जिल्हयामध्ये राष्ट्रीय जंतनाशक मोहिम 27 ऑक्टोंबर रोजी मुख्य कार्यकारी अधिकारी डॉ.कृष्ण कांत कनवारिया
यांच्या मार्गदर्शनाखाली राबविण्यात आली. राष्ट्रीय जंतनाशक मोहिम अंतर्गत जालना जिल्हयातील 1 ते 19 वर्षे वयोगटातील
एकूण मुले 2
लक्ष
11 हजार 647 व एकूण मुली 1 लक्ष 97 हजार 673 असे एकूण 4 लक्ष 9 हजार 320 अर्थात 93
टक्के मुला-मुलींना जंतनाशक गोळीची मात्रा देण्यात आली. काही कारणामुळे जंतनाशक गोळी न घेतलेल्यां 1 ते
19 वर्षे वयोगटातील मुला मुलींना दि.3 नोव्हेंबर 2026 रोजी मॉप अप राऊॅंड मध्ये देण्यांत
येणारं आहे. 1 ते 19 वर्षे वयोगटातील सर्वांनी
जंतनाशक गोळया घ्यावेत असे आवाहन डॉ.जयश्री भुसारे जिल्हा आरोग्य अधिकारी यांनी केले.
या अनुषगांने जिल्हा परिषद प्रशाला, शेलगांव
ता.बदनापुर जिल्हा जालना येथे जिल्हास्तरीय उद्घाटन डॉ.जयश्री भुसारे यांच्या मार्गदर्शनाखाली
संपन्न झाले. यावेळी डॉ.जी.डी. म्हस्के सहाय्यक जिल्हा आरोग्य अधिकारी, डॉ.श्रीकांत
देसाई माता बाल संगोपन अधिकारी, डॉ. जगदीश बनसोडे अतिरिक्त जिल्हा आरोग्य अधिकारी,
आरोग्य कर्मचारी, शिक्षकवृंद व विद्यार्थी उपस्थित होते. जिल्हयामध्ये राष्ट्रीय जंतनाशक
मोहिम यशस्वी होण्यासाठी एकुण 4084 मनुष्यबळाचा वापर करण्यात आला. अंगणवाडी, शाळामध्ये जंतनाशक गोळया प्रत्यक्ष खाऊ
घालण्यांत आल्या. कोठे कोणतीही वाईट घटना घडली नाही. निरोगी बालक सदृढ भारत.
Monday, 26 October 2026
महर्षी वाल्मिकी यांना जिल्हाधिकारी कार्यालयात अभिवादन
जालना,दि.26
(जिमाका) : महर्षी वाल्मिकी यांच्या जयंतीनिमित्त आज जिल्हाधिकारी कार्यालयात अपर जिल्हाधिकारी
रमेश मिसाळ यांनी त्यांच्या प्रतिमेस पुष्पहार
अर्पण करुन अभिवादन केले.
यावेळी नायब तहसिलदार विक्रांत मोंढे,
महसूल अधिकारी दिपाली राऊत-वानखडे, रिना नगरकर, संपदा कुलकर्णी, अरुण डुकरे, वसुधा
फटके, ज्योती वाघ, रुपा येंगुपटला, वृषाली नवले,सुनिल काळुंके व इतर तसेच प्रशासकीय
इमारतीमधील विविध कार्यालयाचे अधिकारी-कर्मचारी यांची उपस्थिती होती.
-*-*-*-*-*-*-
जिल्हा तंबाखू नियंत्रण पथकाची धडक मोहीम; 4 हजार 100 रुपयांचा दंड वसूल अवैध तंबाखूजन्य पदार्थांची विक्री करणाऱ्यांवर कारवाई
जालना,दि.26(जिमाका): राष्ट्रीय तंबाखू नियंत्रण कार्यक्रमांतर्गत जालना
शहरातील अंबड चौफुली परिसरात अवैधरित्या तंबाखूजन्य पदार्थांची विक्री करणाऱ्या पानटपरीधारकांवर
जिल्हा तंबाखू नियंत्रण पथकाने कारवाई केली. या मोहिमेत विविध कलमांनुसार 10 पानटपऱ्यांवर
कारवाई करून एकूण 4 हजार 100 रुपयांचा दंड
वसूल करण्यात आला.
जिल्हाधिकारी आशिमा मित्तल आणि पोलीस अधीक्षक तेघबीर
सिंह संधू यांच्या मार्गदर्शनाखाली तसेच जिल्हा
शल्यचिकित्सक डॉ. राजेंद्र गाडेकर आणि स्थानिक गुन्हे शाखेचे पोलीस निरीक्षक पंकज जाधव
यांच्या सहकार्याने ही मोहीम राबविण्यात आली. यावेळी अंबड चौफुली परिसरात अवैधरित्या
गुटखा, तंबाखू, मावा, जर्दा, खर्डा आणि सुट्ट्या सिगारेटची विक्री करणाऱ्या तसेच तंबाखू
नियंत्रण कायद्याचे उल्लंघन करणाऱ्या विक्रेत्यांवर कारवाई करण्यात आली.
जिल्ह्यात तंबाखूजन्य पदार्थांच्या अवैध विक्रीला
आळा घालण्यासाठी अशा प्रकारच्या कारवाया यापुढेही सुरू राहणार आहेत. पानटपरीधारकांनी
कायद्याचे पालन करावे आणि अवैध तंबाखू व तंबाखूजन्य पदार्थांची विक्री करू नये, असे
आवाहन प्रशासनाच्या वतीने करण्यात आले आहे.
ही कारवाई स्थानिक गुन्हे शाखेचे पोलीस नाईक शिवप्रसाद
एखंडे, पोलीस कॉन्स्टेबल विकास चेके तसेच राष्ट्रीय तंबाखू नियंत्रण कार्यक्रमांतर्गत
जिल्हा सल्लागार डॉ. संदीप गोरे, सायकोलॉजिस्ट सोनाजी भुतेकर, सामाजिक कार्यकर्त्या
सुनंदा कोरडे आणि ग्रामीण विकास संस्थेचे विभागीय व्यवस्थापक मंगेश गायके यांच्या सहभागातून
करण्यात आली.
-*-*-*-*-*-*-
प्रधानमंत्री कौशल्य विकास योजना 4.0 अंतर्गत आरोग्य सेवा क्षेत्रात मोफत प्रशिक्षणाची संधी जिल्ह्यातील इच्छुक युवक-युवतींना ऑनलाइन नोंदणीचे आवाहन
जालना,
दि.26 (जिमाका) : केंद्र शासनाच्या कौशल्य विकास व उद्योजकता मंत्रालयाच्या प्रधानमंत्री
कौशल्य विकास योजना 4.0 अंतर्गत जालना जिल्ह्यातील आरोग्य सेवा क्षेत्रात करिअर करू
इच्छिणाऱ्या युवक-युवतींसाठी मोफत कौशल्य प्रशिक्षणाची संधी उपलब्ध करून देण्यात आली
आहे. शासकीय वैद्यकीय महाविद्यालय, जालना आणि जिल्हा सामान्य रुग्णालय, जालना येथे
विविध अभ्यासक्रमांद्वारे हे प्रशिक्षण दिले जाणार आहे.
शासकीय
वैद्यकीय महाविद्यालय, जालना येथे पॅलिएटिव्ह केअर असिस्टंट आणि डायबिटीज केअर असिस्टंट
हे दोन अभ्यासक्रम उपलब्ध आहेत. तर जिल्हा सामान्य रुग्णालय, जालना येथे जनरल ड्युटी
असिस्टंट (ॲडव्हान्स्ड), होम हेल्थ एड, फ्रंटलाइन हेल्थ केअरगिव्हिंग असिस्टंट आणि
जेरियाट्रिक केअरगिव्हर (इन्स्टिट्यूशनल व होमकेअर) हे चार अभ्यासक्रम उपलब्ध आहेत.
या
प्रशिक्षणाच्या माध्यमातून उमेदवारांना आरोग्य सेवा क्षेत्रासाठी आवश्यक कौशल्ये आत्मसात
करण्याची तसेच शासनमान्य कौशल्य प्रमाणपत्र मिळविण्याची संधी मिळणार आहे. प्रशिक्षण
पूर्ण केल्यानंतर आरोग्य सेवा क्षेत्रात रोजगार मिळविण्यासाठीही मदत होऊ शकते.आरोग्य
सेवा क्षेत्रातील वाढती गरज लक्षात घेता, पात्र व इच्छुक युवक-युवतींनी या संधीचा लाभ
घ्यावा आणि खालील लिंकवर ऑनलाइन नोंदणी करावी, असे आवाहन करण्यात आले आहे.
ऑनलाइन
नोंदणी लिंक : https://forms.gle/LZhBzSmGGwuFbbMJ9 अधिक माहितीसाठी 02482-299033 या
दूरध्वनी क्रमांकावर किंवा jalnarojgar@gmail.com या ई-मेलवर संपर्क साधावा. हे आवाहन
जिल्हा कौशल्य विकास, रोजगार व उद्योजकता कार्यालय, जालना यांनी प्रसिध्दीपत्रकाद्वारे
केले आहे.
-*-*-*-*-*-*-
दुष्काळी परिस्थितीवर मात करण्यासाठी जिल्ह्यातील शेतकऱ्यांना रब्बी ज्वारी बियाणे मिनीकिट्सचे वितरण
जालना,
दि.26(जिमाका) : जिल्ह्यातील दुष्काळी
परिस्थितीवर मात करण्यासाठी आणि शेतकऱ्यांना रब्बी हंगामात दिलासा देण्यासाठी शासनामार्फत
सुधारित रब्बी ज्वारी बियाणे मिनीकिट्स वितरण योजना राबविण्यात येत आहे. यंदा जालना
जिल्ह्यासाठी एकूण 10 हजार 585 रब्बी ज्वारी बियाणे मिनीकिट्स मंजूर करण्यात आल्या
असून, त्यांचे वितरण 10 नोव्हेंबर 2026 पूर्वी करण्याचे नियोजन आहे.
जिल्ह्यातील कमी पर्जन्यमान आणि दुष्काळी परिस्थिती
लक्षात घेऊन ही योजना राबविण्यात येत आहे. प्रत्येक मिनीकिटमध्ये चार किलो वजनाचे ज्वारीचे
बियाणे, प्रक्रिया केलेल्या बियाण्याची जैविक खताची पाकिटे तसेच पीक लागवडीविषयक माहितीपत्रक
व ई-बाबींचा समावेश असणार आहे. कमी पाण्यात उत्पादन देणारे आणि प्रतिकूल हवामानात तग
धरणारे सुधारित ज्वारीचे वाण शेतकऱ्यांना उपलब्ध करून देणे हा या योजनेचा मुख्य उद्देश
आहे. राष्ट्रीय अन्नसुरक्षा व पोषण अभियानांतर्गत पौष्टिक तृणधान्य पिकांना प्रोत्साहन
देण्यासाठीही ही योजना महत्त्वाची ठरणार आहे.
महाडीबीटी पोर्टलवर नोंदणी आवश्यक
या
योजनेचा लाभ घेण्यासाठी शेतकऱ्यांची निवड महाडीबीटी (MahaDBT) पोर्टलद्वारे ‘प्रथम
येणाऱ्यास प्रथम प्राधान्य’ (FCFS) या तत्त्वावर करण्यात येणार आहे. त्यामुळे इच्छुक
शेतकऱ्यांनी विलंब न करता महाडीबीटी पोर्टलवर ऑनलाइन अर्ज नोंदणी करावी. निवड झालेल्या
पात्र शेतकऱ्यांना 10 नोव्हेंबर 2026 पूर्वी नियोजनबद्ध पद्धतीने मिनीकिट्सचे वितरण
करण्याचे नियोजन आहे.
शेतकऱ्यांना लाभ घेण्याचे आवाहन
ऑनलाइन
अर्ज करण्यासाठी www.mahadbt.maharashtra.gov.in/Farmer/AgriLogin या संकेतस्थळाचा
वापर करावा. योजनेबाबत अधिक माहितीसाठी www.krishi.maharashtra.gov.in या संकेतस्थळाला
भेट द्यावी किंवा संबंधित सहाय्यक कृषी अधिकारी, उपकृषी अधिकारी, मंडळ व तालुका कृषी
अधिकारी कार्यालयाशी संपर्क साधावा.योजनेच्या मार्गदर्शक सूचनांनुसार अटी व शर्ती अर्जदार
शेतकऱ्यांना बंधनकारक राहतील. जिल्ह्यातील जास्तीत जास्त शेतकऱ्यांनी या योजनेचा लाभ
घ्यावा, असे आवाहन जिल्हा अधीक्षक कृषी अधिकारी जी. आर. कापसे यांनी प्रसिध्दीपत्रकाद्वारे
केले आहे.
-*-*-*-*-*-*-*-
औरंगाबाद विभाग पदवीधर मतदारसंघाच्या मतमोजणीसाठी प्रशासकीय यंत्रणा सज्ज मतमोजणी प्रक्रिया अचूक, पारदर्शक व शांततेत पार पाडा - विभागीय आयुक्त जी. श्रीकांत विभागीय आयुक्तांकडून मतमोजणी केंद्राची पाहणी; अधिकारी व कर्मचाऱ्यांना मार्गदर्शन
छत्रपती संभाजीनगर, दि. 26 (विमाका)
: विधान परिषदेच्या 05-औरंगाबाद
विभाग पदवीधर मतदारसंघ निवडणुकीची मतमोजणी उद्या, मंगळवार, दि. 27 ऑक्टोबर रोजी सकाळी
8 वाजता सुरू होणार आहे. मतमोजणी प्रक्रिया अचूक, पारदर्शक, निष्पक्ष व शांततेत पार
पाडण्यासाठी नियुक्त अधिकारी व कर्मचाऱ्यांनी परस्पर समन्वयाने जबाबदारी पार पाडावी,
असे निर्देश निवडणूक निर्णय अधिकारी तथा विभागीय आयुक्त जी. श्रीकांत यांनी दिले.
छत्रपती
संभाजीनगर येथील चिकलठाणा एमआयडीसी परिसरातील रेसोनेट लॉजिस्टिक्स एलएलपी येथे मतमोजणी
होणार आहे. विभागीय आयुक्त श्रीकांत यांनी आज मतमोजणी केंद्राला भेट देऊन पूर्वतयारीचा
आढावा घेतला. यावेळी त्यांनी मतमोजणी कक्षातील टेबलांची मांडणी, स्ट्राँग रूम, मतपेट्यांची
सुरक्षितता, अधिकारी व कर्मचाऱ्यांची नियुक्ती, मतमोजणीच्या फेऱ्या, निकाल संकलन व
सुरक्षा व्यवस्थेची पाहणी केली.
मतमोजणीसाठी
70 टेबलांची व्यवस्था करण्यात आली असून, प्राथमिक मतमोजणीच्या 13 फेऱ्यांचे नियोजन
आहे. प्रत्येक टेबलवर एक पर्यवेक्षक व दोन सहाय्यक नियुक्त करण्यात आले आहेत. प्रत्येक
सात टेबलांवर एका सहाय्यक निवडणूक निर्णय अधिकाऱ्यांचे नियंत्रण राहणार आहे. टपाली
मतपत्रिकांच्या मोजणीसाठी स्वतंत्र दोन टेबलांची व्यवस्था करण्यात आली आहे.
मतपत्रिकांचे
वर्गीकरण, वैध व अवैध मतांचा निर्णय, पसंतीक्रमानुसार मतांची नोंद तसेच निकालपत्रकांची
पडताळणी करताना विशेष दक्षता घ्यावी. मतमोजणीदरम्यान कोणतीही शंका अथवा अडचण उद्भवल्यास
वरिष्ठ अधिकाऱ्यांच्या मार्गदर्शनाखाली नियमानुसार कार्यवाही करावी, अशा सूचना विभागीय
आयुक्तांनी दिल्या.
मतमोजणी
केंद्रावर पोलीस बंदोबस्त, सीसीटीव्हीद्वारे देखरेख, प्रवेश नियंत्रण व आवश्यक मूलभूत
सुविधांची व्यवस्था करण्यात आली आहे. प्रसारमाध्यमांना अधिकृत माहिती देण्यासाठी स्वतंत्र
पथक नियुक्त करण्यात आले आहे.
यावेळी
मतमोजणीसाठी नियुक्त अधिकारी व कर्मचाऱ्यांना त्यांच्या जबाबदाऱ्या तसेच टेबलनिहाय
कामकाजाबाबत प्रशिक्षण देण्यात आले. सर्वांनी निवडणूक आयोगाच्या मार्गदर्शक सूचनांचे
काटेकोर पालन करून मतमोजणी प्रक्रिया यशस्वी करावी, असे निर्देश विभागीय आयुक्त श्रीकांत
यांनी दिले.
-*-*-*-*-*-
Friday, 23 October 2026
05-औरंगाबाद विभाग पदवीधर मतदारसंघ निवडणुकीसाठी जालना जिल्ह्यात एकुण 61.14 टक्के मतदान
जालना, दि.23 (जिमाका) : 05-औरंगाबाद
विभाग पदवीधर मतदारसंघ निवडणुकीच्या अनुषंगाने जालना जिल्ह्यात शुक्रवार, (दि.23)
रोजी मतदान शांततेत व सुरळीत पार पडले. 05-औरंगाबाद विभाग पदवीधर मतदारसंघ
निवडणुकीसाठी जालना जिल्ह्यातील 89 मतदान केंद्रावर एकूण 61.14 टक्के मतदान झाल्याची माहिती
जिल्हाधिकारी तथा सहायक जिल्हा निवडणुक निर्णय अधिकारी आशिमा मित्तल यांनी दिली.
05-औरंगाबाद
विभाग पदवीधर मतदारसंघ निवडणुकीसाठी जालना जिल्ह्यातील 89 मतदान केंद्रात मतदान
प्रक्रिया शांततेत पार पडली. यामध्ये जालना तालुक्यात 53.82 टक्के तर बदनापुर
तालुक्यात 57.25 टक्के, अंबड तालुक्यात 65.65 टक्के घनसावंगी तालुक्यात 66.23
टक्के, परतुर तालुक्यात 70.76 टक्के,मंठा तालुक्यात 56.50 टक्के, भोकरदन तालुक्यात
63.69 टक्के आणि जाफ्राबाद तालुक्यात 58.22 टक्के तर मतदारांनी आपला मतदानाचा हक्क
बजावला असुन, जालना जिल्ह्यात 05-औरंगाबाद विभाग पदवीधर मतदारसंघासाठी एकुण 61.14
टक्के मतदान झाले आहे.
05-औरंगाबाद विभाग पदवीधर मतदारसंघ निवडणुक 2026 जिल्हाधिकारी आशिमा मित्तल यांची मतदान केंद्रास भेट
जालना,दि.23(जिमाका): 05-औरंगाबाद विभाग पदवीधर मतदारसंघ निवडणुक
2026 करीता आज सकाळी 8 वाजेपासून मतदान प्रक्रियेस शांत वातावरणात सुरुवात झाली. त्या
पार्श्वभुमीवर जिल्हाधिकारी तथा सहायक जिल्हा निवडणुक निर्णय अधिकारी आशिमा मित्तल
यांनी आज जालना जिल्ह्यातील विविध मतदान केंद्रास भेट देवून मतदान प्रक्रियेची पाहणी
केली.
जिल्हाधिकारी तथा सहायक जिल्हा निवडणुक निर्णय अधिकारी
आशिमा मित्तल यांनी आज जालना शहरातील अंकुशराव टोपे महाविद्यालय, चरण पहेलवान (सी.पी.)
भक्त महाविद्यालय येथे तसेच भोकरदन तालुक्यातील जिल्हा परिषद प्राथमिक शाळा सिपोरा
बाजार आणि जिल्हा परिषद प्राथमिक शाळा पिंपळगाव रेणुकाई येथील मतदान केंद्रास प्रत्यक्ष
भेट देवून मतदान प्रक्रिया योग्य पध्दतीने होत असल्याची पाहणी केली. तसेच मतदान केंद्रातील
केंद्राध्यक्ष आणि मतदान अधिकाऱ्यांशी संवाद साधुन मतदान प्रक्रियेची माहिती जाणुन
घेतली.
यावेळी पोलिस अधिक्षक तेगबीर सिंह संधु, जालना तहसिलदार
धैर्यशिल गवळी, भोकरदन तहसिलदार ज्ञानेश्वर काकडे यांची उपस्थिती होती.
-*-*-*-*-*-*-
जालना जिल्ह्यात 7 लाख 44 हजार बालकांना जंतनाशक गोळ्या देण्याचे उद्दिष्ट
जालना, दि.23 (जिमाका) : जालना जिल्ह्यात राष्ट्रीय जंतनाशक दिनानिमित्त
27 ऑक्टोबर रोजी बालकांना जंतनाशक गोळ्या देण्यात येणार आहेत. या दिवशी गोळ्या घेता
न आलेल्या बालकांसाठी 3 नोव्हेंबर 2026 रोजी मॉप-अप दिन आयोजित करण्यात आला आहे.
या मोहिमेअंतर्गत जिल्ह्यातील 0 ते 19 वर्षे
वयोगटातील 4 लाख 32 हजार 738 ग्रामीण भागातील बालकांना, तर शहरी भागातील 2 लाख 37 हजार
39 व मनपा जालना येथील 74 हजार 653 य बालकांना जंतनाशक गोळ्या देण्याचे नियोजन आहे.
अशा प्रकारे संपूर्ण जिल्ह्यात एकूण 7 लाख 44 हजार 426 बालकांना गोळ्या देण्याचे उद्दिष्ट
निश्चित करण्यात आले आहे.
जंतनाशक गोळ्यांमुळे मुलांचे आरोग्य सुधारण्यास
मदत होते. शरीरातील जंतांमुळे रक्तक्षय, कुपोषण आणि शारीरिक व मानसिक विकासावर विपरीत
परिणाम होऊ शकतो. त्यामुळे पालकांनी आपल्या मुलांना वयानुसार जंतनाशक गोळ्या देऊन त्यांच्या
आरोग्याची काळजी घ्यावी.
या मोहिमेचे नियोजन सूक्ष्म पद्धतीने करण्यात
आले असून, ग्रामीण व शहरी भागातील आरोग्य कर्मचारी, आशा सेविका आणि अंगणवाडी ताई यांना
प्रशिक्षण देण्यात आले आहे. जिल्ह्यातील 4 हजार 84 मनुष्यबळाच्या माध्यमातून ही मोहीम
राबविण्यात येणार आहे.
पालकांनी 1 ते 19 वर्षे वयोगटातील आपल्या मुलांना
जंतनाशक गोळ्या देण्याबाबत सहकार्य करावे, असे आवाहन , असे आवाहन जिल्हा आरोग्य अधिकारी
डॉ. जयश्री भुसारे यांनी केले आहे.
-*-*-*-*-*-*-
स्त्री स्वातंत्र्याचा जाहीरनामा
स्त्री ही स्वतंत्र आहे तिला सर्व प्रकारचे मानवी अधिकार मिळाले पाहिजेत, म्हणून महात्मा जोतीराव फुले यांनी स्त्री-पुरुषांच्या मानवी हक्कांचा “सार्वजनिक सत्यधर्म” पुस्तकात प्रामुख्याने उल्लेख केला आहे. हे हक्क पुढीलप्रमाणे आहेत -
निर्मिककर्त्याने एकंदर सर्व प्राणीमात्रांस उत्पन्न केले. स्त्री-पुरुष हे उभयताच जन्मतःच स्वतंत्र व एकंदर सर्व अधिकारांचा उपभोग घेण्यास पात्र आहेत.
Thursday, 22 October 2026
पदवीधर मतदारांना मतदानासाठी चार तासांची विशेष सवलत द्या
खाजगी आस्थापना, उद्योग व कार्यालयांना निवडणूक विभागाच्या सूचना
जालना,दि.22(जिमाका) : 05-औरंगाबाद
विभाग पदवीधर मतदारसंघाच्या द्विवार्षिक निवडणुकीसाठी शुक्रवार, दि. 23 ऑक्टोबर 2026
रोजी मतदान होणार आहे. या निवडणुकीत पदवीधर मतदारांना मतदानाचा हक्क बजावता यावा,
यासाठी खाजगी आस्थापना, उद्योग, संस्था आणि कार्यालयांमध्ये कार्यरत असलेल्या
मतदारांना मतदानासाठी किमान चार तासांची विशेष सवलत द्यावी, अशा सूचना निवडणूक
विभागाने दिल्या आहेत.
औरंगाबाद
विभाग पदवीधर मतदारसंघासाठी मतदान शुक्रवारी सकाळी 8 ते सायंकाळी 4 या वेळेत होणार
आहे. या पार्श्वभूमीवर मतदारांना मतदानासाठी आवश्यक वेळ उपलब्ध करून देण्याचे
आवाहन संबंधित आस्थापना व कार्यालयांना करण्यात आले आहे. यासंदर्भात जालना येथील
उपजिल्हा निवडणूक अधिकारी कार्यालयाकडून आवश्यक कार्यवाही करण्याच्या सूचना
देण्यात आल्या आहेत.
लोकप्रतिनिधित्व
अधिनियम, १९५१ मधील कलम १३५-ब नुसार मतदानाचा हक्क बजावण्यासाठी पात्र मतदारांना
भरपगारी सुट्टी देण्याची तरतूद आहे. महाराष्ट्र शासनाच्या सामान्य प्रशासन
विभागाने २३ जून २०२१ रोजीच्या शासन निर्णयानुसार पदवीधर निवडणुकीत मतदान करणाऱ्या
मतदारांसाठी विशेष नैमित्तिक रजेबाबत तरतूद केली आहे. मात्र, खाजगी आस्थापनांमध्ये
काम करणाऱ्या मतदारांना मतदानासाठी पुरेसा वेळ मिळावा, यासाठी संबंधित आस्थापनांनी
विशेष काळजी घेणे आवश्यक असल्याचे निवडणूक विभागाने स्पष्ट केले आहे.
खाजगी
आस्थापनांमध्ये काम करणाऱ्या मतदारांना मतदानासाठी वेळ मिळावा, यासाठी संबंधित
आस्थापनांना किमान चार तासांची विशेष सवलत देण्याबाबत सूचना द्याव्यात, असे
निवडणूक विभागाने कळविले आहे. यापूर्वीही या संदर्भात संबंधित विभागांना
पत्राद्वारे सूचना देण्यात आल्या होत्या. मात्र, मुख्य निवडणूक अधिकारी,
महाराष्ट्र राज्य यांच्या 16 ऑक्टोबर 2026 रोजीच्या पत्रानुसार दोन तासांऐवजी चार
तासांची विशेष सवलत देण्याबाबत पुन्हा स्पष्ट करण्यात आले आहे.
जिल्ह्यातील
सर्व संबंधित खाजगी आस्थापना, उद्योग, संस्था आणि कार्यालयांनी या सूचनांची
अंमलबजावणी करून पदवीधर मतदारांना मतदानासाठी आवश्यक वेळ उपलब्ध करून द्यावा, असे
आवाहन करण्यात आले आहे.
****
जिल्हाधिकारी आशिमा मित्तल यांची आंबा येथील जवाहर नवोदय विद्यालयास भेट
जालना, दि. 22 (जिमाका) : जिल्हाधिकारी आशिमा मित्तल यांनी
आज आंबा (ता. परतूर) येथील पीएम श्री जवाहर नवोदय विद्यालय, जालना येथे भेट देऊन विद्यालयातील
व्यवस्थेची पाहणी केली. या प्रसंगी उपविभागीय अधिकारी पदमाकर गायकवाड, उपविभागीय पोलीस
अधिकारी परतूर रामेश्वर रेंगे तसेच विद्यालयाचे प्राचार्य एस. जी. पवार उपस्थित होते.
विद्यालयात
मागील काळात रॅगिंगसंदर्भात तक्रारी प्राप्त झाल्या होत्या. या पार्श्वभूमीवर जिल्हाधिकारी
मित्तल यांनी प्राचार्य श्री. पवार यांच्याशी सविस्तर चर्चा करून आवश्यक सूचना दिल्या.
रॅगिंगसारखे प्रकार कोणत्याही परिस्थितीत खपवून घेतले जाणार नाहीत, विद्यालयातील रॅगिंगविरोधी
समिती सक्रिय ठेवावी, विद्यार्थ्यांच्या तक्रारींची तात्काळ दखल घ्यावी तसेच वसतिगृहांवर
सातत्याने देखरेख ठेवावी, असे निर्देश त्यांनी दिले. विद्यार्थ्यांच्या सुरक्षेच्या
दृष्टीने पोलीस प्रशासनानेही दक्ष राहावे, अशा सूचना त्यांनी उपविभागीय पोलीस अधिकारी
रामेश्वर रेंगे यांना दिल्या. विद्यार्थ्यांची सुरक्षा व त्यांना भयमुक्त वातावरणात
शिक्षण मिळणे हे सर्वाधिक महत्त्वाचे असल्याचे जिल्हाधिकाऱ्यांनी यावेळी स्पष्ट केले.
विद्यालयाच्या
पाणीपुरवठ्याचा आढावा घेत, विद्यालयास नियमित व सुरळीत पाणीपुरवठा होईल यासाठी तात्काळ
उपाययोजना कराव्यात, अशा सूचना जिल्हाधिकाऱ्यांनी जलजीवन मिशनच्या अधिकाऱ्यांना दिल्या.
यानंतर
जिल्हाधिकाऱ्यांनी विद्यालय परिसरात सुरू असलेल्या नवीन विद्यार्थी वसतिगृहाच्या बांधकामाची
पाहणी केली. बांधकामाच्या दर्जात कोणतीही कसूर राहणार नाही याची काळजी घ्यावी, दर्जेदार
साहित्याचा वापर करून काम विहित मुदतीत पूर्ण करावे, अशा स्पष्ट सूचना त्यांनी संबंधित
कंत्राटदारास दिल्या.
****
जिल्हाधिकारी आशिमा मित्तल यांची ग्रामीण रुग्णालय परतूर येथे अचानक भेट
जालना,दि.22 (जिमाका) : जिल्हाधिकारी आशिमा मित्तल यांनी आज ग्रामीण रुग्णालय, परतूर येथे अचानक भेट देऊन तेथील कामकाजाची प्रत्यक्ष पाहणी केली. या पाहणीत वैद्यकीय अधिकारी गैरहजर असल्याचे तसेच काही आरोग्य कक्ष बंद असल्याचे आढळून आल्याने जिल्हाधिकाऱ्यांनी संबंधितांची चांगलीच झाडाझडती घेतली. या प्रसंगी उपविभागीय अधिकारी पदमाकर गायकवाड व उपविभागीय पोलीस अधिकारी रामेश्वर रेंगे उपस्थित होते.
जिल्हाधिकारी मित्तल यांनी रुग्णालयातील विविध विभाग, बाह्यरुग्ण कक्ष, औषध वितरण कक्ष तसेच संपूर्ण परिसरात फिरून पाहणी केली. कर्तव्याच्या वेळेत वैद्यकीय अधिकारी उपस्थित नसल्याचे तसेच काही कक्ष बंद अवस्थेत असल्याचे निदर्शनास आल्याने त्यांनी तीव्र नाराजी व्यक्त केली. उपस्थित कर्मचाऱ्यांकडून त्यांनी याबाबत सविस्तर माहिती घेतली व हजेरी नोंदवहीची तपासणी केली.
या गंभीर बाबीची दखल घेत गैरहजर वैद्यकीय अधिकारी व संबंधित कर्मचाऱ्यांना कारणे दाखवा नोटीस बजावण्याचे निर्देश जिल्हाधिकाऱ्यांनी दिले. रुग्णसेवेत कोणत्याही प्रकारची हयगय खपवून घेतली जाणार नाही, अशी स्पष्ट ताकीद त्यांनी यावेळी दिली.
रुग्णालयातील सर्व कक्ष ठरवून दिलेल्या वेळेत नियमितपणे सुरू ठेवावेत, अधिकारी व कर्मचाऱ्यांनी वेळेवर उपस्थित राहावे, रुग्णांना तत्पर व दर्जेदार सेवा द्यावी तसेच परिसराची स्वच्छता राखावी, अशा सूचना जिल्हाधिकाऱ्यांनी दिल्या. ग्रामीण भागातील सामान्य व गरजू नागरिकांसाठी ग्रामीण रुग्णालय हा महत्त्वाचा आधार असून येथे येणाऱ्या प्रत्येक रुग्णाला वेळेत उपचार मिळालाच पाहिजे, असे त्यांनी स्पष्ट केले. कामकाजात तात्काळ सुधारणा न झाल्यास संबंधितांवर कठोर कारवाई करण्यात येईल, असे सांगितले.
**
जिल्हाधिकारी आशिमा मित्तल यांची परतूर येथील मागासवर्गीय मुलींच्या वसतिगृहास भेट
जालना,दि.22(जिमाका) : परतूर येथील डॉ. बाबासाहेब आंबेडकर मागासवर्गीय मुलींच्या शासकीय वसतिगृहास जिल्हाधिकारी आशिमा मित्तल यांनी आज भेट देऊन तेथील सोयीसुविधांची प्रत्यक्ष पाहणी केली. यावेळी त्यांनी विद्यार्थीनींशी मनमोकळा संवाद साधत त्यांच्या अडीअडचणी जाणून घेतल्या. या प्रसंगी उपविभागीय अधिकारी पदमाकर गायकवाड, उपविभागीय पोलीस अधिकारी रामेश्वर रेंगे यांच्यासह वसतिगृहाचे अधिकारी व कर्मचारी उपस्थित होते.
भेटीदरम्यान जिल्हाधिकारी मित्तल यांनी वसतिगृहातील निवास कक्ष, पलंग व गाद्या, स्वच्छता, पिण्याचे पाणी, भोजनव्यवस्था, स्वच्छतागृहे तसेच परिसराची बारकाईने पाहणी केली. इमारतीची स्वच्छता, खोल्यांमधील व्यवस्था आणि विद्यार्थिनींना पुरवल्या जाणाऱ्या सुविधांबाबत त्यांनी समाधान व्यक्त केले. ही व्यवस्था यापुढेही सातत्याने उत्तम दर्जाची राहावी, अशा सूचना त्यांनी संबंधित यंत्रणेला दिल्या.
विद्यार्थीनींच्या सुरक्षेबाबत जिल्हाधिकाऱ्यांनी विशेष विचारपूस केली. वसतिगृह परिसरातील सीसीटीव्ही कॅमेरे, प्रवेशद्वारावरील देखरेख व रात्रीची सुरक्षा व्यवस्था याबाबत त्यांनी माहिती घेतली. कोणतीही अडचण अथवा असुरक्षिततेची भावना निर्माण झाल्यास निःसंकोचपणे गृहपाल किंवा प्रशासनाशी संपर्क साधावा, असे आवाहन त्यांनी मुलींना केले. उपविभागीय पोलीस अधिकारी रामेश्वर रेंगे यांनीही विद्यार्थीनींशी संवाद साधत पोलीस प्रशासन त्यांच्या सुरक्षेसाठी सदैव तत्पर असल्याचा विश्वास दिला व परिसरात आवश्यक दक्षता घेण्याबाबत सूचना दिल्या.
संवादादरम्यान विद्यार्थीनींनी अभ्यासिका तसेच संगणकीय शिक्षणसाठी डेस्कटॉप संगणक उपलब्ध करून देण्याची मागणी केली. या मागण्यांची जिल्हाधिकारी श्रीमती मित्तल यांनी तात्काळ दखल घेत आवश्यक पुस्तके व डेस्कटॉप संगणक लवकरात लवकर उपलब्ध करून देण्याचे आश्वासन दिले. याबाबत आवश्यक कार्यवाही करण्याचे निर्देश त्यांनी उपविभागीय अधिकारी पदमाकर गायकवाड व संबंधित विभागाला दिले.
**
विधान परिषदेच्या पदवीधर मतदारसंघाच्या निवडणूकीत असे करा मतदान...!
शुक्रवारी २३ ऑक्टोबरला मतदान !
छत्रपती संभाजीनगर, दि. २२ : भारत निवडणूक आयोगाच्या निवडणूक कार्यक्रमानुसार महाराष्ट्र विधान परिषदेच्या औरंगाबाद विभाग पदवीधर मतदारसंघाच्या निवडणूकीसाठी येत्या शुक्रवारी २३ ऑक्टोबर रोजी मतदान प्रक्रिया राबविण्यात येणार आहे. भारत निवडणूक आयोगामार्फत घेण्यात येणाऱ्या विधानपरिषदेच्या पदवीधर मतदारसंघाच्या निवडणुकीची मतदान पद्धती आणि आयोगामार्फत घेण्यात येणाऱ्या अन्य सार्वत्रिक निवडणुकातील मतदानाची पद्धती यात मूलभूत फरक आहे. विधानपरिषद निवडणूकीचे मतदान हे मतपत्रिकेवर उमेदवारांच्या नावापुढे पसंतीक्रम नोंदवून घेण्यात येते. जितके उमेदवार निवडणूक लढवित असतील अशा सर्वांपुढे पसंतीक्रम नोंदविता येतो. मतदानाच्या या वेगळ्या पद्धतीमुळे मतदारांनी आणि विशेषत: प्रथमच मतदान करणाऱ्यांनी ही पद्धत जाणून योग्यरितीने मतदान करावे, असे आवाहन निवडणूक निर्णय अधिकारी तथा विभागीय आयुक्त जी श्रीकांत यांनी केले आहे.
असे करा मतदान
मतदान करण्यासाठी निवडणूक अधिकाऱ्याने मतपत्रिकेबरोबर पुरवलेले जांभळ्या (व्हायलेट) रंगाचे स्केच पेनच वापरावे. अन्य कोणतेही पेन, पेन्सिल, बॉलपॉईन्ट पेन किंवा अन्य कोणतेही लेखनाचे साधन मतदानासाठी वापरु नये. असे केल्यास तुमची मतपत्रिका अवैध ठरेल. उमेदवाराच्या नावाच्या स्तंभासमोर पसंतीक्रम म्हणून असलेल्या स्तंभामध्ये तुम्ही प्रथम पसंतीचा उमेदवार म्हणून निवडलेल्या उमेदवाराच्या नावासमोर १ असा आकडा लिहून मतदान करा. १ हा आकडा फक्त एकाच उमेदवाराच्या नावासमोर द्यावा.
निवडून द्यावयाच्या उमेदवारांची संख्या विचारात न घेता जेवढे उमेदवार निवडणूक लढवत असतील तेवढे पसंतीक्रम तुम्हाला देता येतील. उर्वरीत उमेदवारांबाबतचा तुमचा पुढील पसंतीक्रम, अशा उमेदवारांच्या नावासमोर असलेल्या पसंतीक्रम या स्तंभामध्ये तुमच्या पसंतीक्रमानुसार २, ३, ४ इत्यादी आकडे टाकून दर्शवा.
कोणत्याही उमेदवाराच्या नावासमोर आपण फक्त एकच आकडा टाकलेला आहे याची खात्री करून घ्यावी. तसेच तोच आकडा एकापेक्षा अधिक उमेदवारांच्या नावासमोर टाकलेला नाही याची देखील खात्री करुन घ्यावी. पसंतीक्रम फक्त १, २, ३ इत्यादी आकड्यांमध्येच दर्शवावा. एक, दोन, तीन इत्यादी शब्दांमध्ये दर्शवू नये. पसंतीक्रमाचे आकडे भारतीय अंकाच्या 1, 2, 3 इत्यादींसारख्या आंतरराष्ट्रीय रुपात किंवा I, II, III इत्यादींसारख्या रोमन रुपात किंवा १, २, ३ अशा देवनागरी रुपात किंवा संविधानाच्या आठव्या अनुसूचीमधील मान्यता दिलेल्या कोणत्याही एका भारतीय भाषेमध्ये वापरण्यात येणाऱ्या रुपामध्ये चिन्हांकित करता येतील.
मतपत्रिकेवर मतदाराने आपले नाव, आद्याक्षरे किंवा अन्य शब्द लिहू नयेत किंवा स्वाक्षरी करु नये. तसेच आपल्या अंगठ्याचा ठसा देखील उमटवू नये. असे केल्यास आपली मतपत्रिका अवैध ठरेल.
पसंतीक्रम दर्शविण्यासाठी तुमच्या निवडीच्या उमेदवाराच्या नावासमोर √ किंवा X अशी खूण करणे टाळावे. अशा मतपत्रिका बाद करण्यात येतील. पसंतीक्रम फक्त आकड्यांमध्येच दर्शवावा.
आपली मतपत्रिका वैध ठरण्यासाठी एकूण उमेदवारांपैकी एका उमेदवारासमोर १ हा आकडा लिहून तुमची पहिली पसंती दर्शवणे आवश्यक आहे. इतर पसंतीक्रम देणे ऐच्छिक आहेत. म्हणजेच इच्छेनुसार दुसरी किंवा पुढील पसंती दर्शवावी.
अशा मतपत्रिका अवैध ठरतील
१ हा आकडा टाकलेला नसल्यास. १ हा आकडा एकापेक्षा अधिक उमेदवारांच्या नावासमोर टाकलेला असल्यास. १ हा आकडा, तो कोणत्या उमेदवाराला देण्यासाठी टाकलेला आहे याबाबत शंका निर्माण होईल अशाप्रकारे टाकलेला असेल. एकाच उमेदवाराच्या नावासमोर १ आणि त्याबरोबर २, ३ इत्यादी आकडे देखील टाकलेले असतील. पसंतीक्रम आकड्याऐवजी शब्दांमध्ये दर्शवलेला असेल. मतदाराची ओळख पटू शकेल अशी कोणतीही खूण किंवा लेखन असले, आणि असे आकडे टाकण्यासाठी निवडणूक अधिकाऱ्याने दिलेल्या जांभळ्या रंगाच्या स्केच पेन व्यतिरिक्त अन्य साधनाने कोणताही आकडा टाकलेला असेल, तरी अशी मतपत्रिका अवैध ठरेल.
--००--
*पदवीधर मतदानासाठी 10 प्रकारचे ओळखपत्र पुरावे ग्राह्य धरणार*
*05-औरंगाबाद विभाग पदवीधर मतदारसंघ निवडणुक*
*पदवीधर मतदानासाठी 10 प्रकारचे ओळखपत्र पुरावे ग्राह्य धरणार*
जालना, दि.22 (जिमाका) :05-औरंगाबाद विभाग पदवीधर मतदारसंघ निवडणुक मतदारसंघातील विधानपरिषदेच्या द्विवार्षिक निवडणुकीकरिता मतदान करताना मतदान केंद्रावर मतदारांची ओळख पटविण्यासाठी जे मतदार ओळखपत्र (EPIC) सादर करू शकत नाहीत, अशा मतदारांनी त्यांची ओळख पटविण्यासाठी मतदार ओळखपत्राच्या (EPIC) व्यतिरिक्त खालील नमूद पर्यायी कागदपत्रे पुरावा म्हणून ग्राह्य धरण्याबाबत आयोगाने आदेश दिले आहेत.
यामध्ये आधार कार्ड, ड्रायव्हिंग लायसन्स, पॅन कार्ड, भारतीय पासपोर्ट, राज्य / केंद्र सरकार, सार्वजनिक क्षेत्रातील उपक्रम, स्थानिक स्वराज्य संस्था किंवा इतर खाजगी औद्योगिक संस्थांद्वारे त्यांच्या कर्मचाऱ्यांना दिलेले सेवा ओळखपत्र, खासदार / आमदार / विधान परिषद सदस्य यांना दिलेली अधिकृत ओळखपत्रे, संबंधित शिक्षक / पदवीधर मतदारसंघातील मतदार ज्या शैक्षणिक संस्थेमध्ये कार्यरत आहेत, त्या शैक्षणिक संस्थांनी जारी केलेले सेवा ओळखपत्र, विद्यापीठाद्वारे वितरित मूळ पदवी / पदविका प्रमाणपत्र, सक्षम प्राधिकाऱ्याने दिलेले शारीरिक दिव्यांगत्वाचे मूळ प्रमाणपत्र, भारत सरकारच्या सामाजिक न्याय व सक्षमीकरण मंत्रालयाने जारी केलेले युनिक डिसॅबिलिटी ओळखपत्र (UDID) हे पुरावे मतदानासाठी ग्राह्य धरले जाणार असल्याचे निवडणूक शाखा जिल्हाधिकारी कार्यालय, जालना यांनी कळविले आहे.
****

.jpeg)
.jpeg)

.jpeg)


.jpeg)



.jpeg)

.jpeg)








.jpeg)




.jpeg)





