राज्य शासन शेतकऱ्यांना सर्वोतोपरी मदत करणार : महसुल मंत्री चंद्रशेखर बावनकुळे महसुल मंत्री चंद्रशेखर बावनकुळे यांनी केली पीक परिस्थितीची पाहणी

 

 

   जालना,दि.2(जिमाका) : यंदा अपेक्षेपेक्षा कमी पाऊस आणि प्रदीर्घ खंड पडल्यामुळे राज्यातील अनेक भागात दुष्काळ परिस्थिती निर्माण झाली आहे. याचा पार्श्वभूमीवर महसुल मंत्री चंद्रशेखर बावणकुळे यांनी आज बदनापुर तालूक्यातील वरुडी आणि भोकरदन तालुक्यातील दगडवाडी शिवारातील शेत पिकांची पाहणी करुन शेतकऱ्यांशी संवाद साधून त्यांच्या अडचणी समजून घेतल्या. शेतकरी बांधवांना या नैसर्गिक संकटातून बाहेर काढण्यासाठी राज्य शासन सर्वतोपरी प्रयत्न करणार असल्याचे महसुल मंत्री चंद्रशेखर बावनकुळे यावेळी म्हणाले.

यावेळी श्री. बावनकुळे यांनी राज्य शासनाने राज्यात दुष्काळ जाहीर केला असल्याचे सांगुन, शासनाकडून दुष्काळाचा सामना करण्यासाठी आवश्यक त्या सर्व उपाययोजना केल्या जात आहेत. दुष्काळी परिस्थिती लक्षात घेऊन राज्य शासनाने शेतकऱ्यांना दिलासा देणारे महत्वपूर्ण निर्णय घेतले आहेत. जालना जिल्ह्यात देखील पाऊस कमी झाल्याने पिकांचे मोठ्या प्रमाणात नुकसान झाले असून पिके देखील करपली आहेत. यामुळे शेतकरी बांधव मोठ्या संकटात सापडले आहे. राज्य शासनाने प्रशासनाला नुकसानग्रस्त शेत पिकांचे तात्काळ पंचनामे करण्याचे निर्देश दिले आहेत. त्यानुसार संबंधित यंत्रणेकडून पंचनाम्याचे काम देखील सुरू झाले आहे. नुकसानग्रस्त शेतकऱ्यांना त्यांच्या झालेल्या नुकसानीचा अधिकाधिक मोबदला मिळावा, यासाठी शासन प्रयत्नशील आहे. शेतकऱ्यांना जास्तीत-जास्त मदत करण्याची शासनाची भूमिका असल्याचे ते यावेळी म्हणाले.

यावेळी महसुल मंत्री श्री. बावनकुळे यांनी जालना येथील विश्रामगृह येथे नागरिकांची भेट घेवून, त्यांच्याशी संवाद साधत त्यांच्या समस्या जाणुन घेत निवेदन स्वीकारली. तसेच संबंधित अधिकाऱ्यांना त्याबाबत तत्काळ कार्यवाही करण्याचे निर्देश दिले.

यावेळी आमदार बबनराव लोणीकर, आमदार संतोष दानवे, आमदार नारायण कुचे, माजी केंद्रीय राज्य मंत्री रावसाहेब दानवे अप्पर जिल्हाधिकारी रमेश मिसाळ, बदनापुर उपविभागीय अधिकारी लता बागुल, भोकरदन उपविभागीय अधिकारी तथा सहायक जिल्हाधिकारी कार्तिक पाणिग्रही, जिल्हा अधिक्षक गहिनीनाथ कापसे यांच्यासह शेतकरी आणि ग्रामस्थांची उपस्थिती होती.

******