जालना,दि.16 (जिमाका) : मुख्य निवडणूक अधिकारी, महाराष्ट्र राज्य यांच्या मार्गदर्शनाखाली मतदार याद्यांचे विशेष सखोल पुनरीक्षण - 2026 कार्यक्रमांतर्गत प्रारूप मतदार यादी दिनांक 31 ऑगस्ट 2026 रोजी प्रसिद्ध करण्यात आली आहे. या पार्श्वभूमीवर जिल्ह्यातील सर्व नागरिकांनी प्रारूप मतदार यादीत आपले नाव आहे किंवा नाही याची तपासणी करण्याचे आवाहन जिल्हाधिकारी तथा जिल्हा निवडणूक अधिकारी आशिमा मित्तल यांनी केले आहे.
नागरिकांना आपले नाव मतदार यादीत तपासण्यासाठी electoralsearch.eci.gov.in या संकेतस्थळावर मतदार ओळखपत्र क्रमांक, वैयक्तिक माहिती किवा मोबाईल क्रमांकाच्या माध्यमातून शोध घेता येईल. तसेच voters.eci.gov.in या संकेतस्थळावर प्रारूप मतदार यादी PDF स्वरूपात उपलब्ध करून देण्यात आली आहे.
प्रारूप मतदार यादीत नाव नसल्यास नमुना क्रमांक 6 भरा. प्रारूप मतदार यादीमध्ये आपले नाव नसल्यास तसेच नवीन मतदार म्हणून नोंदणी करावयाची असल्यास नमुना क्रमांक 6 (घोषणापत्रासह) भरावा. हा अर्ज नागरिकांना voters.eci.gov.in या संकेतस्थळावर किंवा ECINET मोबाईल अॅपद्वारे ऑनलाइन करता येईल. तसेच संबंधित मतदार नोंदणी अधिकारी यांच्या कार्यालयात अथवा संबंधित BLO यांच्याकडे ऑफलाइन अर्ज सादर करता येईल,
अर्ज स्वीकारण्यासाठी विशेष मोहीम
मतदार नोंदणीचे अर्ज स्वीकारण्यासाठी विशेष मोहिमेचे आयोजन करण्यात आले असून, खालील दिवशी नागरिकांनी या संधीचा लाभ घ्यावा. सर्व मतदान केंद्रे, सर्व तहसिल कार्यालये, शाळा व कॉलेजेस येथे विशेष शिबिरांचे पुढील प्रमाणे आयोजन करण्यात आले आहे. शनिवार 19 सप्टेंबर 2026, रविवार 20 सप्टेंबर 2026,शनिवार 26 सप्टेंबर 2026,रविवार 27 सप्टेंबर 2026 या विशेष मोहिमेदरम्यान नागरिकांनी आवश्यक कागदपत्रांसह संबंधित मतदान केंद्रावर अथवा नियुक्त BLO यांच्याकडे संपर्क साधून मतदार नोंदणीसाठी अर्ज करावा.
मतदारांनी आजच आपले नाव तपासावे
मतदार यादीत नाव असणे ही मतदानाच्या अधिकाराच्या दृष्टीने अत्यंत महत्त्वाची बाब आहे. त्यामुळे प्रत्येक नागरिकाने "प्रारूप मतदार यादीत आजच आपले नाव तपासा", तसेच नाव नसल्यास विहित नमुन्यात अर्ज करून आपले नाव मतदार यादीत समाविष्ट करून घ्यावे. मतदार नोंदणी मतदार यादीतील नाव शोधणे किंवा अन्य माहितीसाठी मतदार मदत क्रमांक 1800 22 1950 वर संपर्क साधता येईल.
****
No comments:
Post a Comment