दुष्काळी परिस्थितीच्या पार्श्वभूमीवर मजुरांना गावातच तात्काळ कामे उपलब्ध करून द्यावीत-जिल्हाधिकारी आशिमा मित्तल

 

जलसंधारण व मृदसंधारणाच्या कामांना प्राधान्य; जालना जलकवच अभियान प्रभावीपणे राबविण्याचे जिल्हाधिकारी अशिमा मित्तल यांचे निर्देश

 

जालना,दि.7(जिमाका) : दुष्काळी परिस्थितीच्या पार्श्वभूमीवर कामाची मागणी करणाऱ्या प्रत्येक मजुराला तात्काळ रोजगार उपलब्ध करून द्यावा. त्यासाठी ग्रामपंचायतनिहाय पुरेशी कामे मंजूर करून कामांचा ‘शेल्फ ऑफ प्रोजेक्ट्स’ तयार ठेवावा. तसेच जलसंधारण व मृदसंधारणाची जास्तीत जास्त कामे हाती घेऊन मजुरांना त्यांच्या गावातच रोजगार उपलब्ध करून द्यावा, असे निर्देश जिल्हाधिकारी आशिमा मित्तल यांनी दिले.

जिल्हाधिकारी कार्यालयातील नियोजन भवनात (दि.6रोजी) जिल्ह्यातील सर्व गटविकास अधिकारी, तालुका कृषी अधिकारी, लागवड अधिकारी, सामाजिक वनीकरण विभागाचे अधिकारी तसेच व्ही.बी.जी. राम जी अंतर्गत कार्यरत कंत्राटी कर्मचाऱ्यांची आढावा बैठक संपन्न झाली. यावेळी बैठकीस मुख्य कार्यकारी अधिकारी डॉ. कृष्ण कांत कणवारिया, उपजिल्हाधिकारी (रोहयो) मनिषा दांडगे, उपमुख्य कार्यकारी अधिकारी डॉ. श्रीकृष्ण वेणीकर, विभागीय वन अधिकारी (सामाजिक वनीकरण) सुरेश वडोदे, जिल्हा अधीक्षक कृषी अधिकारी गहिनीनाथ कापसे यांच्यासह संबंधित अधिकारी उपस्थित होते.

ग्रामपंचायतनिहाय मजुरांच्या कामाच्या मागणीचा विचार करून आवश्यकतेनुसार जास्तीत जास्त कामे मंजूर करावीत. ‘जालना जलकवच’ अभियानांतर्गत जलतारा, शोषखड्डे, छतावरील पावसाचे पाणी जमिनीत मुरविणे, गाळ काढणे तसेच अन्य जलसंधारण व मृदसंधारणाची कामे प्राधान्याने सुरू करावीत, अशा सूचना जिल्हाधिकाऱ्यांनी दिल्या.

संभाव्य पाणीटंचाई व दुष्काळी परिस्थिती लक्षात घेऊन जलसाठे निर्माण करणे, भूजलपातळी वाढविणे आणि पावसाच्या पाण्याचे जास्तीत जास्त संधारण करण्यासाठी ग्रामपंचायत स्तरावर प्रभावी नियोजन करण्याचे निर्देश देण्यात आले. विद्यमान जलसाठ्यांमधील गाळ काढणे, आवश्यक दुरुस्ती करून साठवण क्षमता वाढविणे तसेच संभाव्य चारा टंचाईच्या पार्श्वभूमीवर योजनेअंतर्गत चारा लागवडीची कामे घेण्याच्या सूचनाही देण्यात आल्या.

काम मागणी करणाऱ्या सर्व मजुरांना विलंब न करता काम उपलब्ध करून देण्यासोबतच कामावर येणाऱ्या मजुरांची ई-केवायसी पूर्ण करून घेण्याचे निर्देशही देण्यात आले. ऑक्टोबर 2026 मध्ये होणाऱ्या ग्रामसभांमध्ये अनुज्ञेय 375 कामांची माहिती नागरिकांसमोर प्रदर्शित करून व्हीजीपीपी (Viksit Gram Panchayat Plan) आराखडा तयार करण्याच्या सूचना देण्यात आल्या. कामांना प्राधान्यक्रम ठरविताना महिला, भूमिहीन मजूर, अल्पभूधारक आणि संवेदनशील वस्त्यांतील नागरिकांचा सहभाग प्राधान्याने घ्यावा, असेही सांगण्यात आले.

प्राप्त प्रस्ताव, ग्रामपंचायतीचा नकाशा, जल अंदाजपत्रकाचा आराखडा आणि प्रत्यक्ष स्थळ पडताळणीच्या आधारे ग्रामसभा घेऊन कामांचे नियोजन करावे. आर्थिक वर्ष 2027-28 साठी व्हीजीपीपी आराखडा 2 ऑक्टोबर 2026 ते 15 जानेवारी 2027 या कालावधीत तयार करावा. 15 जानेवारीपूर्वी कामकाज व मंजुरीची प्रक्रिया पूर्ण करून युक्तधारा मालमत्ता सूची, पीआरए, गॅप असेसमेंट आणि जिओलोकेशन यांची सांगड घालत अपेक्षित मनुष्यदिवसांसह कामांचा सेल्फ तयार करून आराखडा जिल्हा कार्यालयास सादर करण्याचे निर्देश देण्यात आले.

व्हीबीजी रामजी संकेतस्थळावर ‘Secure’ प्रणालीद्वारे कामांचे अंदाजपत्रक तयार करण्याची कार्यपद्धती तसेच अधिकारी-कर्मचाऱ्यांना कामांचे मोजमाप घेण्यासाठी ई-मेजरमेंट (E-MB) नोंदणी करण्याबाबत कार्यक्रम व्यवस्थापक एस. आर. देवढे यांनी प्रात्यक्षिकाद्वारे मार्गदर्शन केले.

यावेळी बैठकीत रोजगार हमी योजना, जलसंधारणाची कामे आणि आगामी नियोजनाचा आढावा घेण्यात आला.

 

****

सेवा संकल्प अभियान : नशामुक्त भारताचा संदेश; अमृतच्या योजनांचे मार्गदर्शन

 

जालना,दि.6(जिमाका) : महाराष्ट्र संशोधन, उन्नती व प्रशिक्षण प्रबोधिनी (अमृत), महाराष्ट्र शासनाची स्वायत्त संस्था आणि नवयुग नशामुक्ती केंद्र, जालना यांच्या संयुक्त विद्यमाने राष्ट्रमाता इंदिरा गांधी महाविद्यालयात सेवा संकल्प अभियान अंतर्गत ‘अमृत संस्थेच्या योजना व नशामुक्त भारत’ या विषयावर मार्गदर्शनपर कार्यक्रम घेण्यात आला.

विद्यार्थ्यांना अमृत संस्थेच्या विविध शैक्षणिक, व्यावसायिक, कौशल्यविकास आणि रोजगारक्षम योजनांची माहिती मिळावी, तसेच नशामुक्त जीवनशैलीबाबत जनजागृती व्हावी, या उद्देशाने कार्यक्रमाचे आयोजन करण्यात आले होते. अमृत संस्थेचे जालना जिल्हा व्यवस्थापक नितीन खेकाळे यांनी विद्यार्थ्यांना संस्थेच्या विविध योजनांची माहिती दिली. शिक्षणासोबत कौशल्यविकास आणि उद्योजकतेकडे विद्यार्थ्यांनी लक्ष द्यावे, असे आवाहन त्यांनी केले. अमृतच्या योजनांचा लाभ घेऊन विद्यार्थ्यांनी आपल्या कौशल्याला योग्य दिशा द्यावी, असेही त्यांनी सांगितले.

नवयुग नशामुक्ती केंद्राचे समुपदेशक संजय थोरात यांनी ‘नशामुक्त भारत’ या विषयावर मार्गदर्शन केले. नशेमुळे आरोग्य, शिक्षण, कुटुंब आणि सामाजिक जीवनावर होणाऱ्या दुष्परिणामांची माहिती त्यांनी दिली. तरुणांनी नशेपासून दूर राहून निरोगी व सकारात्मक जीवनशैली स्वीकारावी, तसेच इतरांमध्येही नशामुक्तीबाबत जनजागृती करावी, असे आवाहन त्यांनी केले.

कार्यक्रमाच्या अध्यक्षस्थानी महाविद्यालयाच्या प्राचार्य डॉ. सुनंदा तिडके होत्या. विद्यार्थ्यांच्या सर्वांगीण विकासासाठी अशा उपक्रमांचे महत्त्व असल्याचे त्यांनी सांगितले. विद्यार्थ्यांनी शिक्षणासोबत आरोग्य, व्यक्तिमत्त्व विकास आणि करिअरकडेही लक्ष द्यावे, असे त्यांनी नमूद केले.

कार्यक्रमाचे प्रास्ताविक डॉ. विठ्ठल गाडेकर यांनी केले. सूत्रसंचालन डॉ. गोवर्धन खेडकर यांनी केले, तर आभार डॉ. दादासाहेब गिऱ्हे यांनी मानले. कार्यक्रमास महाविद्यालयातील प्राध्यापक आणि विद्यार्थी मोठ्या संख्येने उपस्थित होते.

**

मॅजिक-आयटीआय जालना इनक्युबेशन सेंटरचा प्रथम वर्धापनदिन उत्साहात

 

 

जालना,दि.6(जिमाका) : मॅजिक-आयटीआय जालना इनक्युबेशन सेंटरचा प्रथम वर्धापनदिन तसेच ‘मॅजिक आयडिया हॅकाथॉन 2026’ चा ग्रँड फायनल उत्साहात पार पडला. जिल्हाधिकारी आशिमा मित्तल यांच्या प्रमुख उपस्थितीत झालेल्या या कार्यक्रमाला व्यवसाय शिक्षण व प्रशिक्षण प्रादेशिक विभाग, छत्रपती संभाजीनगरचे सहसंचालक प्रदीप दुर्गे यांची प्रमुख उपस्थिती होती.

हॅकाथॉनमध्ये एकूण 75 प्रकल्पांमधून अंतिम फेरीसाठी निवड झालेल्या 25 प्रकल्पांचे सादरीकरण करण्यात आले. यामध्ये आयटीआय गटातून वेस्ट ऑइल कुकिंग, तर नॉन-आयटीआय गटातून ऍग्रोनोवा यांनी विजेतेपद पटकावले.

जिल्हाधिकारी आशिमा मित्तल यांनी मॅजिक-आयटीआयच्या प्रगतीचे कौतुक केले. विद्यार्थ्यांनी उपलब्ध संसाधने, मार्गदर्शन आणि प्रशिक्षणाचा अधिकाधिक लाभ घेत जालना तसेच मराठवाड्याला कौशल्य आणि नवोन्मेषाचे केंद्र बनविण्यासाठी योगदान द्यावे, असे आवाहन त्यांनी केले. मॅजिक-आयटीआय जालना इनक्युबेशन सेंटरच्या माध्यमातून आतापर्यंत 11 स्टार्टअप्स उभे राहिले असून, मॅजिकच्या एकूण परिसंस्थेत 185 स्टार्टअप्सशी संबंधित उपक्रम सुरू असल्याचे त्यांनी नमूद केले. मराठवाड्यात रोजगारनिर्मितीची मोठी गरज असून, त्यासाठी उद्योग आणि उद्योजक निर्माण करणे महत्त्वाचे असल्याचेही त्यांनी सांगितले.

व्यवसाय शिक्षण व प्रशिक्षण विभागाचे सहसंचालक प्रदीप दुर्गे यांनी विद्यार्थ्यांनी आयटीआयच्या शिक्षणाकडे केवळ नोकरी मिळविण्याचे साधन म्हणून न पाहता उद्योजकतेच्या दृष्टीने पाहावे, असे आवाहन केले. ‘नोकरी मागणारे नव्हे, नोकरी देणारे बना,’ असा संदेश त्यांनी दिला. पीएम सेतू योजनेअंतर्गत जालना आयटीआयचा क्लस्टरमध्ये सहभाग असून, त्यातून कौशल्य विकासाच्या पायाभूत सुविधांना मोठी चालना मिळणार असल्याचे त्यांनी सांगितले.

कार्यक्रमाच्या सुरुवातीला अनुज बन्सल यांनी मॅजिकतर्फे जालना व मराठवाड्यातील विद्यार्थ्यांसाठी अटल टिंकरिंग लॅब्स, क्युरिऑसिटी कॉर्नर, शॉर्ट-टर्म स्किलिंग कोर्सेस आणि मेंटरिंग अधिक व्यापक करण्याचा संकल्प व्यक्त केला. विद्यार्थ्यांना केवळ नोकरीसाठी तयार न करता ‘आयडिया टू इन्कम टॅक्स’ या संकल्पनेतून स्वतःचा व्यवसाय उभारण्यासाठी प्रोत्साहन देण्यावर भर देण्यात येणार असल्याचे त्यांनी सांगितले. मॅजिकमार्फत विविध योजनांच्या माध्यमातून विद्यार्थ्यांच्या तसेच स्टार्टअप्सच्या कल्पनांना आर्थिक सहाय्य देण्यात आले आहे.

मॅजिकचे संचालक रितेश मिश्रा यांनी विद्यार्थ्यांना मार्गदर्शन करताना ‘आयडिया टू इन्कम टॅक्स’ ही संकल्पना स्पष्ट केली. विद्यार्थ्यांनी आपल्या कल्पना मॅजिककडे मांडाव्यात आणि त्या कल्पनेचे व्यवसायात रूपांतर होईपर्यंत मार्गदर्शन, मेंटरिंग व आवश्यक सहकार्य देण्याचा मॅजिकचा प्रयत्न असल्याचे त्यांनी सांगितले. विद्यार्थ्यांसाठी प्लंबिंग, इलेक्ट्रिशियन, इंडस्ट्रियल हाऊसकीपिंग आणि वेल्डिंग या एनएसडीसी मान्यताप्राप्त चार शॉर्ट-टर्म स्किलिंग कार्यक्रमांची लवकरच सुरुवात करण्यात येणार असल्याची माहिती त्यांनी दिली.

मॅजिकचे व्यवस्थापकीय संचालक प्रसाद कोकिळ यांनी अटल टिंकरिंग लॅब्सच्या माध्यमातून शालेय विद्यार्थ्यांमध्ये लहान वयापासूनच नवोन्मेष आणि उद्योजकतेची बीजे रुजविण्याची गरज व्यक्त केली. जालना आणि छत्रपती संभाजीनगर जिल्ह्यांत सुमारे 12 अटल टिंकरिंग लॅब्स उभारण्यासाठी मॅजिकने पुढाकार घेतल्याचे त्यांनी सांगितले. तसेच मराठवाड्यातील आठ जिल्ह्यांमधील 146 अटल टिंकरिंग लॅब्सच्या समन्वयाची जबाबदारी मॅजिककडे सोपविण्यात आली असून, संबंधित लॅब्सशी संपर्क सुरू करण्यात आल्याचे त्यांनी सांगितले.

विद्यार्थ्यांनी वस्तू केवळ वापरण्याऐवजी त्या उघडून पाहाव्यात, त्यामागील तंत्रज्ञान समजून घ्यावे आणि प्रयोगातून शिकावे, यासाठी प्रत्येक अटल टिंकरिंग लॅबमध्ये ‘क्युरिऑसिटी कॉर्नर’ विकसित करण्याची संकल्पनाही त्यांनी मांडली.

कार्यक्रमाला मॅजिकचे संचालक सुनील रायथत्ता, रितेश मिश्रा, अनुज बन्सल, अतुल केसकर (जिल्हा व्यवसाय शिक्षण व प्रशिक्षण अधिकारी, जालना), अभिजीत अल्टे (प्राचार्य, औद्योगिक प्रशिक्षण संस्था, जालना), तृप्ती भोपे (उपप्राचार्य, औद्योगिक प्रशिक्षण संस्था, जालना), गणेश चिमणकर (सहाय्यक आयुक्त, कौशल्य, रोजगार, उद्योजकता व नावीन्यता विभाग, जालना) यांच्यासह मान्यवर उपस्थित होते.

कार्यक्रमाचे सूत्रसंचालन मकरंद भालेराव यांनी केले, तर आभार सीईओ मकरंद कुलकर्णी यांनी मानले. कार्यक्रमाच्या यशस्वितेसाठी राघवेंद्र कुलकर्णी, देविदास राठोड, कृष्णा शिंदे आणि आविष्कार पाटील यांनी प्रयत्न केले.

*-*-*-*-*-*-

शासकीय कामकाज, शिक्षण आणि सामाजिक जीवनात मराठी भाषेचा अधिकाधिक वापर करावा-जिल्हाधिकारी आशिमा मित्तल अभिजात मराठी भाषा दिवस सप्ताह उत्सहात साजरा

 

 

जालना,दि.5(जिमाका) : मराठी भाषेचे जतन व संवर्धन करण्यासाठी सर्वांनी प्रयत्न करणे आवश्यक असल्याचे सांगुन, दैनंदिन व्यवहार, शासकीय कामकाज, शिक्षण आणि सामाजिक जीवनात मराठी भाषेचा अधिकाधिक वापर करण्याचे आवाहन जिल्हाधिकारी आशिमा मित्तल यांनी केले.

जिल्हाधिकारी कार्यालयात आयोजित अभिजात मराठी भाषा दिवस सप्ताहच्या कार्यक्रमात त्या बोलत होत्या.  यावेळी जे.ई.एस. महाविदयालयाचे प्राध्यापक डॉ. राजेंद्र सोनवणे, निवासी उपजिल्हाधिकारी शशिकांत हदगल, उपजिल्हाधिकरी मनिषा दांडगे, तहसीदार प्रणाली तायडे यांची उपस्थिती होती.

यावेळी जिल्हाधिकारी मित्तल म्हणाल्या की, मराठी भाषेला 3 ऑक्टोबर रोजी 'अभिजात भाषा' म्हणून मान्यता देण्यात आली. हा दिवस मराठी भाषेच्या आणि संस्कृतीच्या इतिहासातील अत्यंत महत्त्वाचा आणि अभिमानाचा क्षण आहे. महाराट्रासारख्या पवित्र आणि समृध्द राज्यात आपाल जन्म झाला आहे. मराठी भाषेच्या विकासात मराठी चित्रपटांचे योगदानही मोठे असुन, यामुळे आपणांस  प्रेरणा मिळते. मी मुळची राजस्थानची आहे, परंतु माझी कर्मभूमी महाराष्ट्र असल्याने मी मराठी भाषा अधिक चांगल्याप्रकारे शिकण्याचा प्रयत्न करत आहे.

            सद्य परिस्थितीत आपणांवर दूष्काळचे सावट आहे. या कठीण परिस्थितीचा आपणां सर्वांना सामना करायाचा  आहे. यावेळी त्यांनी पाणी वाचवण्याचे आवाहन केले.

यावेळी प्रा.डॉ. सोनवणे म्हणाले की, मराठी साहित्याची परंपरा ही प्राचीन आहे. महाराष्ट्रात मराठी भाषेच्या माध्यमातून आपल्या स्वराज्य आणि  संस्कृती  विस्तार झाला आहे. मराठी भाषेचे मोठे योगदान असल्याचे सांगून, मराठी भाषेने न्याय आणि समानता प्रस्थापित करण्याकरीता मोलाचे योगदान दिले आहे. मराठी भाषेला हा गौरव मिळवून देण्यासाठी अनेक मोठे साहित्यिक, लेखक, कवी आणि असंख्य मराठी भाषिकांनी मोलाचे योगदान दिले आहे. मराठी भाषा जागतिक स्तरावर पोहोचावी, तसेच मराठीला पुढे नेणे हे आपले सर्वांचे कर्तव्य आहे, असे आवाहन त्यांनी केले.

यावेळी कार्यक्रमास भारत स्काऊट गाईड संस्थेतील विद्यार्थी-विद्यार्थीनी, प्रशिक्षक-शिक्षक यांच्यासह विविध विभागातील अधिकारी-कर्मचारी यांची उपस्थिती होती.

-*-*-*-*-*-*-

मंठा तालुक्यातील अंभोडा कदम येथे किशोरवयीन मुलींचा मेळावा उत्साहात

 

 

जालना,दि.5(जिमाका) : जिल्हा परिषद जालना यांच्या वतीने राबविण्यात येत असलेल्या ‘सेवा संकल्प अभियानांतर्गत’ मंठा तालुक्यातील अंभोडा कदम येथील जिल्हा परिषद उच्च प्राथमिक शाळा आणि आयुष्मान आरोग्य मंदिर यांच्या संयुक्त विद्यमाने किशोरी मेळाव्याचे आयोजन करण्यात आले. किशोरवयीन मुलींच्या आरोग्यविषयक समस्या, योग्य आहार, वैयक्तिक स्वच्छता तसेच किशोरावस्थेतील शारीरिक व मानसिक बदल याबाबत जागरूकता निर्माण करण्याच्या उद्देशाने या मेळाव्याचे आयोजन करण्यात आले होते.

यावेळी प्रमुख मार्गदर्शिका प्रा. चारुलता पाटील, डॉ. नागरगोजे, डी.एम. अंभोडा कदम, आरोग्य सेविका शुभांगी रतन रोटे आणि प्रा. सरवदे यांनी किशोरवयीन मुलींना आरोग्यविषयक मार्गदर्शन केले. यावेळी विद्यार्थिनींनी विविध प्रश्न विचारून मार्गदर्शकांशी संवाद साधला. कार्यक्रमास शालेय व्यवस्थापन समितीचे अध्यक्ष व सदस्य, इयत्ता पाचवी ते आठवीतील विद्यार्थिनी तसेच त्यांच्या माता मोठ्या संख्येने उपस्थित होत्या.  मेळाव्याच्या यशस्वी आयोजनासाठी अंगणवाडी सेविका व मदतनीस, आशा सेविका, शाळेचे मुख्याध्यापक आणि शिक्षकवृंद यांनी परिश्रम घेतले. किशोरवयीन मुलींच्या आरोग्याविषयी जागरूकता निर्माण करणारा हा मेळावा उत्साहपूर्ण वातावरणात संपन्न झाला.

-*-*-*-*-

जालना–वाटूर महामार्गावरील अतिक्रमणे हटविली विरेगाव, चितळपुतळी फाटा परिसरात प्रशासनाची कारवाई

 

जालना,दि.5(जिमाका) : जालना-वाटूर राष्ट्रीय महामार्गावरील विरेगाव आणि चितळपुतळी फाटा परिसरात महामार्गाच्या हद्दीत करण्यात आलेली अतिक्रमणे प्रशासनाने हटविली. मा. सर्वोच्च न्यायालयाच्या आदेशानुसार ही कारवाई करण्यात आली आहे. जिल्हाधिकारी आशिमा मित्तल आणि पोलीस अधीक्षक तेगबीर सिंह संधू यांच्या मार्गदर्शनाखाली ही अतिक्रमण मोहीम राबविण्यात आली. सार्वजनिक बांधकाम विभाग, मोजपुरी पोलीस ठाणे तसेच कल्याण टोलवेजचे अधिकारी व कर्मचारी या कारवाईत सहभागी झाले होते.

महामार्गावरील वाहतूक सुरळीत राहावी, वाहनचालक व नागरिकांची सुरक्षितता सुनिश्चित व्हावी आणि वाहतुकीस अडथळा निर्माण होऊ नये, या उद्देशाने ही अतिक्रमणे हटविण्यात आली. कारवाईपूर्वी संबंधित अतिक्रमणधारकांना नियमानुसार आवश्यक सूचना देण्यात आल्या होत्या. त्यानंतर यंत्रसामग्रीच्या सहाय्याने महामार्गाच्या हद्दीतील अतिक्रमणे हटविण्यात आली.

या कारवाईमुळे जालना–वाटूर महामार्गावरील वाहतुकीला अधिक मोकळीक मिळण्यास तसेच वाहतूक सुरक्षित आणि सुरळीत होण्यास मदत होणार आहे. महामार्गाच्या हद्दीत अनधिकृत अतिक्रमण किंवा बांधकाम करू नये आणि सार्वजनिक वाहतूक व सुरक्षिततेच्या दृष्टीने प्रशासनास सहकार्य करावे, असे आवाहन प्रशासनाच्या वतीने करण्यात आले आहे.

-*-*-*-*-*-

सेवा संकल्प अभियानातंर्गत चित्रकला स्पर्धेला विद्यार्थ्यांचा उत्स्फूर्त प्रतिसाद

 

 

जालना,दि.5(जिमाका) : शिक्षण विभाग जिल्हा परिषद जालना यांच्या वतीने सेवा संकल्प अभियानांतर्गत   जिल्ह्यात विविध उपक्रम राबविण्यात येत आहे. सेवा संकल्प अभियानांतर्गत प्राथमिक शाळा वडगाववाडी, जि.प.के.प्रा. शाळा कीर्ला, जि.प.प्रा. शाळा केदारवाकडी, जि.प.प्रा.शाळा वांजोळा आणि जि.प.प्रा. शाळा भुतेगाव येथे सेवा संकल्प अभियानांतर्गत चित्रकला स्पर्धेचे आयोजन करण्यात आले होते. विद्यार्थ्यांनी ‘विकसित भारत 2047’ या संकल्पनेवर आधारित विविध विषयावरील चित्रे रेखाटून भविष्यातील भारताचे स्वप्न आपल्या कलाकृतीतून साकारले.

      या स्पर्धांमधून विद्यार्थ्यांना देशाच्या विकासाची संकल्पना समजून घेण्याची तसेच ती चित्रांच्या माध्यमातून मांडण्याची संधी मिळाली. विद्यार्थ्यांनी भारताच्या उज्ज्वल भविष्यातील विविध पैलू चित्रांमधून साकारले. पर्यावरण, शिक्षण, विज्ञान-तंत्रज्ञान, स्वच्छता, आधुनिक भारत आणि प्रगतीशील राष्ट्र अशा विविध विषयांवर आधारीत विद्यार्थ्यांनी चित्र रेखाटल्याचे शिक्षण विभाग जिल्हा परिषद जालना यांनी कळविले आहे.

-*-*-*-*-*-