ऊसतोड कामगारांच्या समस्या जाणून घेण्यासाठी जिल्हाधिकारी आशिमा मित्तल शेतकऱ्यांच्या बांधावर सेवा संकल्प अभियानांतर्गत अंबड येथे ऊसतोड कामगारांचे शिबिर; ऊसतोड कामगारांचा सहभाग

 

 

जालना,दि.30 (जिमाका): ऊसतोड कामगारांच्या विविध समस्या जाणून घेऊन त्यांचे निराकरण करण्यासाठी अंबड महसूल उपविभागाच्या वतीने सेवा संकल्प अभियानांतर्गत ऊसतोड कामगार समस्या निराकरण व मार्गदर्शन शिबिर घेण्यात आले. जिल्हाधिकारी आशिमा मित्तल यांनी शिबिराला भेट देऊन कामगार, विद्यार्थी व शेतकऱ्यांशी संवाद साधला.

शिबिराचे प्रास्ताविक उपविभागीय अधिकारी उमाकांत पारधी यांनी केले. ऊसतोड कामगारांच्या मुलांच्या शिक्षणाचा प्रश्न, कुपोषण, महिलांचे आरोग्य, घरकुल तसेच विविध शासकीय कागदपत्रे व योजनांचा लाभ मिळविताना येणाऱ्या अडचणी त्यांनी मांडल्या. कामगारांना जातीचे दाखले, रेशन कार्ड, आधार कार्ड तसेच विविध शासकीय योजनांचा लाभ मिळवून देण्यासाठी प्रशासन प्रयत्न करीत असल्याचे पारधी यांनी यावेळी सांगितले. हे शिबिर केवळ एक दिवसापुरते मर्यादित न राहता कामगारांच्या प्रश्नांवर पुढील काळातही प्रशासनाकडून काम केले जाईल, असे त्यांनी स्पष्ट केले. ऊसतोडीसाठी जिल्ह्याबाहेर किंवा अन्य ठिकाणी स्थलांतर करण्यापूर्वी कामगारांनी जिल्हा प्रशासनाने विकसित केलेल्या ‘ऊस मित्र’ ॲपवर नोंदणी करावी, असे आवाहन करण्यात आले. तसेच, कामावर जाण्यापूर्वी संबंधित ग्रामपंचायतीमध्ये स्थलांतराची नोंद करावी, असेही सांगण्यात आले. कामगारांची नोंद प्रशासनाकडे उपलब्ध झाल्यास त्यांच्या कुटुंबीयांपर्यंत शासकीय योजना, मदत आणि आवश्यक सेवा पोहोचविणे सोपे होणार असल्याचे त्यांनी सांगितले.

यावेळी शिबिरात जिल्हाधिकारी आशिमा मित्तल यांनी ऊसतोड महिलांशी संवाद साधला. ऊसतोडीसाठी होणारे स्थलांतर कमी करण्यासाठी महिलांनी कौशल्य विकासाचे प्रशिक्षण घेऊन स्वयंरोजगार सुरू करण्याचा प्रयत्न करावा, असे आवाहन त्यांनी केले. अल्प कालावधीत मोठ्या संख्येने कामगारांना एकत्र करून शिबिराचे आयोजन केल्याबद्दल जिल्हाधिकाऱ्यांनी उपविभागीय अधिकारी उमाकांत पारधी आणि त्यांच्या पथकाचे कौतुक केले.

शिबिरानंतर जिल्हाधिकारी आशिमा मित्तल आणि उपविभागीय अधिकारी उमाकांत पारधी यांनी अंबड शहरातील ऊसतोड कामगारांच्या मुलांसाठी असलेल्या शाळा व वसतिगृहाला भेट दिली. तेथील सुमारे १०० विद्यार्थ्यांशी जिल्हाधिकाऱ्यांनी संवाद साधला. विद्यार्थ्यांच्या राहण्याची आणि जेवणाची व्यवस्था तसेच इतर सुविधांची त्यांनी पाहणी केली. विद्यार्थ्यांनी शिक्षणावर लक्ष केंद्रित करून पुढे जाण्याचे आवाहन त्यांनी केले.

राष्ट्रपती पुरस्कारप्राप्त आदर्श शिक्षिका डॉ. कविता गित्ते यांनी ऊसतोड कामगारांच्या मुलांच्या शिक्षणाबाबत मार्गदर्शन केले. स्थलांतरामुळे मुलांचे शिक्षण प्रभावित होऊ नये, यासाठी पालकांनी विशेष लक्ष देण्याचे आवाहन करण्यात आले.

शिबिरानंतर जिल्हाधिकारी मित्तल यांनी अंबड तालुक्यातील धनगर पिंप्री शिवाराला भेट देऊन पिकांच्या नुकसानीची पाहणी केली. पावसाअभावी तालुक्यात निर्माण झालेल्या परिस्थितीचा त्यांनी आढावा घेतला. शेताच्या बांधावर जाऊन त्यांनी सोयाबीन, कापूस आणि इतर पिकांची पाहणी केली. यावेळी शेतकऱ्यांनी पिकांचे नुकसान, चारा टंचाई आणि पाणीटंचाईच्या समस्या जिल्हाधिकाऱ्यांसमोर मांडल्या. आगामी काळातील पिण्याच्या पाण्याच्या उपलब्धतेबाबतही ग्रामस्थांशी चर्चा करण्यात आली.

पिकांचे नुकसान झाले असले तरी शेतकऱ्यांनी खचून जाऊ नये, असे आवाहन जिल्हाधिकारी मित्तल यांनी यावेळी केले. पिकांच्या नुकसानीचे पंचनामे तातडीने करण्याच्या सूचना प्रशासनाला देण्यात आल्याचे त्यांनी सांगितले. संकटाच्या काळात प्रशासन शेतकऱ्यांच्या पाठीशी आहे. कोणत्याही शेतकऱ्याने आत्महत्येसारखे टोकाचे पाऊल उचलू नये, असे आवाहन त्यांनी केले.

अंबड येथील स्थानिक कार्यालयात झालेल्या या शिबिराला दीड ते दोन हजार ऊसतोड कामगार उपस्थित होते. शिबिराच्या आयोजनासाठी अंबडचे तहसीलदार सोमेश मोहिते आणि घनसावंगीचे तहसीलदार रमेश पागोटे यांनी विशेष परिश्रम घेतले. अखिल भारतीय शबरी माता संघटनेचे दीपक बर्डे, गजानन बर्डे, भाऊसाहेब बर्डे, हरीशभाऊ राठोड तसेच अंबड तालुक्यातील बाजिंदर मोरे यांनीही आयोजनात सहभाग घेतला.

शिबिराला विविध संघटनांचे पदाधिकारी तसेच जिल्हा व तालुकास्तरीय विभागाचे अधिकारी उपस्थित होते. ऊसतोड कामगारांच्या समस्या, त्यांच्या मुलांचे शिक्षण आणि दुष्काळग्रस्त शेतकऱ्यांच्या अडचणी याबाबत प्रशासनाने एकाच दिवशी प्रत्यक्ष पाहणी करून संबंधितांशी संवाद साधला.

-*-*-*-*-

संकल्प अभियान’ अंतर्गत योग व ध्यान शिबिर उत्साहात

 

जालना,दि.30 (जिमाका) :   जिल्ह्यात सेवा, समर्पण आणि समाजकल्याणाचा संदेश जनसामान्यांपर्यंत पोहोचविण्याच्या उद्देशाने ‘सेवा संकल्प अभियान’ राबविण्यात येत आहे. या सेवा संकल्प अभियानाच्या अनुषंगाने जिल्हा प्रशासन जालना यांच्या वतीने जिल्हाधिकारी कार्यालाय येथे योग व ध्यान शिबिर आज (दि.30) रोजी उत्साहात पार पडले. या उपक्रमात निरोगी आरोग्यासाठी योग आणि ध्यान याचे दैनंदिन जीवनातील मार्गदर्शन करुन प्रात्यक्षिक करण्यात आले.

या योग व ध्यान शिबिराचे अप्पर जिल्हाधिकारी रमेश मिसाळ यांच्या हस्ते उद्घाटन करण्यात आले. यावेळी निवासी उपजिल्हाधिकारी शशिकांत हदगल, उपजिल्हाधिकारी मनिषा दांडगे, उपजिल्हाधिकारी मनिषा देशपांडे, उपजिल्हाधिकारी सुकेशिनी पगारे, पतंजली योग समितीचे योगसाधक प्रल्हाद हरबक यांच्यासह जिल्हा प्रशासनातील अधिकारी व कर्मचारी, विविध कार्यालयांतील कर्मचारी, मोठ्या संख्येने उपस्थित राहून उत्स्फूर्त सहभाग नोंदविला.

योगसाधक प्रल्हाद हरबक यांनी योग व ध्यान ही केवळ व्यायामाची पद्धत नसून निरोगी, शिस्तबद्ध आणि सकारात्मक जीवन जगण्याची संस्कृती असल्याचे सांगत, दैनंदिन जीवनात योग व ध्यानाचा अंगीकार करून निरोगी समाजनिर्मितीस हातभार लावावा असे मार्गदर्शन केले.

शिबिराच्या प्रारंभी उपस्थितांना योगाचे शारीरिक व मानसिक आरोग्यासाठी असलेले महत्त्व समजावून सांगण्यात आले. योग प्रशिक्षकांनी सहभागींकडून विविध योगासने, प्राणायाम आणि ध्यानाच्या पद्धती करून घेतल्या. योग व ध्यानाच्या माध्यमातून निरोगी शरीर, प्रसन्न मन आणि सकारात्मक जीवनशैलीचा संदेश पोहोचविण्यात आला.

 

****

मंठा नगर पंचायत मध्ये आरोग्य तपासणी शिबिर संपन्न

 

 

जालना,दि.30(जिमाका): स्वच्छता ही सेवा २०२६ व सेवा संकल्प अभियानांतर्गत मंठा नगर पंचायत यांच्या वतीने शहरातील सफाई मित्रांच्या आरोग्याची काळजी घेत विशेष आरोग्य तपासणी शिबिराचे आयोजन करण्यात आले. शहराची स्वच्छता राखण्यासाठी दररोज महत्त्वाची भूमिका बजावणाऱ्या सफाई मित्रांच्या आरोग्याची नियमित तपासणी व्हावी, या उद्देशाने या शिबिराचे आयोजन करण्यात आले होते.

या शिबिरात सफाई मित्रांची सर्वसाधारण आरोग्य तपासणी करण्यात आली. यामध्ये रक्तदाब, रक्तातील साखर, वजन तसेच इतर आवश्यक आरोग्य तपासण्या करण्यात आल्या. आरोग्याशी संबंधित काही तक्रारी आढळून आल्यास संबंधितांना डॉक्टरांकडून आवश्यक मार्गदर्शन करण्यात आले. तसेच दैनंदिन कामकाजात आरोग्याची काळजी कशी घ्यावी, स्वच्छता काम करताना कोणती खबरदारी घ्यावी, याबाबतही आरोग्य कर्मचाऱ्यांनी मार्गदर्शन केले.

सफाई मित्र हे शहरातील स्वच्छता व्यवस्थेचा महत्त्वाचा भाग आहेत. नागरिकांच्या आरोग्याच्या दृष्टीने स्वच्छता राखण्याचे काम ते नियमितपणे करीत असतात. कचरा संकलन, रस्ते व सार्वजनिक ठिकाणांची स्वच्छता यासारखी विविध कामे करताना त्यांना अनेकदा प्रतिकूल परिस्थितीत काम करावे लागते. त्यामुळे त्यांच्या आरोग्याकडे विशेष लक्ष देणे आवश्यक आहे. या पार्श्वभूमीवर आयोजित करण्यात आलेल्या आरोग्य तपासणी शिबिरामुळे सफाई मित्रांना आरोग्यविषयक तपासणी व मार्गदर्शनाचा लाभ मिळाला. सफाई मित्रांनीही आरोग्य तपासणी शिबिरास उत्स्फूर्त प्रतिसाद दिला.

****

 

जालना जिल्ह्यात ‘सेवा संकल्प अभियान’तून आरोग्य जनजागृती शाळांमध्ये लसीकरण, गर्भवतींचे समुपदेशन; एचपीव्ही लसीकरणाबाबत विद्यार्थ्यांना मार्गदर्शन

 

 

जालना,दि.30(जिमाका): सार्वजनिक आरोग्य विभाग, जिल्हा परिषद जालना यांच्या वतीने ‘सेवा संकल्प अभियान’अंतर्गत जालना जिल्ह्यात विविध आरोग्यविषयक उपक्रम राबविण्यात येत आहेत. या अभियानाच्या माध्यमातून आरोग्य, लसीकरण, मातृ आरोग्य, पोषण तसेच गर्भाशयाच्या मुखाच्या कर्करोगाबाबत नागरिक आणि विद्यार्थ्यांमध्ये जनजागृती करण्यात येत आहे. जिल्ह्यात 17 सप्टेंबर ते 17 ऑक्टोबर २०२६ या कालावधीत ‘सेवा संकल्प अभियान’ राबविण्यात येत असून, त्याअंतर्गत जिल्ह्यात विविध आरोग्य विषयक उपक्रम घेण्यात येत आहेत. त्याचाच एक भाग म्हणून जिल्ह्यात शाळा तसेच आरोग्य केंद्रांमध्ये विविध कार्यक्रमांचे आयोजन करण्यात आले होते.

दासला येथे वैद्यकीय अधिकारी डॉ. हिना नवाब आणि डॉ. बिलाल यांच्या मार्गदर्शनाखाली विद्यार्थ्यांचे लसीकरण करण्यात आले. या उपक्रमात पाचवी ते दहावीच्या विद्यार्थ्यांना टीडी (Td) लस देण्यात आली. यामध्ये ८४ मुला-मुलींना टीडी लसीचा लाभ मिळाला. किशोरवयीन विद्यार्थ्यांना आवश्यक लसीकरण करून घेण्याबाबत यावेळी मार्गदर्शन करण्यात आले.

तसेच सावंगी येथील एएनसी (ANC) क्लिनिकमध्ये गर्भवती महिलांची तपासणी व आरोग्यविषयक मार्गदर्शन करण्यात आले. गर्भावस्थेतील महिलांना सकस आहार, पौष्टिक अन्न, आरोग्य व स्वच्छता याबाबत माहिती देण्यात आली. तसेच गर्भावस्थेत तंबाखूजन्य पदार्थांपासून दूर राहण्याचे महत्त्व समजावून सांगण्यात आले.  ग्रामीण आणि दुर्गम भागातील गर्भवती महिलांना आरोग्य सेवा सहज उपलब्ध होण्यासाठी अशा आरोग्यविषयक उपक्रमांचा उपयोग होत आहे.

            प्राथमिक आरोग्य केंद्र कुंभारझरी अंतर्गत येणाऱ्या जिल्हा परिषद शाळा अंबा येथे एचपीव्ही (HPV) लसीकरणाबाबत माहिती व जनजागृती कार्यक्रम घेण्यात आला. या वेळी विद्यार्थ्यांना एचपीव्ही विषाणूमुळे होणारे आजार, गर्भाशयाच्या मुखाचा कर्करोग आणि त्याच्या प्रतिबंधासाठी एचपीव्ही लसीचे महत्त्व याबाबत माहिती देण्यात आली.

गर्भाशयाच्या मुखाच्या कर्करोगाविषयी असलेले गैरसमज दूर करून ‘प्रतिबंध हाच उपचारापेक्षा उत्तम मार्ग’ हा संदेश विद्यार्थ्यांपर्यंत पोहोचविण्यात आला. कर्करोगाच्या प्रतिबंधासाठी आवश्यक असलेल्या उपाययोजनांची माहिती देत आरोग्यविषयक जागरूकता निर्माण करण्यात आली.

 ‘सेवा संकल्प अभियान’च्या माध्यमातून केवळ उपचारांवर भर न देता प्रतिबंधात्मक आरोग्यसेवा आणि जनजागृती यांना प्राधान्य दिले जात आहे. शाळांमधील विद्यार्थ्यांचे लसीकरण, किशोरवयीन मुला-मुलींमध्ये आरोग्यविषयक जागरूकता, गर्भवती महिलांचे समुपदेशन आणि कर्करोग प्रतिबंधाबाबत माहिती अशा विविध उपक्रमांमुळे ग्रामीण भागातील आरोग्यविषयक जागरूकता होत आहे.

****

जालना जिल्ह्यात चारा वाहतुक व विक्रीस बंदी हिरवा चारा, कडबा, कुट्टी, पेंढा, टीएमआरसह पशुखाद्याच्या वाहतुकीवर निर्बंध; जिल्हाधिकाऱ्यांचे आदेश

 

 

जालना,दि.30(जिमाका): जिल्ह्यातील सर्व आठ तालुक्यांत ‘ट्रिगर-१’ (प्रथम टप्पा) दुष्काळ जाहीर करण्यात आला आहे. या पार्श्वभूमीवर जिल्ह्यात उपलब्ध असलेला चारा बाहेर जाण्यापासून रोखण्यासाठी जिल्हा प्रशासनाने महत्त्वाचा निर्णय घेतला आहे. जालना जिल्ह्याच्या हद्दीतून अन्य जिल्ह्यात किंवा राज्याबाहेर कोणत्याही प्रकारचा सुका अथवा ओला चारा वाहतूक करून नेण्यास तसेच विक्री करण्यास बंदी घालण्यात आली आहे.

जिल्हाधिकारी आशिमा मित्तल यांनी भारतीय नागरिक सुरक्षा संहिता, २०२३ (BNSS) मधील कलम १६३ अन्वये याबाबत आदेश काढला आहे. हा आदेश ३० सप्टेंबर २०२६ रोजी रात्री १२.०१ वाजल्यापासून पुढील आदेश होईपर्यंत लागू राहणार आहे.

जिल्ह्यातील दुष्काळी परिस्थितीचा विचार करता स्थानिक पातळीवर उपलब्ध असलेला चारा मोठ्या प्रमाणावर इतर जिल्ह्यांत किंवा सीमावर्ती भागात विक्रीसाठी पाठविला जाऊ शकतो. त्यामुळे जालना जिल्ह्यातील पशुधनासाठी चाऱ्याची उपलब्धता कमी होऊन चारा टंचाई निर्माण होण्याची शक्यता आहे. या परिस्थितीत पशुधनाच्या जीविताला धोका निर्माण होण्याबरोबरच त्यातून कायदा व सुव्यवस्थेचा प्रश्न निर्माण होऊ शकतो. त्यामुळे चाऱ्याची वाहतूक रोखण्याचा निर्णय घेण्यात आला आहे.

या आदेशानुसार हिरवा चारा, कडबा, कोणत्याही प्रकारची कुट्टी, पेंढा, टीएमआर व इतर प्रकारचे पशुखाद्य जिल्ह्याबाहेर नेता येणार नाही. या वस्तूंची जालना जिल्ह्याच्या हद्दीतून अन्य जिल्ह्यात किंवा राज्याबाहेर वाहतूक करण्यास आणि विक्री करण्यास प्रतिबंध करण्यात आला आहे.

शासकीय योजना, पशुसंवर्धन विभाग किंवा जिल्हा प्रशासनाने अधिकृत मंजुरी दिलेल्या चारा वाहतुकीला मात्र हा आदेश लागू राहणार नाही. संबंधित विभागाची अधिकृत परवानगी असल्यास अशा वाहतुकीस नियमांनुसार मुभा राहणार आहे. या आदेशाचे उल्लंघन करणाऱ्या व्यक्तींवर भारतीय न्याय संहिता, २०२३ मधील कलम २२३ नुसार कायदेशीर कारवाई करण्यात येणार आहे. त्यामुळे जिल्ह्यातून चारा बाहेर नेताना संबंधितांनी प्रशासनाच्या आदेशाचे पालन करणे आवश्यक आहे.

महाराष्ट्र शासनाच्या मदत व पुनर्वसन विभागाच्या शासन निर्णयानुसार जालना जिल्ह्यातील सर्व आठ तालुक्यांत ट्रिगर-१ (प्रथम टप्पा) दुष्काळ घोषित करण्यात आला आहे. सदर कालावधीत पशुधनासाठी चारा यांची उपलब्धता महत्त्वाची ठरते. या पार्श्वभूमीवर जिल्ह्यात उत्पादित होणारा चारा जिल्ह्यातच उपलब्ध राहावा आणि स्थानिक पशुधनाला चारा मिळण्यात अडचण निर्माण होऊ नये, यासाठी प्रशासनाने हा निर्बंध लागू केला असल्याचे जिल्हाधिकारी आशिमा मित्तल यांनी आदेशान्वये कळविले आहे.

****

वीजग्राहकांसाठी ‘सेवा सेतू’व ‘सेवा संकल्प अभियानाला प्रारंभ महावितरणचा प्रत्येक तालुक्यात विशेष सेवा कक्ष

 

जालना,दि.30(जिमाका): वीजग्राहकांना अधिक वेगवान आणि सुलभ सेवा देण्यासाठी जालना जिल्ह्यातील प्रत्येक तालुक्यात महावितरणकडून ‘सेवा सेतू’आणि ‘सेवा संकल्प अभियान’सुरू करण्यात आले आहे.

            सेवा संकल्प अभियान अंतर्गत जालना जिल्ह्यातील प्रत्येक तालुक्यात विशेष सेवा कक्ष सुरू करण्यात आले आहेत. पीएम सूर्यघर मोफत वीज योजना, स्वयंपूर्ण महाराष्ट्र आवासीय रूफटॉप सोलर (स्मार्ट) योजना, मागेल त्याला सौर कृषी पंप योजना ​आणि मुख्यमंत्री सौर कृषी वाहिनी योजना २.० या अंतर्गत जागेवरच ऑनलाईन अर्ज नोंदणी, योजनेचे आर्थिक फायदे व सौर संच बसविण्याची प्रक्रिया याबाबत मार्गदर्शन करण्यात येत आहे. योजनेसाठी आवश्यक कागदपत्रे, कर्जाची सुविधा, अंदाजित खर्च यासाठी स्थानिक बँक प्रतिनिधी आणि निवडसूचीवरील सौर कंत्राटदार प्रतिनिधींशी थेट संपर्क व समन्वय करण्यात येत आहे. कर्जाची देखील सुविधा उपलब्ध होत आहे. यासह सौर योजनांची माहिती देण्यासाठी प्रत्येक तालुक्यात स्वतंत्र नोडल अधिकारी नियुक्त करण्यात आले आहे. तसेच त्रुटींची पुर्तता करून प्रलंबित अर्जांवर त्वरित कार्यवाही करण्यात येत आहे.

            या सेवा सेतू अभियानात नवीन घरगुती वीजजोडणी देणे, नादुरुस्त रोहित्र विनाविलंब बदलून देणे, वीज बिलावरील नावात बदल करणे, मंजूर भार बदलणे, बिलिंगविषयक तक्रारींचे निवारण करणे, प्रलंबित तक्रारींचे निवारण तसेच विद्युत सुरक्षेसाठी वीज यंत्रणेमध्ये आवश्यकतेनुसार स्पेसर बसवणे, इतर तांत्रिक उपाययोजना, वीजयंत्रणेची देखभाल व दुरुस्ती आदींना वेग देण्याचे निर्देश क्षेत्रीय कार्यालयांना देण्यात आले. सेवा सेतू व सेवा संकल्प अभियानात एकाच छत्राखाली उपलब्ध सर्व सेवा व सुविधांचा लाभ घ्यावा असे आवाहन महावितरणकडून करण्यात आले आहे.

 

****

 

निवडणूक आचारसंहितेमुळे जिल्हास्तरीय लोकशाही दिनाचे आयोजन स्थगित

 

जालना : महाराष्ट्र विधान परिषदेच्या ०३ पदवीधर व ०२ शिक्षक मतदारसंघातील रिक्त होणाऱ्या जागांसाठी भारत निवडणूक आयोगाने निवडणूक कार्यक्रम जाहीर केला आहे. या निवडणुकीची प्रक्रिया पूर्ण होईपर्यंत, म्हणजेच ६ डिसेंबर २०२६ पर्यंत निवडणूक आचारसंहिता लागू राहणार असल्याचे निर्देश देण्यात आले आहेत.

या पार्श्वभूमीवर आचारसंहिता कालावधीत जिल्हास्तरीय लोकशाही दिनाचे आयोजन करण्याबाबत जालना जिल्हा प्रशासनाने माहिती दिली आहे. निवडणूक प्रक्रियेच्या कालावधीत दर महिन्याच्या पहिल्या सोमवारी आयोजित करण्यात येणारा जिल्हास्तरीय लोकशाही दिन आयोजित करण्यात येणार नसल्याचे निवासी उपजिल्हाधिकारी जालना यांनी पत्राद्वारे कळविले आहे.

-*-*-*-*-