ध्वजदिन निधीस सढळ हस्ते मदत करा - अपर जिल्हाधिकारी प्रकाश खपले

            जालना, दि. 13 - देशाच्या रक्षणासाठी जवान आपल्या प्राणांची बाजी लावून सिमेवर लढत असतात. त्यांच्या त्याग व बलिदानामुळेच आपण सुरक्षित आहोत. जवानांच्या कुटूंबियांच्या व निवृत्त सैनिकांच्या पूनर्वसनासाठी ध्वजदिन निधीतून कल्याणकारी योजना राबविण्यात येत असल्याने या ध्वजदिन निधीस सर्वांनी सढळ हाताने मदत करावी, असे आवाहन अपर जिल्हाधिकारी प्रकाश खपले यांनी केले.

            जिल्हा सैनिक कल्याण कार्यालयाच्या वतीने महासैनिक लॉन, जालना येथे आयोजित ध्वजदिन निधी संकलनाचा अपर जिल्हाधिकारी श्री खपले यांच्या हस्ते शुभारंभ करण्यात आला. त्याप्रसंगी उपस्थितांना मार्गदर्शन करताना जिल्हाधिकारी बोलत होते.

            यावेळी व्यासपीठावर जिल्हा सैनिक कल्याण अधिकारी स.ह. केंजळे, पोलीस निरीक्षक राजेंद्रसिह गौर, सेवानिवृत्त कर्नल ए.एस. पवार, जिल्हा शल्य चिकित्सक डॉ. एम.के. राठोड आदींची उपस्थिती होती.

            अपर जिल्हाधिकारी श्री खपले म्हणाले की, ध्वजदिन निधीच्या माध्यमातून माजी सैनिक तसेच त्यांच्या अवलंबितांसाठी कल्याणकारी योजना राबविण्यात येतात.  सैनिकांप्रती ऋण व्यक्‍त करण्याची संधी ध्वजदिन निधीच्या माध्यमातून सर्वसामान्यांना होत असल्याने नागरिकांनी या निधीस अधिकाधिक मदत करावी.  या वर्षात जिल्ह्याला देण्यात आलेले ध्वजदिन निधीचे उद्दिष्ट पूर्ण झाले असल्याचे सांगत पुढील वर्षामध्ये उद्दिष्टापेक्षा अधिक प्रमाणात ध्वजदिन निधी संकलित करण्यात येईल, असेही अपर जिल्हाधिकारी श्री खपले यांनी यावेळी सांगितले.

            कार्यक्रमाच्या प्रास्ताविकात जिल्हासैनिक कल्याण अधिकारी स.ह. केंजळे यांनी  ध्वजदिन निधी संकलनाचे महत्तव विषद करत जालना जिल्हा ध्वजदिन निधी संकलनामध्ये अग्रेसर असुन जिल्ह्यातील 68 शासकीय कार्यालयाने निधी संकलनामध्ये मदत करतात.  गतवर्षी पोलीस विभागाने सर्वाधिक निधी संकलन केले असल्याचे सांगत जिल्हा सैनिक कल्याण कार्यालयामार्फत माजी सैनिकांसाठी करण्यात येणाऱ्या विविध कल्याणकारी योजनांची माहिती दिली.

            या कार्यक्रमात ऑपरेशन मेघदुतमध्ये शहिद झालेले सुरेश केशवराव कदम यांचे वीरपिता केशवराव कदम तसेच ऑपरेशन रक्षकमध्ये शहिद झालेले पंडितराव लहाने यांच्या वीरपत्नी श्रीमती लिलाबाई लहाने यांचा मान्यवरांच्या हस्ते शाल, श्रीफळ देऊन सन्मान करण्यात आला.   तसेच माजी सैनिकांच्या पाल्यांच्या शैक्षणिक खर्चाच्या प्रतिपूर्तीचे धनादेशही मान्यवरांच्या हस्ते वाटप करण्यात आले. ध्वजदिन संकलनाचे उत्कृष्ट कार्य केल्याबद्दल विविध कार्यालय प्रमुखांचाही मान्यवरांच्या हस्ते भेटवस्तु देऊन सत्कार करण्यात आला.

            सर्वप्रथम  मान्यवरांनी शहिद जवानांच्या प्रतिमेस पुष्पहार अर्पण करुन अभिवादन केले.

            या कार्यक्रमास जिल्हा सैनिक कल्याण कार्यालयातील वरिष्ठ लिपीक विनायक अनाळकर, लिपीक तुकाराम काकडे, कल्याण संघटक सिताराम सोनुने, विनायक केंद्रे, शेख युनुस शेख गुल्जार, सुभाष रगडे, साहेबराव तोरमल यांच्यासह जिल्ह्यातील माजी सैनिक, वीरमाता, वीरपत्नी, सैनिकांचे कुटूंबिय, अधिकारी-कर्मचारी सैनिकी शाळेचे विद्यार्थी, नागरिक उपस्थित होते

कुस्तीस्पर्धा यशस्वीरित्या पार पाडण्यासाठी सर्वांनी एकत्रितपणे व समन्वयाने काम करावे -- राज्यमंत्री अर्जुनराव खोतकर यांचे निर्देश

        जालना, दि. 13 – महाराष्ट्र राज्य कुस्तिगीर परिषदेच्या मान्यतेने व जिल्हा राष्ट्रीय तालीम संघ तसेच राज्यमंत्री अर्जुनराव खोतकर यांच्या पुढाकाराने 62 वी वरिष्ठ राज्य अजिंक्यपद कुस्ती स्पर्धा व “महाराष्ट्र केसरी” कुस्ती स्पर्धेचे दिनांक 19 ते 23 डिसेंबर 2018 दरम्यान जालना शहरातील आझाद मैदानावर आयोजन करण्यात आलेले असुन ही स्पर्धा यशस्वीरित्या पार पाडण्यासाठी सर्वांनी एकत्रितपणे व समन्वयाने काम करण्याचे निर्देश राज्याचे पशुसंवर्धन, मस्त्यव्यवसाय, दुग्धविकास व वस्त्रोद्योग राज्यमंत्री अर्जुनराव खोतकर यांनी दिले.

            62 वी वरिष्ठ राज्य अजिंक्यपद कुस्ती स्पर्धा व “महाराष्ट्र केसरी” कुस्ती स्पर्धेच्या अनुषंगाने जिल्हाधिकारी कार्यालयात पूर्वतयारी आढावा बैठकीचे आयोजन करण्यात आले होते.  त्याप्रसंगी उपस्थित अधिकारी व पदाधिकाऱ्यांशी संवाद साधताना ते बोलत होते.

            यावेळी जिल्हा परिषदेचे अध्यक्ष अनिरुद्ध खोतकर, भास्कर आंबेकर, अभिमन्यू खोतकर, जिल्हाधिकारी रवींद्र बिनवडे, जिल्हा पोलीस अधीक्षक एस. चैतन्या, तालीम संघाचे अध्यक्ष किसनलाल भगत, सचिव प्रा. डॉ. दयानंद भक्त, उपाध्यक्ष लक्ष्मणराव सुपाटकर, पांडूरंग डोंगरे, प्राचार्य भागवतराव कटारे, विष्णु पाचफुले, आत्मनंद भगत, गोपाळ काबलिय, सुशिल भावसार, अंकुश पाचफुले, विकास क्षीरसागर, विक्रम कुसूंदल आदींची प्रामुख्याने उपस्थिती होती.

            राज्यमंत्री श्री खोतकर म्हणाले की, या स्पर्धेत संपुर्ण महाराष्ट्रातील जिल्हयातील व महानगर पालीका क्षेत्रातील एकुण 45 संघासह 900 कुस्तिगीर, 100 संघ व्यवस्थापक व मार्गदर्शक, 125 तांत्रिक अधिकारी ( पंच), महाराष्ट्र राज्य कुस्तिगीर परिषदेचे 90 पदाधिकारी व प्रतिनिधी, 40 महाराष्ट्र तसेच भारतातील प्रसिध्द कुस्तीपटु, 2 भारतीय कुस्ती संघ निरीक्षक, 2 भारतीय शैली कुस्ती संघ निरीक्षक, महाराष्ट्र ऑलम्पीक निरीक्षक असे एकुण 1260 मल्ल व अधिकारी या स्पर्धेमध्ये सहभागी होणार असुन जवळपास 80 ते 90 हजार प्रेक्षक याप्रसंगी उपस्थित राहणार आहेत. या स्पर्धेदरम्यान कायदा व सुव्यवस्था आबाधित राहून स्पर्धा यशस्वीरित्या पार पाडण्यासाठी चोख पोलीस बंदोबस्त ठेवण्यात यावा.  आवश्यकता भासल्यास अतिरिक्त पोलीस मनुष्यबळ उपलब्ध करुन घेण्यात यावे.  स्पर्धेदरम्यान मैदान व परिसरात स्वच्छता राहील यासाठी नगरपालिकेने योग्य ती व्यवस्था करण्याबरोबरच स्पर्धेदरम्यान मोठ्या संख्येने जनसमुदाय उपस्थित राहणार असल्याचे मोबाईल शौचालये या परिसरात उपलब्ध करण्याबरोबरच पुरेशा प्रमाणात स्वच्छ व शुद्ध पिण्याच्या पाण्याची व्यवस्थाही करण्यात यावी. त्याचप्रमाणे या स्पर्धा सकाळी व संध्याकाळच्या वेळेस असल्याने संध्याकाळी वीज पुरवठा अखंडित रहावा यासाठी विद्युत विभागाने योग्य ती दक्षता घेण्याचे निर्देशही राज्यमंत्री श्री खोतकर यांनी यावेळी दिले.

            स्पर्धेदरम्यान कुस्तीगीरांना काही दुखापत झाल्यास त्यांच्यावर प्रथमोपचार करण्यासाठी तज्ज्ञ अशा डॉक्टरांची टीम उपलब्ध ठेवण्याबरोबरच रुग्णवाहिकाही उपलब्ध करुन ठेवण्याच्या सुचनाही राज्यमंत्री श्री खोतकर यांनी यावेळी केल्या.

            या बैठकीस जिल्हा शल्य चिकित्सक डॉ. एम.के. राठोड, नगरपालिकेचे मुख्याधिकारी संतोष खांडेकर, जिल्हा क्रीडा अधिकारी श्रीमती प्रमोदिनी अमृतवाड यांच्यासह पोलीस व सर्व संबंधित विभागाचे प्रमुख अधिकारी उपस्थित होते.

जिल्ह्यातील दुष्काळी परिस्थितीची केंद्रीय पथकाकडून पहाणी शेतकऱ्यांशी संवाद साधुन घेतली पीकपरिस्थितीची माहिती

            जालना दि. 5 -  जिल्ह्यात गेल्या अनेक दिवसापासुन पावसाने दडी मारल्याने निर्माण झालेल्या परिस्थितीची पहाणी केंद्रीय पथकाने आज दि. 5 डिसेंबर रोजी बदनापुर व जालना तालुक्यातील गावांना भेटी देऊन केली व उपस्थित शेतकऱ्यांशी संवाद साधुन पीकपरिस्थितीची माहिती घेतली.

            केंद्र शासनाच्या या पथकामध्ये निती आयोगाचे सहसल्लागार मानश चौधरी, पाणी पुरवठा व स्वच्छता मंत्रालयाचे एस.सी.शर्मा, यांचा समावेश होता तर पहाणी दरम्यान पथकासमवेत जलसंधारण विभाग (वाल्मी) औरंगाबादचे आयुक्त दीपक सिंघला अपर आयुक्त शिवानंद टाकसाळे, आमदार नारायण कुचे, जिल्हा परिषदेचे अध्यक्ष अनिरुद्ध खोतकर, जिल्हाधिकारी रवींद्र बिनवडे, जिल्हा परिषदेच्या मुख्य कार्यकारी अधिकारी निमा अरोरा, उप विभागीय अधिकारी केशव नेटके, जिल्हा अधीक्षक कृषी अधिकारी विजय माईनकर, तहसिलदार बिपीन पाटील, बदनापुरच्या तहसिलदार श्रीमती छाया पवार आदींची उपस्थिती होती.

            सर्वप्रथम पथकाने बदनापुर तालुक्यातील जवसगाव या गावाला भेट देत या गावातील शेतकरी श्रीमती सुवर्णा सुखदेव अंभोरे यांच्या शेतामधील कापूस पिकाची पहाणी केली. तद्नंतर जालना तालुक्यातील बेथलम या गावातील शेतकरी प्रकाश जयसिंग निर्मल यांच्या शेतातील ज्वारी पीकाची पहाणी केली.

            यावेळी पथकातील सदस्यांनी उपस्थित शेतकऱ्यांशी संवाद साधत किती दिवसापासुन पाऊस नाही, पीकाची पेरणी कधी केली, गतवर्षात किती उत्पन्न मिळाले होते, यावर्षी किती उत्पन्न अपेक्षित आहे, पीकविमा भरला होता काय तसेच बँकेकडून पीकांच्या लागवडी कर्ज घेतले होते काय आदी माहिती विचारली.  तसेच आमदार नारायण कुचे, जिल्हा परिषदेचे अध्यक्ष अनिरुद्ध खोतकर यांनीही पीक परिस्थितीबाबत पथकाला माहिती दिली.

            यावेळी जिल्हाधिकारी रवींद्र बिनवडे यांनी जिल्ह्यातील पाणी पुरवठा, टंचाईच्या अनुषंगाने करण्यात आलेल्या उपाययोजना, टंचाई आराखडा, रोहयोच्या माध्यमातुन मजुरांना काम यासह दुष्काळी परिस्थितीच्या अनुषंगाने केंद्रीय पथकाला माहिती दिली.             पथकाने भेट दिलेल्या दोनही गावात शेतकऱ्यांची मोठ्या संख्येने उपस्थिती होती.

*******

गोवर-रुबेला लसीकरण मोहिमेचा जिल्हाधिकाऱ्यांच्या हस्ते शुभारंभ कु. ओवी बिनवडेस लस टोचून मोहिमेचा शुभारंभ नागरिकांनी पाल्यांना गोवर-रुबेलाची लस टोचून घ्यावी - जिल्हाधिकारी रवींद्र बिनवडे यांचे आवाहन

            जालना, दि. 27 :- गोवर आणि रुबेला या आजारांचे समूळ उच्चाटन करण्यासाठी आरोग्य विभागामार्फत राबविण्यात येणाऱ्या लसीकरण मोहिमेचा जिल्हास्तरीय शुभारंभ जिल्हाधिकारी रवींद्र बिनवडे यांच्या उपस्थितीत कु. ओवी बिनवडे हिस लस टोचून  येथील फँटसी किड्स झोन या शाळेत मोहिमेचा शुभारंभ  करण्यात आला.

        यावेळी जिल्हा परिषदेचे उपाध्यक्ष सतीष टोपे, पंचायत समितीचे सभापती पांडूरंग डोगंरे,  जिल्हा परिषदेच्या मुख्य कार्यकारी अधिकारी श्रीमती निमा अरोरा, डॉ. स्वाती रवींद्र बिनवडे, जिल्हा शल्य चिकित्सक डॉ. एम.के. राठोड, जिल्हा आरोग्य अधिकारी डॉ. खतगावकर, अतिरिक्त जिल्हा आरोग्य अधिकारी डॉ. कडले, डॉ. बारडकर, डॉ. लोणे, डॉ. म्हस्के, डॉ. सोनी, डॉ. राजे, डॉ. एस.बी. जगताप, उपशिक्षणाधिकारी श्री मापारी, डॉ. गोंदीकर, डॉ. अनुराधा राख आदींची प्रामुख्याने उपस्थिती होती.

        यावेळी जिल्हाधिकारी श्री बिनवडे म्हणाले की,  9  महिने ते 15 वर्षाखालील जिल्ह्यातील सुमारे 6 लाख 15 हजार 82 लाख बालकांना लस देण्याचे उद्दिष्ट ठेवण्यात आले असून लसीकरण मोहिमेसाठी आरोग्य विभाग सज्ज झाला आहे. ही लस अत्यंत सुरक्षित असून याचे कुठलेही गंभीर दुष्परिणाम नाहीत. आपल्या स्वत:च्या मुलीला गोवर-रुबेलाची  लस टोचून  या मोहिमेचा जिल्हास्तरीय शुभारंभ केला असल्याचे सांगत नागरिकांनी पालकांनी आपल्या बाळाला लस टोचून घ्यावी, असे आवाहनही जिल्हाधिकारी रवींद्र बिनवडे यांनी यावेळी केले. 

       यावेळी जिल्हा परिषदेचे उपाध्यक्ष सतीष टोपे म्हणाले की, गोवर-रुबेला लसीकरणाची मोहिम यशस्वी करण्यासाठी एएनएम, आशा व अंगणवाडी सेविकांना योग्य ते प्रशिक्षण देण्यात आले असून व त्यांना एक विशेष किट देखील देण्यात आले आहे. ज्या मध्ये लसीकरण कसे करावे याची संपूर्ण माहिती पुरविण्यात आली आहे.  जिल्ह्यातील 6 लाख 15 हजार बालकांना ही लसदेण्याचे उद्दिष्ट ठेवण्यात आले असुन या लसीपासून एकही बालक वंचित राहणार नाही, याची दक्षता घेण्याचे आवाहनही त्यांनी यावेळी केले. 

यावेळी फँटसी किड्स झोन शाळेच्या मुख्याध्यापिका श्रीमती छाया नाईक, अश्विनी देशपांडे, ज्योति अग्निहोत्री, अल्पना पुरी, श्वेता बर्दापुरकर, सिमरण बैजल यांच्यासह पालक व विद्यार्थी, विद्यार्थीनींची मोठ्या संख्येने उपस्थिती होती. 

*******

वलखेड येथे 3 कोटी 32 लक्ष रुपये किंमतीच्या रस्त्याच्या कामाचा शुभारंभ जिल्ह्याच्या सर्वांगिण विकासासाठी कटिबद्ध जिल्ह्यातील एकही गाव पक्क्या व मजबुत डांबरी रस्त्यापासून वंचित राहणार नाही - पालकमंत्री बबनराव लोणीकर

             जालना, दि. 17 –   जिल्ह्यातील जनतेला रस्ते, वीज, पाणी, आरोग्य यासारख्या सुविधा उपलब्ध करुन देण्याबरोबरच संपूर्ण जिल्ह्याच्या सर्वांगिण विकासासाठी आपण कटिबद्ध असल्याची ग्वाही देत येणाऱ्या काळात जिल्ह्यातील एकही गाव पक्क्या व मजबुत डांबरी रस्त्यापासून वंचित राहणार नसल्याचे प्रतिपादन राज्याचे पाणी पुरवठा व स्वच्छता मंत्री तथा जिल्ह्याचे पालकमंत्री बबनराव लोणीकर यांनी केले.

            परतूर तालुक्यातील वलखेड येथे मुख्यमंत्री ग्रामसडक योजनेअंतर्गत 3 कोटी 32 लक्ष रुपये किंमतीच्या रामा 220 ते बामणी वलखेड ते तालुका सरहद या रस्त्याचे मजबुतीकरण व डांबरीकरणाच्या कामांचा शुभारंभ पालकमंत्री श्री लोणीकर यांच्या हस्ते करण्यात आला. त्याप्रसंगी आयोजित करण्यात आलेल्या कार्यक्रमात उपस्थितांना मार्गदर्शन करताना ते बोलत होते.

            व्यासपीठावर जिल्हा परिषदेचे माजी उपाध्यक्ष राहुल लोणीकर, अशोकराव बरकुले, सुरेशराव सोळुंके, रमेशराव भापकर, गावचे सरपंच बबन येडेकर, उपसरपंच विश्वनाथ सुरंग, नितीन जोगदंड, रमेश केवारे, संपत टकले, शिवाजी पाईकराव, राजू ढवळे, नारायणराव सुरंग, आसाराम सुरंग, भगवान सुरंग, दत्ता बिल्लारे, शहाजी सुरंग, माऊली डवारे, गंगाधर सुरंग, श्रीहरी सुरंग, अंकुशराव नवल, ओमप्रकाश मोरे, कार्यकारी अभियंता               श्री चौधरी आदींची उपस्थिती होती.

            पालकमंत्री श्री लोणीकर म्हणाले की, दळणवळणामध्ये महत्वाची भूमिका बजावणाऱ्या रस्ते विकासासाठी मंत्रीपदाची धुरा सांभाळताच आपण जिल्ह्यातील संपुर्ण रस्त्यांची माहिती घेऊन पुढील पाच वर्षात करावयाच्या रस्त्यांचे आराखडे तयार करण्याचे निर्देश त्या त्या विभागाच्या अधिकाऱ्यांना दिले होते.  गेल्या तीन वर्षाच्या काळात 200 गावांमध्ये पक्के व डांबरी रस्ते तयार करण्यात आली आहेत.  गावांना रस्ते व्हावेत,  शेतकऱ्यांना त्यांचा माल वेळेवर बाजारामध्ये नेण्याबरोबरच सर्वसामान्य जनतेला जलदगतीने वाहतुक करता यावी यासाठी मतदारसंघातील प्रत्येक गावात रस्ते तयार करण्यात येत आहेत.  या रस्त्यांचे काम दर्जेदार व गुणवत्तापूर्ण करण्याचे निर्देश कंत्राटदारांना देण्यात आले आहेत.  येणाऱ्या पाच वर्षात हा रस्ता खराब झाल्यास तो दुरुस्त करण्याची जबाबदारीही या कंत्राटदारांवर निश्चित करण्यात आली असुन येणाऱ्या काळात जिल्ह्यातील वाडी,वस्ती, तांडे व गावांमध्ये पक्क्या, दर्जेदार व मजबुत रस्त्यांचे जाळे निर्माण करण्यात येणार असल्याचेही पालकमंत्री  श्री लोणीकर यांनी यावेळी सांगितले.

            जिल्ह्याच्या रस्ते विकासासाठी केंद्र शासनामार्फत मोठ्या प्रमाणात निधी मंजूर करण्यात आला आहे. या माध्यमातून शहरांसह ग्रामीण भागात दर्जेदार रस्त्यांची निर्मिती करण्यात येत आहे.    राष्ट्रीय महामार्ग अंतर्गत दिंडी मार्ग म्हणून खामगाव-लोणार-मंठा-परतूर-माजलगाव-कळंब-बार्शी-पंढरपुर-सांगोला या 430 किलोमीटरच्या रस्त्याचे काम अत्यंत वेगाने करण्यात येत आहे.  हा मार्ग पुर्ण झाल्यास  परिसराचा विकास होण्याबरोबरच बेरोजगारांना मोठ्या प्रमाणात रोजगारांच्या संधी उपलब्ध होणार आहेत.  शेगाव ते पंढरपूर मार्गे जालना या मार्गावर गतकाळात अपघातामध्ये वारकऱ्यांना प्राण गमवावे लागले होते. विदर्भातील प्रत्येक भाविकांना पंढरपूर या श्रद्धास्थानापर्यंत  कमी वेळात पोहोचता यावे यासाठी नवीन दिंडी मार्ग होणे आवश्यक होते. त्यामुळे शेगाव ते पंढरपूर मार्गे लोणार-परतूर-माजलगाव हा मार्ग व्हावा अशी मागणी वेळोवेळी  नागपूर व दिल्ली येथे जाऊन  केंद्रीय वाहतूक मंत्री नितीन गडकरी यांच्याकडे केल्याने हा रस्ता तातडीने मंजूर करण्यात आला असल्याचे सांगत केंद्रीय मंत्री नितीन गडकरी, मंत्री पंकजा मुंडे, मंत्री चंद्रकांत पाटील यांच्या माध्यमातुन जिल्ह्यातील रस्ते विकासासाठी मोठ्या प्रमाणात निधी उपलब्ध करुन देण्यात आला असल्याचेही पालकमंत्री श्री लोणीकर यांनी यावेळी सांगितले.

            उपकेंद्रावर तसेच ट्रान्सफॉर्मरवर विजेचा अतिरिक्त ताण पडल्याने नागरिकांना व शेतकऱ्यांना पुरेसा विजेचा पुरवठा करण्यात अडचणी येत होत्या. या प्रश्नावर कायमस्वरुपी मात करण्यासाठी वीज वितरणामध्ये अत्यंत महत्वाचा घटक असलेल्या इन्फ्रास्ट्रक्चर उभारणीवर शासनाने भर दिला असून जिल्ह्यातील जनतेला व शेतकऱ्यांच्या शेतीपंपाला सुरळीतपणे वीजेचा पुरवठा होण्यासाठी जिल्ह्यासाठी नवीन 33 केव्हीचे 49 उपकेंद्रे मंजूर करण्यात आली आहेत. यापैकी 19 उपकेंद्राच्या उभारणीचे काम सुरु झाले असून 170 कोटी रुपये खर्चून जालना येथे 220 केव्ही केंद्राचे काम करण्यात येत आहे. तर परतूर येथील 220 केव्ही केंद्राचे काम पूर्ण झाले आहे. ही सर्व कामे पूर्ण झाल्यास जिल्ह्यातील सर्वसामान्य नागरिकांसह शेतकऱ्यांच्या शेतीपंपाला अखंडितपणे विजेचा पुरवठा होणार असल्याचेही पालकमंत्री श्री लोणीकर यांनी यावेळी सांगितले.

            तेलंगणा, आंध्रप्रदेश, श्रीलंका व गुजरात राज्य तसेच इस्त्राईल देशाच्या धर्तीवर जालना, परतूर व मंठा या तालुक्यातील 176 गावांना वॉटरग्रीडच्या माध्यमातून शुद्ध व स्वच्छ पिण्याच्या पाण्याचा पुरवठा करण्यासाठी 234 कोटी रुपयांची योजना साकारली जात आहे.  येणाऱ्या आठ महिन्यांच्या कालावधीत ही योजना पूर्ण करुन जनतेला शुद्ध व स्वच्छ पाण्याचा पुरवठा करण्यात येणार असल्याचे सांगत राज्यात 60 लक्ष शौचालयांची उभारणी करुन महाराष्ट्र राज्य हे देशात अव्वल ठरले आहे.  दिल्ली येथे आयेाजित करण्यात आलेल्या जागतिक परिषदेमध्ये महाराष्ट्र राज्याचा देशाचे प्रधानमंत्री यांच्याहस्ते गौरवही करण्यात आला असल्याचे  श्री.लोणीकर यांनी यावेळी सांगितले.

            यावेळी जिल्हा परिषदेचे माजी उपाध्यक्ष राहूल लोणीकर यांनीही आपले मनोगत व्यक्त केले.   कार्यक्रमाचे प्रास्ताविक कार्यकारी अभियंता श्री चौधरी यांनी केले.

यावलपिंप्री तांडा येथे 3 कोटी 51 लक्ष रुपयांच्या रस्त्याच्या कामाचे

पालकमंत्री बबनराव लोणीकर यांच्या हस्ते शुभारंभ

            पालकमंत्री श्री लोणीकर यांच्या हस्ते घनसावंगी तालुक्यातील यावल पिंप्री तांडा-1 येथे राजेगाव-गडमंदिर-यावलपिंप्री तांडा ते रामा -224 या 3 कोटी 51 लक्ष रुपये किंमतीच्या रस्त्याच्या मजबुतीकरण व डांबरीकरणाच्या कामाचा शुभारंभ पालकमंत्री श्री लोणीकर यांच्या हस्ते करण्यात आला.

            यावल पिंप्री तांडा येथे झालेल्या कार्यक्रमास माजी आमदार विलास खरात, जिल्हा परिषदेचे माजी उपाध्यक्ष राहुल लोणीकर, सरपंच छबुराव राठोड, संजय तौर, रमेश महाराज वाघ, देवनाथ जाधव, अंकुश बोबडे, प्रकाश टकले, विष्णु जाधव, नारायण राठोड, प्रमोद राठोड, एकनाथ चव्हाण, बाबुराव पवार, संतोष पवार, शंकर चव्हाण, रामनाथ पवार, अर्जुन पवार, हिंमतराव पवार, वामनराव राठोड, तहसिलदार संजयकुमार डव्हळे,   यांच्यासह पदाधिकारी, अधिकारी व नागरिकांची मोठ्या संख्येने उपस्थिती होती.

********

पत्रकारांनी आपल्या लेखणीच्या माध्यमातुन समाजातील गोरगरीबांना न्याय मिळवुन देण्याचा प्रयत्न करावा -- प्रा. बी.वाय. कुलकर्णी

          जालना, दि. 16 –   पत्रकारीता क्षेत्रात कालानुरुप मोठ्या प्रमाणात बदल झाला आहे.  माहिती व तंत्रज्ञानाच्या युगात ई-माध्यमामुळे पत्रकारिता क्षेत्रात अधिक गतिमानता आली आहे. आयुष्यातील चढ उताराप्रमाणे पत्रकारितेमध्येही चढ-उतार येत असुन नकारात्मक चर्चेपेक्षा पत्रकारांनी आपल्या सकारात्मकतेने लेखणीची ताकद जाणुन समाजातील गोरगरीबांना न्याय मिळवुन देण्याचा प्रयत्न करावा, असे आवाहन प्रा. बी.वाय. कुलकर्णी यांनी केले.  

            16 नोव्हेंबर राष्ट्रीय पत्रकार दिनाच्या निमित्ताने जिल्हा माहिती कार्यालय जालना येथे डिजिटल युगातील पत्रकारिता आचारनिती आणि आव्हान या विषयावर चर्चासत्राचे आयोजन करण्यात आले होते.

यावेळी व्यासपीठावर दै. दुनियादारीचे कार्यकारी संपादक किशोर आगळे, माहिती सहाय्यक अमोल महाजन आदींची प्रामुख्याने उपस्थिती होती.

श्री कुलकर्णी म्हणाले की, माध्यमासमोर सद्या समाज माध्यमांचे मोठे आव्हान उभे आहे. समाज माध्यमात प्रसारित होणाऱ्या बातम्या व व्हिडीओ बाबतच्या सत्यतेची पडताळणी करणे अत्यंत जिकरीचे झाले आहे. त्याच प्रमाणे सामाजिक समस्या व ग्रामीण भागातील प्रश्न यांना माध्यमात मोठया प्रमाणात जागा देणे आवश्यक असल्याचे मत या चर्चेत मांडण्यात आले. आयुष्यातील चढ उताराप्रमाणे पत्रकारितेमध्येही चढ-उतार येत असुन नकारात्मक चर्चेपेक्षा पत्रकारांनी आपल्या सकारात्मकतेने लेखणीची ताकद जाणुन समाजातील गोरगरीबांना न्याय मिळवुन देण्याचा प्रयत्न करावा, असेही त्यांनी यावेळी सांगितले.

किशोर आगळे म्हणाले की, बाळशास्त्री जांभेकरांनी केलेल्या पत्रकारितेचा आदर्श समोर ठेऊन त्यांच्या प्रेरणेतुन आपण आज या क्षेत्रामध्ये काम करत आहोत.  समाजातील गोरगरीब व वंचिताला न्याय देण्यासाठी पत्रकारांनी आपल्या लेखणीची ताकद वापरण्याचे आवाहनही त्यांनी यावेळी केले.

प्रास्ताविकात माहिती सहाय्यक अमोल महाजन यांनी राष्ट्रीय पत्रकार दिनाच्या आयोजनामागची भूमिका विषद केली.

सर्वप्रथम  राष्ट्रीय पत्रकार दिनाच्या निमित्ताने आयोजित कार्यक्रमात उपस्थित मान्यवर  व पत्रकारांनी  आचार्य बाळशास्त्री जांभेकर व बाबुराव विष्णु पराडकर यांच्या प्रतिमेस पुष्पहार अर्पण करुन अभिवादन केले.

कार्यक्रमाचे आभार राजेंद्र वाणी यांनी मानले. कार्यक्रमास मुद्रीत माध्यमांचे संपादक, जिल्हा प्रतिनिधी तसेच ई-माध्यमांचे प्रतिनिधी, जिल्हा माहिती कार्यालयातील कर्मचारी उपस्थित होते.

*******

जनतेला सुरक्षितता देण्यासाठी पोलिसांनी अधिक कार्यक्षम रहावे - मुख्यमंत्री देवेंद्र फडणवीस

            जालना, दि. 3 – जनतेला सुरक्षितता वाटली पाहिजे. यादृष्टीने पोलीस विभागाने अधिक कार्यक्षमपणे काम करावे, असे आवाहन मुख्यमंत्री देवेंद्र फडणवीस यांनी केले.

            जालना जिल्ह्यातील कायदा व सुव्यवस्थेचा आढावा मुख्यमंत्री फडणवीस यांनी जालना येथील जिल्हाधिकारी कार्यालयात आज घेतला. यावेळी ते बोलत होते.

            बैठकीस पालकमंत्री तथा राज्याचे पाणी पुरवठा मंत्री स्वच्छता मंत्री बबनराव लोणीकर, पशुसंवर्धन, दुग्धविकास व मस्त्यव्यवसाय विकास राज्यमंत्री अर्जुन खोतकर, खासदार रावसाहेब दानवे, आमदार नारायण कुचे, आमदार संतोष दानवे, आमदार राजेश टोपे, तसेच मुख्यमंत्र्‌यांचे अप्पर मुख्य सचिव प्रवीण परदेशी, विभागीय आयुक्त डॉ. पुरुषोत्तम भापकर, विशेष पोलीस महानिरीक्षक प्रकाश मुत्याल, जिल्हाधिकारी रविंद्र बिनवडे, जिल्हा परिषदेच्या मुख्य कार्यकारी अधिकारी  श्रीमती  निमा अरोरा, पोलीस अधीक्षक एस.चैतन्या उपस्थित होते.

            मुख्यमंत्री पुढे म्हणाले की, गुन्हे प्रकरणातील दोषसिद्धीचे प्रमाण मागील वर्षाच्या तुलनेने वाढले असले तरी पोलीस विभागाने व शासकीय लोक अभियोक्त्यांनी अधिक जागरुकपणे लक्ष घालणे गरजेचे आहे. गुन्हे प्रकरणे सुटण्यामागील कारणमीमांसा करीत शासनाने निर्गमित केलेल्या 14 शासन निर्णयाच्या आधारे अधिकाधिक प्रकरणात दोषसिद्धी होण्यासाठी संयुक्त प्रयत्न करावेत. यासाठी नियुक्त केलेल्या समित्यांच्या बैठकांचे नियमित आयोजन करुन सबळ पुराव्याची शहानिशा करुनच प्रकरणे न्यायप्रविष्ट होतील, याची दक्षता घ्यावी, असे ते म्हणाले.

            यावेळी मुख्यमंत्र्यांनी पोलीस स्थानकनिहाय व शासकीय लोकअभियोक्तानिहाय दोषसिद्धीच्या प्रमाणाचा आढावा घेऊन त्यामागील कारणे जाणून घेतली. समन्स आणि वॉरंट देण्याचे प्रमाण गरजेनुसार वाढले पाहिजे असे सांगत मुख्यमंत्र्यांनी महिलांवरील अत्याचारांच्या दाखल गुन्ह्यातील प्रकरणात हयगय न करता आरोपीविरुद्ध कडक कारवाईचे निर्देश यावेळी दिले. याशिवाय त्यांनी अशा घटकांना प्रतिबंध घालण्यासाठी केल्या जाणाऱ्या उपाययोजनांचीही यावेळी माहिती घेतली.

            गुन्हे उघडकीचे प्रमाण, वाळुचोरीविरुद्ध कारवाई, अवैध हत्यार व अवैध गुटखा बाळगणाऱ्याविरुद्ध कारवाई तसेच अवैध दारुविक्री, जुगार, मोटारवाहन कायद्यांतर्गत कारवाईच्या पोलीस विभागाच्या कामकाजाचा सविस्तर आढावा घेऊन गुन्हे उघडकीस आणण्यासाठी आधुनिक तंत्रज्ञानाचा मोठ्या प्रमाणात वापर करण्याचे निर्देश मुख्यमंत्री फडणवीस यांनी यावेळी दिले.

            पोलीस गृहनिर्माण विषयक कामांचा आढावा घेऊन गृहनिर्माण महामंडळाला अधिकगतीने जालना येथील पोलीसांच्या निवासस्थानाच्या प्रकल्पाचा प्रश्न सोडविण्याचे निर्देशही या बैठकीत मुख्यमंत्री फडणवीस यांनी दिले. प्रारंभी पोलीस अधीक्षक एस.चैतन्या यांनी सादरीकरणाद्वारे कामकाजाची माहिती दिली. बैठकीस सर्व पोलीस अधिकारी, अभियोक्ता उपस्थित होते.

*******