विभागीय आयुक्त मधुकरराजे आर्दड यांच्या हस्ते जिल्हाधिकारी कार्यालयाच्या परिसरात वृक्षारोपण

 

जालना, दि. 23 (जिमाका) - विभागीय आयुक्त मधुकरराजे आर्दड यांच्या हस्ते आज जिल्हाधिकारी कार्यालयाच्या परिसरात वृक्षारोपण करण्यात आले. यावेळी जिल्हाधिकारी डॉ. श्रीकृष्ण पांचाळ, जिल्हा परिषदेच्या मुख्य कार्यकारी अधिकारी वर्षा मीना, अपर जिल्हाधिकारी शशिकांत हदगल, निवासी उपजिल्हाधिकारी केशव नेटके यांच्यासह महसुल विभागाचे अधिकारी व कर्मचारी उपस्थित होते. यावेळी जिल्हाधिकारी डॉ. पांचाळ यांच्याही हस्ते वृक्षारोपण करण्यात आले.

***

 

मधकेंद्र योजनेचा लाभ घेण्याचे आवाहन

 

जालना, दि. 23 (जिमाका) :-  राज्यात मध उद्योग हा केवळ शेतीपुरक व्यवसाय व जोडधंदा म्हणून न करता एक मुख्य उद्योग म्हणून केल्यास त्यातून ग्रामीण रोजगार निर्मितीला चालना मिळेल. मधमाशांच्या मधपेट्या शेती पिके व फळबागायतींच्या ठिकाणी व तसेच जंगलात ठेवल्यास मधमाशाद्वारे पर-परागीभवन होऊन पिकाच्या उत्पादनात पिकांच्या प्रकारानुसार 5 ते 45 टक्के उत्पन्नात वाढ होण्याची शक्यता आहे. ही वाढ मधमाशांनी उत्पादित केलेल्या मधाच्या व मेणाच्या किमतीच्या 10 ते 15 टक्के अधिक आहे. त्यादृष्टीने मधमाशा पालन उद्योग हा सदर उद्दिष्टांशी सुसंगत असा उद्योग असल्याने मधमाशा पालन उपक्रमास उद्योग म्हणुन चालना देण्यासाठी महाराष्ट्र शासनाने राज्यात सर्व जिल्ह्यात मधकेंद्र योजना (मधमाशा पालन) राबविण्याचा निर्णय घेतला आहे. ही योजना महाराष्ट् राज्य खादी  व ग्रामोद्योग मंडळामार्फत राबविण्यात येत असून यासाठी महाबळेश्वर जि. सातारा येथे मध संचालनालय कार्यरत आहे. या योजनेचा लाभ घेण्याचे आवाहन जिल्हा ग्रामोद्योग अधिकारी यांनी केले आहे.

अ)   योजनेतील प्रमुख घटक आणि पात्रता  --1.वैयक्तिक मधपाळ – पात्रता अर्जदार साक्षर असावा. स्वत:ची शेती असल्यास प्राधान्य, वय 18 वर्षापेक्षा जास्त. 2.केंद्रचालक प्रगतीशील मधपाळ – व्यक्ती   वैयक्तीक केंद्रचालक (प्रगतीशील मधपाळ) पात्रता – किमान 10 वी पास, वय वर्षे  21 पेक्षा जास्त अशा व्यक्तींच्या नावे अथवा त्या व्यक्तींच्या कुटुंबातील कोणत्याही व्यक्तींच्या नावे किमान 1 एकर शेतजमीन किंवा भाडे तत्त्वावर घेतलेली शेतजमीन, लाभार्थीकडे मधमाशापालन,प्रजनन व मध उत्पादनाबाबतीत लोकांना प्रशिक्षण देण्याची क्षमता व सुविधा असावी.  3. केंद्रचालक संस्था :- पात्रता – संस्था नोंदणीकृत असावी. संस्थेच्या नावे मालकीची किंवा 10 वर्षासाठी भाडे तत्त्वावर घेतलेली किमान 1 एकर शेतजमीन, संस्थेच्या नावे अथवा भाडे तत्त्वावर घेतलेली किमान  1 हजार चौ.फु. सुयोग्य इमारत असावी. संस्थेकडे मधमाशपालन प्रजनन व मध उत्पादनाबाबतीत लोकांना प्रशिक्षण देण्याची क्षमता असलेले संस्था असावेत. ब) योजनेची वैशिष्टे -मध उद्योगाचे मोफत प्रशिक्षण, साहित्य स्वरुपात 50 टक्के अनुदान व 50 टक्के स्वगुंतवणूक, शासनाच्या हमी भावाने मध  खरेदी, विशेष (छंद) प्रशिक्षणांची सुविधा, मधमाशा संरक्षण व संवर्धनाची जनजागृती. क)   अटी व शर्ती  - लाभार्थी निवड प्रक्रीये नंतर प्रशिक्षणांपुर्वी मध व्यवसाय सुरु करणे संबंधी मंडळास बंधपत्र लिहून देणे अनिवार्य राहील. मंडळाने निश्चित केलेल्या ठिकाणी प्रशिक्षण घेणे अनिवार्य.           ड) अधिक माहितीसाठी संपर्क :-  जिल्हा ग्रामोद्योग अधिकारी यांचे कार्यालय,   एम.आय.डी. सी. एरिया, प्लॉट नं-7 जालना

फोन नं. 0242-220628 संतोष बगाटे मो.क्र. 982252534,                    Email.Id – dviojalna@rediffmail.com    2. संचालक, मध संचालनालय,  महाराष्ट्र राज्य खादी व ग्रामोद्योग मंडळ, सरकारी बंगला नं. 5      महाबळेश्वर, जिल्हा सातारा पिन – 412806 (दुरध्वनी – 02168-260264), असे जिल्हा ग्रामोद्योग अधिकारी यांनी प्रसिध्दीपत्रकाव्दारे कळविले आहे.

 

एक दिवसीय युनिसेफ प्रोग्रॅम ऑफिसरची कार्यशाळा संपन्न

 

जालना, दि.22 (जिमाका) :- शासकीय तंत्रनिकेतन जालना येथे बुधवार दि. 9 ऑगस्ट 2023 रोजी एक दिवसीय युनिसेफ प्रोग्रॅम ऑफिसरची जालना जिल्ह्यातील एकूण 18 संस्थांचे जिल्हास्तरीय प्रशिक्षण कार्यशाळेचे आयोजन करण्यात आले होते. या कार्यक्रम तंत्रनिकेतनचे प्र. प्राचार्य डॉ . निनाद  जावडे यांच्या अध्यक्षतेखाली घेण्यात आला. या वेळी जेईएस फार्मसी कॉलेजचे प्राचार्य राजेंद्र राठी हे प्रमुख पाहुणे म्हणून उपस्थित होते. फीत कापून कार्यक्रमाचे उदघाटन करण्यात आले.

 एक दिवसीय प्रशिक्षणाकरिता युनिसेफ-ACWADAM चे मधुकर लेंगरे यांनी युनिसेफ ग्रीन क्लब निर्माण करण्याकरिता आवश्यक मार्गदर्शन केले. तसेच यावेळी संस्थेतील प्रा. जयंत पोहनेरकर व प्रा. राजरत्न खिराडे यांनी देखील वेगवेगळ्या सेशन्समध्ये मार्गदर्शन केले. या प्रशिक्षणाकरिता आर.डी.भक्त पॉलीटेकनिक कॉलेजचे प्रा.राहुल तायडे, सि.पी.कॉलेज ऑफ फार्मसी जालनाचे प्रा. शुभम खैरे, एमएसएस पॉलिटेक्निकचे प्रा. अविनाश दवणे, फार्मसी कॉलेज प्रा. सुनिल जायभाये, व्यवस्थापन कॉलेजच्या प्रा.डॉ.सोनाली राठोड, फार्मसी कॉलेज बदनापूरचे प्रा. परमेश्वर मतलबे, डिजेपी पॉलिटेक्निक कॉलेजचे सय्यद समीर, इन्स्टीट्यूट ऑफ केमिकल टेक्नॉलॉजीचे डॉ.एम.एम.जाधव यांची उपस्थिती होती. सादर योजनेत वृक्षारोपण, पाणी बचत, पर्यावरण संवर्धन, इत्यादी विषयांवर विद्यार्थ्यासाठी कार्यक्रम घेण्यात येणार आहेत. तसेच सदर विषयांशी संबंधित प्रयोग, प्रकल्प सेमिनार, कार्यशाळा यांचे देखील आयोजन करण्यात येणार आहे. सदर UNICEF- YOUTH ENGAGEMENT AND WATER STEWARDSHIP (YEWS ) कार्यक्रम हा राज्यस्तरीय नोडल ऑफिसर डॉ . विठ्ठल बादल यांचे मार्गदर्शनानुसार घेण्यात येत आहे. असे प्राचार्य, शासकीय तंत्रनिकेतन, जालना यांनी प्रसिध्दीपत्रकाद्वारे कळविले आहे.

 

-*-*-*-*-

क्रीडा स्पर्धा : क्रीडा शिक्षकांची 23 ऑगस्टला बैठक

 

जालना, दि.21 (जिमाका) :- क्रीडा व युवक सेवा संचालनालय, पुणे तसेच जिल्हा क्रीडा अधिकारी जालना यांच्या विद्यमानाने सन 2023-24 वर्षातील शालेय विद्यार्थ्यांच्या क्रीडा स्पर्धा घेण्यासंदर्भात बुधवार दि. 23 ऑगस्ट 2023 रोजी सकाळी 11 वाजता  जिल्हा क्रिडा अधिकारी, गट शिक्षणाधिकारी, तालुका क्रिडा अधिकारी, तालुका क्रीडा संयोजकांच्या उपस्थितीत जालना तालुक्यातील सर्व शासकीय, खाजगी अनुदानित, विनाअनुदानित, सर्व माध्यमांच्या तसेच जिल्हा परिषदेच्या इयत्ता सहावी ते आठवीच्या उच्च प्राथमिक असलेल्या शाळा मधील क्रीडा शिक्षकांची, तसेच क्रीडा प्रेमी शिक्षकांची बैठक जिल्हा परिषद प्रशाला मुलांची जालना, रेल्वे स्टेशन रोड, जालना येथे आयोजित करण्यात आली आहे. तरी सर्वांनी वेळेवर उपस्थित राहावे, असे आवाहन गटशिक्षणाधिकारी, जालना यांनी प्रसिध्दीपत्रकाद्वारे केले आहे.

                                                 

अनोळखी मृतदेहाची ओळख पटविण्यासाठी आवाहन

 

 

जालना दि.21 (जिमाका) :-  घनसावंगी पोलिस ठाणे हद्दीतील ग्रामीण रुग्णालयाजवळ असणाऱ्या स्मशानभूमीच्या गेटजवळील नाल्यात लिंबाच्या झाडाखाली एका अनोळखी अंदाजे 40 ते 45 वर्ष वयोगटातील पुरुषाचा मृतदेह आढळून आला आहे. तरी या वर्णनाच्या अनोळखी पुरुषासंबंधी काही माहिती असल्यास पोलिस ठाणे, घनसावंगी यांना माहिती द्यावी, असे आवाहन घनसावंगी पोलिस ठाण्याचे पोलिस उपनिरीक्षक पी.डी.डोलारे यांनी केले आहे.

घनसावंगी पोलिस ठाणे यांनी मरणोत्तर पंचनामा करुन या पुरुषाच्या मृतदेहावर ग्रामीण रुग्णालयात दि.10 ऑगस्ट 2023 रोजी पोस्टमार्टम करण्यात आले आहे. या प्रकरणी दि.10 ऑगस्ट रोजी बुऱ्हाणखाँ उमरखाँ पठाण वय 44 वर्ष यांनी  दिलेल्या खबरीवरुन आमॉ34/2023 कलम 174 सीआरपीसीप्रमाणे नोंद करण्यात आली आहे. पुरुषाचा मृतदेह अंदाजे उंची 165 सेमी असून पांढऱ्या रंगाचा शर्ट ज्यावर निळ्या रेषा व  निळ्या रंगाची पॅन्ट घातलेली आहे. तरी या वर्णनाच्या अनोळखी पुरुषासंबंधी काही माहिती असल्यास किंवा पोलिस ठाण्यात हरवल्याची तक्रार असल्यास किंवा गुन्हा दाखल असल्यास पोलिस ठाणे घनसावंगी यांना माहिती द्यावी. माहिती देण्यासाठी पोलिस निरीक्षक पी. डब्ल्यू. त्रिभूवन (मो.9823067443), पोलिस उपनिरीक्षक पी.डी.डोलारे (मो.8605103703), हेड काँस्टेबल आर.वाय. वैराळ (मो.8668703254) यांच्याशी संपर्क साधावा, असे पोलिस उपनिरीक्षक, घनसावंगी यांनी प्रसिध्दीपत्रकाद्वारे कळविले आहे.

-*-*-*-*-

अपर जिल्हादंडाधिकारी यांचे कलम 37 (1) व (3) अन्वये आदेश जारी

 

 

            जालना दि. 21 (जिमाका) :-   दि. 30 ऑगस्ट  2023 रोजी रक्षाबंधन सण साजरा होणार आहे. तसेच दि. 3 सप्टेंबर 2023 रोजी संकष्ट चतुर्थी असल्याने जालना जिल्ह्यात मौजे राजुर, माळाचा गणपती व माव पाटोदा येथे गणपती मंदीर असल्याने भाविकांची मोठ्या प्रमाणात गर्दी होते.

    तसेच सध्या महाराष्ट्रात राजकीय दृष्ट्या सत्ताधारी व विरोधकात एकमेकाविरुध्द आरोप प्रत्यारोप विविध कारणास्तव सुरु आहे. मराठा आरक्षण, ओबीसी आरक्षण मिळावे या मागणीसाठी तसेच शेतक-यांचे विविध मागणीसाठी विविध संघटनांकडून आत्मदहन, उपोषण, धरणे, मोर्चे, निदर्शने, रास्तारोको इत्यादी सर्व प्रकारची आंदोलनात्मक कार्यक्रम घेण्याची शक्यता नाकरता येत नाही. 

        त्यामुळे अपर जिल्हादंडाधिकारी जालना यांना प्राप्त अधिकारानुसार पोलीस अधिनियम 1951 चे कलम 37 (1) अन्वये शासकीय कर्तव्य पार पाडणा-या कर्मचा-यांच्या व्यतिरिक्त इतर कोणतीही व्यक्ती सार्वजनिक ठिकाणी किंवा त्या आसपास शस्त्रे, लाठ्या, सोटे, बंदुके, तलवारी , भाले, चाकु व इतर शरीरास इजा अथवा अपाय करणा-या वस्तु जवळ बाळगणार नाही. तीक्ष्ण पदार्थ अथवा स्फोटके सहज हाताळता येतील अशी घातक वस्तु जवळ बाळगणार नाही. दगड किंवा इतर उपकरणे किंवा प्रवर्तक शस्त्रे गोळा करुन ठेवणार नाही किंवा जवळ बाळगणार नाही. व्यक्तींच्या किंवा समुहाच्या भावना जाणुनबुजुन दुखविण्याचे उद्देशाने असभ्यतेने भाषण म्हणणार नाही, वाद्य वाजविणार नाही, गाणे म्हणणार नाही. व्यक्तींचे किंवा शवाचे किंवा त्याच्या प्रतिकृतीचे प्रदर्शन करणार नाही. आवेषी भाषण, अंगविक्षेप,विडंबनापर नकला करणार नाही  आणि सभ्यता किंवा नितिमत्ता यास बाधा येईल किंवा ज्यामुळे राज्याची सुरक्षितता धोक्यात येईल किंवा कोणतीही वस्तु बाळगणार नाही.    तसेच  अपर जिल्हादंडाधिकारी जालना यांना प्राप्त अधिकारानुसार पोलीस अधिनियम 1951 चे कलम 37 (3) अन्वये  पाच किंवा अधिक व्यक्तींना जमण्यास किंवा सभा, मिरवणुका, मोर्चा काढण्यास मनाई केली आहे.   हा आदेश कामावरील कोणताही ‍ अधिकारी किंवा कर्मचारी यांना लागु होणार नाही.  तसेच विवाह, अंत्ययात्रा आणि पोलीस अधिक्षक जालना व उपविभागीय पोलीस अधिकारी जालना, अंबड, परतुर, भोकरदन यांनी विशेषरित्या परवानगी दिलेल्या मिरवणुका, सभा, मोर्चा यांना लागु राहणार नाही.      हा आदेश संपुर्ण जिल्ह्यासाठी दि. 3 सप्टेंबर 2023  रोजीचे रात्री 12.00 वाजेपर्यंत अंमलात राहील. असे आदेशात नमुद करण्यात आले आहे.

                                                                    -*-*-*-*-       

राष्ट्रीय लोकअदालतीचे 9 सप्टेंबर रोजी आयोजन

 

 

जालना, दि. 21 (जिमाका) :- जिल्हा विधी सेवा प्राधिकरण, जिल्हा न्यायालय, जालना व सर्व तालुका न्यायालयांमध्ये प्रलंबित मोटार वाहन अपघात कायद्याअंतर्गत नुकसान भरपाईचे प्रकरणे, प्रलंबित दिवाणी व फौजदारी प्रकरणे, कलम 138, एन. आय. ॲक्टची प्रकरणे, बँकेची  वसूली प्रकरणे कौटुंबिक वादाची प्रकरणे, मजुरी संबंधीचे वादाची प्रकरणे, भुसंपादनाची  प्रकरणे, इलेक्ट्रीसिटी, पाणी बिल, महसुलची प्रकरणे व तर प्रकरणे तसेच दावा दाखलपुर्व प्रकरणे, इत्यादी प्रकरणासाठी दि. 9 सप्टेंबर 2023 रोजी राष्ट्रीय लोक अदालतीचे आयोजन करण्यात आले आहे.   तरी सर्व संबंधितांनी या संधीचा लाभ घेवून आपली प्रकरणे लोकअदालतमध्ये ठेवून तडजोडीने मिटवावीत, असे आवाहन श्रीमती पी.पी.भारसाकडे-वाघ, सचिव, जिल्हा विधी सेवा प्राधिकरण, जालना यांनी प्रसिध्दीपत्रकाद्वारे केले आहे.

-*-*-*-*-