बालमहोत्सवाचे पालकमंत्री बबननराव लोणीकर यांच्या हस्ते उदघाटन संपन्न

            जालना, दि. 14 – महिला व बालविकास विभागाच्यावतीने जिल्हा क्रीडा संकुल येथे आयोजित करण्यात आलेल्या चाचा नेहरु बालमहोत्सवाचे उदघाटन राज्याचे पाणी पुरवठा व स्वच्छता मंत्री तथा जिल्ह्याचे पालकमंत्री बबबनराव लोणीकर यांच्या हस्ते संपन्न झाले.

            यावेळी महाराष्ट्र बालहक्क आयोगाचे अध्यक्ष प्रवीण घुगे, जिल्हा महिला व बालविकास असधिकारी श्रीमती एस.डी. लोंढे, बालकल्याण समितीचे अध्यक्ष संजय काळबांडे, बालकल्याण समिती सदस्या अनया अग्रवाल, श्री गुंजाळ, श्री चौरे, बालन्यायमंडळाचे सदस्य रोजकोमल ओहोळ, श्रीमती ज्योती देशमुख आदींची उपस्थिती होती.

            पालकमंत्री श्री लोणीकर म्हणाले की, अनाथ बालकांच्या शिक्षणाची सर्वस्वी जबाबदारी शासनाने घेतली असुन शिक्षणपासुन एकही बालक वंचित राहू नये यासाठी आपण सातत्याने प्रयत्नशिल आहोत.  जिल्ह्यात अनाथ बालकांचे पालन पोषण करण्यासाठी कार्यरत असलेल्या  बालगृहांच्या समस्या प्राधान्याने सोडविण्याबरोबरच समाजातील शेतकरी व कामगारांच्या मुलांना दर्जेदार शिक्षण मिळुन चांगल्या हुद्यावर जावे अशी अपेक्षाही पालकमंत्री श्री लोणीकर यांनी यावेळी व्यक्त केली.

            बालहक्क आयोगाचे अध्यक्ष प्रवीण घुगे यांनी ससा व कासवाच्या शर्यतीची गोष्ट सांगुन जीवनात यशस्वी होण्यासाठी बुद्धीचातुर्य किती महत्वाचे असते हे पटवुन देत स्वत:ला कधीही कमी न लेखता यशस्वी होण्यासाठी प्रयत्न करत रहावे, असेही त्यांनी यावेळी सांगितले.

            बालकल्याण समितीचे अध्यक्ष संजय काळबांडे म्हणाले की,  अनाथ व निराधार बालकांना समाजाच्या प्रवाहात आणणे आवश्यक असुन बालमहोत्सवासारखे कार्यक्रम बालकांमधील गुणांना वाव मिळवुन देतात, असेही त्यांनी यावेळी सांगितले.

            कार्यक्रमाच्या प्रास्ताविकात श्रीमती लोंढे यांनी बालमहोत्सव आयोजनामागची भूमिका सविस्तरपणे विषद केली.

            कार्यक्रमाचे सुत्रसंचलन तालुका संरक्षण अधिकारी अमोल फदाट यांनी केले तर आभार बी.जे. मुंढे यांनी मानले.

            कार्यक्रमास जिल्हा महिला व बालविकास विभागातील सहाय्यक लेखाधिकारी श्री निर्मळ,      श्री गणगरे, तालुका संरक्षण अधिकारी एस.एस.गोरे, एन.ए. काकडे, अशोक भुसारी, श्रीमती मिनाक्षी शिंदे, आवेश खान, आर.एस. सुर्यवंशी, एम.झेङ फारुकी, बी.व्ही. बिराजदार, गजानन राठोड, नितीन धुमाळ,  भगवान गिते यांच्यासह मुलांची मोठ्या संख्येने उपस्थिती होती.

*******

सन 2019-20 च्या 250 कोटी 60 लक्ष 71 हजार रुपयांच्या प्रारुप आराखड्यास मंजूरी निधी वेळेत खर्च न करणाऱ्या अधिकारी, कर्मचाऱ्याविरुद्ध कडक कारवाई करणार जिल्ह्याच्या सर्वांगिण विकासासाठी यंत्रणेने मागणी केलेला 479 कोटी 4 लक्ष रुपयांचा निधी वित्तमंत्र्यांकडून मंजुर करुन घेणार - पालकमंत्री बबनराव लोणीकर

             जालना दि. 14 – जिल्हा वार्षिक योजना (सर्वसाधारण)  सन 2019-20 साठी 175 कोटी 90 लाख रुपयाच्या, अनुसुचित जाती उपयोजनेसाठी 74 कोटी 70  लाख तर आदीवासी उपयोजनेच्या 2 कोटी 76 लाख 71 हजार रुपयांच्या प्रारुप आराखड्यास जिल्हा नियोजन समितीच्या बैठकीत मंजूरी देण्यात आली. सन 2018-19 मध्ये मंजूर असलेला निधी पूर्णपणे विहित वेळेत खर्च करण्याचे निर्देश देत निधी वेळेत खर्च न करणाऱ्या अधिकारी, कर्मचाऱ्यांविरुद्ध कडक कारवाई करण्याचा इशाराही पालकमंत्री बबनराव लोणीकर यांनी दिला.

            जिल्हाधिकारी कार्यालयाच्या नियोजन समितीच्या हॉलमध्ये जिल्हा नियोजन समितीची बैठक पालकमंत्री बबनराव लोणीकर यांच्या अध्यक्षतेखाली संपन्न झाली.

            यावेळी व्यासपीठावर राज्याचे पशुसंवर्धन, दुग्धविकास, मस्त्यव्यवसाय व वस्त्रोद्योग राज्यमंत्री अर्जुनराव खोतकर, जिल्हा परिषदेचे अध्यक्ष अनिरुद्ध खोतकर, आमदार राजेश टोपे, आमदार नारायण कुचे, वैधानिक विकास महामंडळाचे सदस्य श्री नागरे, जिल्हाधिकारी रवींद्र बिनवडे, जिल्हा परिषदेच्या मुख्य कार्यकारी अधिकारी निमा अरोरा, प्र.जिल्हा पोलीस अधीक्षक समाधान पवार, अपर जिल्हाधिकारी प्रकाश खपले, निवासी उपजिल्हाधिकारी राजेश जोशी, जिल्हा नियोजन अधिकारी वै.र. कुलकर्णी आदींची प्रमुख उपस्थिती होती.

            पालकमंत्री श्री लोणीकर म्हणाले सन 2019-20 जिल्हा वार्षिक योजनेतून  सर्वसाधारण घटकांसाठी 175 कोटी 90 लक्ष रुपयांपैकी केंद्र पुरस्कृत योजनांसाठी 68 कोटी, मुख्यमंत्री ग्रामसडक योजनेसाठी 26 कोटी 38 लक्ष, नैसर्गिक आपत्ती व टंचाईसाठी 17 कोटी 60 लक्ष, नाविन्यपुर्ण योजनेसाठी 8 कोटी 94 लक्ष तर जिल्ह्यातील इतर विकासकामांसाठी 54 कोटी 10 लक्ष रुपयांची तरतूद करण्यात आली आहे.  यामध्ये गाभाक्षेत्रासाठी 116 कोटी 12 लक्ष रुपये तर बिगर गाभाक्षेत्रासाठी 16 कोटी 94 लक्ष रुपयांची तरतूद करण्यात आली आहे.

            सन 2018-19 या वर्षात 277 कोटी 76 लक्ष रुपये मंजुर करण्यात आले होते.  त्यापैकी प्राप्त झालेल्या 209 कोटी रुपयांपैकी 83 कोटी 40 लक्ष यंत्रणांना देण्यात आलेल्या निधीपैकी डिसेंबरअखेरपर्यंत 76 कोटी 40 लक्ष रुपये विविध यंत्रणांनी विकासकामांवर खर्च केले असल्याचे सांगत जिल्ह्याच्या सर्वांगिण विकासासाठी शासनामार्फत देण्यात आलेला निधी वेळेत खर्च करण्याची जबाबदारी सर्व यंत्रणांची आहे.  जिल्ह्याच्या विकासात कुठल्याही प्रकारची तडजोड स्वीकारणार नसल्याचे सांगुन यंत्रणांनी विहित वेळेत संपुर्ण निधी विहित वेळेत खर्च होईल, याची दक्षता घेण्याचे निर्देशही पालकमंत्री श्री लोणीकर यांनी यावेळी दिले.

            शासनाने जालना जिल्ह्यास दरवर्षी साडेचार हजार सिंचन विहिरी उभारण्याचे उद्दिष्ट दिले होते.  गेल्या काळात केवळ दोन हजार विहिरी करण्यात आल्या आहेत.  यासंदर्भात मंत्री जयकुमार रावल यांच्या अध्यक्षतेखाली मुंबई येथे बैठक आयोजित करुन जिल्ह्यासाठी 18 हजार सिंचन विहिरी मंजुर करुन घेतल्या आहेत.  अधिकाऱ्यांच्या उदासिनतेमुळे गतकाळात या विहिरी होऊ  न शकल्याची खंत व्यक्त करत ऑनलाईन मस्टर भरण्याची जबाबदारी ग्रामसेवकांची असुन गटविकास अधिकाऱ्यांनीही यामध्ये वैयक्तिक लक्ष घालुन या सिंचन विहिरी गतीने पुर्ण करण्याचे निर्देश देत या कामात दिरंगाई करणाऱ्या अधिकारी, कर्मचाऱ्यांविरुद्ध कारवाई करण्याचे निर्देशही पालकमंत्री श्री लोणीकर यांनी यावेळी दिले.

            अवैधरित्या वाळु उत्खनन व वहन करणाऱ्याविरुद्ध कडक कारवाई करण्याच्या सुचना मुख्यमंत्र्यांनी दिलेल्या असल्याचे सांगत जिल्ह्यात अवैध वाहतुक व वहन करणाऱ्याविरुद्ध तसेच वाळुची चोरी करणाऱ्याबरोबरच त्याला मदत करणाऱ्या अधिकाऱ्याविरुद्ध कडक कारवाईचे निर्देशही पालकमंत्री श्री लोणीकर यांनी यावेळी दिले.

            पशुसंवर्धन, दुग्धविकास, मस्त्यव्यवसाय व वस्त्रोद्योग राज्यमंत्री अर्जुनराव खोतकर म्हणाले की, यंदा जिल्ह्यात दुष्काळी परिस्थिती असून या परिस्थितीवर मात करण्यासाठी अनेक उपाययोजना राबविण्यात येत आहेत. जनतेला पिण्याचे पाणी, रोजगार हमीची कामे, आणि जनावरांना चारा उपलब्ध करुन देण्यास प्राधान्य देऊन मागणीनुसार टँकरद्वारे पाणी पुरवठा करण्याच्या सुचना त्यांनी यावेळी उपस्थित अधिकाऱ्यांना केल्या.

            यावेळी जिल्हा परिषदेचे अध्यक्ष अनिरुद्ध खोतकर आमदार राजेश टोपे, आमदार नारायण कुचे, वैधानिक विकास महामंडळाचे सदस्य श्री नागरे जि.प.चे उपाध्यक्ष सतीष टोपे, नगराध्यक्षा श्रीमती संगीता गोरंट्याल यांच्यासह उपस्थित सदस्यांनी जिल्ह्याच्या विकासासंदर्भात उपयुक्त अशा सुचना मांडल्या.

            बैठकीचे प्रास्ताविक जिल्हा नियेाजन अधिकारी वै.र. कुलकर्णी यांनी केले.

            बैठकीस सर्व जिल्हा नियेाजन समितीचे सर्व अशासकीय सदस्य, तसेच विविध यंत्रणांचे प्रमुख अधिकारी उपस्थित होते.

*******

मुख्यमंत्री देवेंद्र फडणवीस यांनी व्हिडीओ कॉन्फरन्सद्वारे लाभार्थ्यांशी साधला संवाद शासनाच्या योजनांमुळे शेतीमध्ये समृद्धता आल्याची शेतकऱ्यांनी व्यक्त केली भावना

            जालना, दि. 14 – शेतीशी निगडीत असलेल्या शासकीय योजनांचा लाभ घेतलेल्या जालना जिल्ह्यातील वैजिनाथ साहेबराव फुके, उमेरखेडा ता. भोकरदन, आसाराम रामकृष्ण बोराडे पाटोदा       ता. मंठा, सुरेश पंडितराव काळे, वडीगोद्री ता. अंबड, दीपक रंगनाथ म्हस्के, वरुड ता. जालना, कृष्णा विठ्ठल उबाळे, पळसखेडा मुर्तड ता. भोकरदन, उमेश अंकुशराव फुके, उमरखेड ता. भोकरदन या लाभार्थ्यांना शेतीशी निगडीत विविध योजनेअंतर्गत लाभ मिळाल्याने मुख्यमंत्री देवेंद्र फडणवीस यांनी त्यांच्याशी व्हीडीओ कॉन्फरन्सद्वारे लोकसंवाद कार्यक्रमातून संवाद साधून शासनाकडून मिळालेल्या लाभाबाबत  आस्थेवाईकपणे विचारपूस केली. यावेळी उपस्थित शेतकऱ्यांनी शासनाच्या या योजनांमुळे शेतीमध्ये समृद्धता आल्याची भावना मुख्यमंत्र्यांकडे व्यक्त केली.

            मुख्यमंत्री देवेंद्र फडणवीस यांनी शासनामार्फत ट्रॅक्टर खरेदीसाठी देण्यात आलेले अनुदान ऑनलाईन थेट खात्यात मिळाले काय ? अनुदान मिळवण्यासाठी काही अडचणी आल्या का असा प्रश्न विचारताच आसाराम रामकृष्ण बोराडे यांनी साहेब मी माळकरी माणुस आहे खोटे बोलणार नाही अनुदान थेट माझ्या खात्यात जमा झाले यासाठी मला कुठलाही त्रास सहन करावा लागला नसल्याचे सांगत केवळ 15 दिवसात ट्रॅक्टर खरेदीसाठी एक लाख पंचवीस हजार रुपये मिळाले.  यामुळे शेतीच्या मशागतीचे कामे वेळेत व कमी खर्चात करणे सोईचे झाले असल्याचे बोराडे यांनी सांगितले.

            भोकरदन तालुक्यातील उमरखेडा या गावातील शेतकरी वैजिनाथ फुके मुख्यमंत्र्यांशी बोलताना म्हणाले की, मी गरीब कुटुंबातील असुन एकट्याने शेती करणे परवडत नसल्याने गटशेती करतो. बीजोत्पादनासाठी 10 गुंठ्यामध्ये शेडनेटचा लाभ मिळाला. शेडनेटच्या माध्यमातुन मिर्ची पीक घेतले व यातून तीन लक्ष रुपयांचा लाभ मला मिळाला. मागेल त्याला शेततळे योजनेमधुन 50 हजार रुपये अस्तरीकरणासाठी 75 हजार रुपयेही मला मिळाले असुन शासनाच्या या योजनांमुळे माझ्या आर्थिक उत्पन्नात भर पडुन माझे जीवन सुकर झाले असल्याची भावनाही त्यांनी यावेळी व्यक्त केली.

            अत्यल्प पावसामुळे कापुस पिकाचे अपेक्षित उत्पन्न मिळाले नाही परंतू  प्रधानमंत्री पीक विमा योजनेच्या माध्यमातुन 73 हजार 800 रुपयांचा विमा मिळाल्यामुळे मशागतीसाठी झालेला माझा खर्च निघाला. तसेच फळपीक योजनेच्या माध्यमातुन 1 लाख 18 हजार रुपयांचे अनुदान मिळाल्याने मी शासनाचा आभारी असल्याची भावना अंबड तालुक्यातील वडीगोद्री या गावातील शेतकरी सुरेश पंडितराव काळे यांनी व्यक्त केली.

            माझी 25 एकर शेती असुन पाच एकरवर द्राक्ष पिकाची लागवड केली आहे.  या पिकासाठी आधुनिक औजारांची आवश्यकता होती.  शासनाच्या राष्ट्रीय अन्न सुरक्षा योजनेतुन लाभ मिळाल्याने मोठा लाभ झाल्याची भावना वरुड ता. जालना येथील शेतकरी दीपक रंगनाथ म्हस्के यांनी व्यक्त केली. आमचे असलेले म्हणणे थेट मुख्यमंत्री महोदयांपर्यंत पोहोचविण्याची संधी लोकसंवाद कार्यक्रमातुन मिळाल्याचा आनंद व्यक्त करत शासनाचे आभारही त्यांनी यावेळी व्यक्त केले. 

            कृष्णा विठ्ठल उबाळे पळसखेड मुर्तड ता. भोकरदन येथील शेतकरी कृष्णा विठ्ठल उबाळे यांना मागेल त्याला शेततळे या योजनेचा लाभ मिळाल्याने 50 हजारावरील उत्पन्न 3 लाखापर्यंत गेल्याने शासनाचे आभार व्यक्‍ केले तर भोकरदन तालुक्यातील उमरखेडा या गावातील शेतकरी उमेश अंकुशराव फुके यांनी एचडीएफसी बँकेकडून चार लक्ष रुपयांचे कर्ज घेतले होते. परिस्थिती जेमतेम असल्याने कर्जाची परतफेड करणे शक्य नव्हते परंतू छत्रपती शिवाजी महाराज शेतकरी सन्मान योजनेच्या माध्यमातुन दीड लाख रुपयांचे कर्ज माफ झाल्याने मोठा आधार मिळाल्याची भावना त्यांनी यावेळी मुख्यमंत्र्यांकडे लोकसंवाद कार्यक्रमात व्यक्त केली.

            चर्चेदरम्यान मुख्यमंत्र्यांनी शेतकऱ्यांना अनुदानासाठी कोणाला पैसे द्यावे लागतात का, असा थेट प्रश्न विचारला. त्यावर बहुतांश शेतकऱ्यांनी शेतीच्या कुठल्याही अनुदानाची रक्कम थेट बँक खात्यात जमा होते. ऑनलाईनमुळे भ्रष्टाचाराला आळा बसल्याचे शेतकऱ्यांनी यावेळी स्पष्ट केले.

            यावेळी मुख्यमंत्र्यांनी राज्यातील अनेक जिल्ह्यांतील लाभार्थ्यांशी लोकसंवाद कार्यक्रमातून संवाद साधला.

            जिल्हाधिकारी रवींद्र बिनवडे यांच्या मार्गदर्शनाखाली लोकसंवाद कार्यक्रमाचे समन्वयक जिल्हा पुरवठा अधिकारी राजीव नंदकर यांच्यासह जिल्हा अधीक्षक कृषि अधिकारी विजय माईनकर, माहिती सहाय्यक अमोल महाजन व लाभार्थी यावेळी उपस्थित होते.

*******

लोकराज्यच्या ‘खेलो इंडिया’ विशेषांकाचे जिल्हा कोषागार अधिकारी श्रीमती थोरात यांच्या हस्ते प्रकाशन

           जालना, दि.8: माहिती व जनसंपर्क महासंचालनालयामार्फत प्रसिद्ध केल्या जाणाऱ्या लोकराज्यच्या ‘खेलो इंडिया’ विशेषांकाचे जिल्हा कोषागार अधिकारी श्रीमती वैशाली थोरात यांच्या हस्ते प्रकाशन करण्यात आले.

            यावेळी अप्पर कोषागार अधिकारी गणेश खोद्रे, माहिती सहाय्यक अमोल महाजन, राजेंद्र वाणी, अनिल परदेशी, आशा नरवडे, शाम मारवाडे उपस्थित होते.

            या विशेषांकाचे अतिथी संपादक असलेल्या शालेय शिक्षण, क्रीडा व युवक कल्याण, उच्च व तंत्रशिक्षण, मराठी भाषा, सांस्कृतिक कार्य, अल्पसंख्याक विकास व वक्‌फ मंत्री विनोद तावडे यांनी       8 ते 20 जानेवारी,2019 दरम्यान पुणे येथे होत असलेल्या खेलो इंडिया या उपक्रमाबद्दल संपादकीय मधून प्रकाश टाकला आहे. अंकामध्ये मुख्यमंत्री देवेंद्र फडणवीस, केंद्रीय राज्यमंत्री कर्नल राज्यवर्धन सिंह राठोड,  सचिन तेंडुलकर यांच्यासह मान्यवरांनी खेळाबद्दलचे महत्व विषद केले आहे. 

            महाराष्ट्र शासनाच्या माहिती व जनसंपर्क महासंचालनालयामार्फत प्रकाशित होत असलेला लोकराज्य हा अत्यंत वाचनीय असुन राज्य लोकसेवा व केंद्रीय लोकसेवा आयोगासह स्पर्धा परीक्षेची तयारी करणाऱ्या विद्यार्थ्यांसाठी हा अंक अत्यंत उपयुक्त असल्याचे सांगत प्रत्येकाने लोकराज्य मासिकाचे वर्गणीदार व्हावे, असे आवाहनही श्रीमती थोरात यांनी यावेळी केले.

*******

जिल्हा माहिती कार्यालयात दर्पण दिन साजरा

            जालना, दि. 6 –  दर्पण दिनानिमित्त जिल्हा माहिती कार्यालयात पत्रकार किशोर आगळे तसेच माहिती सहाय्यक अमोल महाजन यांनी बाळशास्त्री जांभेकर यांच्या प्रतिमेस पुष्पहार अर्पण करुन अभिवादन केले.  

            याप्रसंगी संपादक सर्वश्री कृष्णा पठाडे, बाबासाहेब डोंगरे, बाबासाहेब कोलते, श्री दिक्षित, ओमप्रकाश शिंदे, शेख मुसा, आशिष रसाळ,श्री बावणे, नरेंद्र जोगड, शांतीलाल बन्सवाल, संतोष गरड, राहुल वाव्हुळे, छायाचित्रकार शरद खानापुरे, जिल्हा माहिती कार्यालयातील राजेंद्र वाणी, अनिल परदेशी, संतोष पाखरे, विष्णु जायभाये, प्रतिभा इंगळे आदींनीही बाळशास्त्री जांभेकर यांच्या प्रतिमेस पुष्पहार अर्पण करुन अभिवादन केले. 

पत्रकारांच्या समस्या सोडविण्यासाठी मंत्रालयीन स्तरावर पाठपुरावा करणार पत्रकारांनी वाईट प्रवृत्तीबरोबरच सकारात्मक गोष्टीबद्दल लिखाण करुन समाजजागृती करावी – पालकमंत्री बबनराव लोणीकर

            जालना, दि. 6 -  समाजातील उपेक्षित, वंचित घटकांना न्याय मिळवून देण्याचे काम पत्रकार आपल्या लेखणीच्या माध्यमातून करत असतात. अशा पत्रकारांच्या असलेल्या समस्या मंत्रालयीन स्तरावर पाठपुरावा करुन त्या सोडविण्यासाठी सर्वतोपरी प्रयत्न करु. तसेच पत्रकारांनी समाजामधील वाईट प्रवृत्तीबरोबरच सकारात्मक गोष्टीबद्दल लिखाण करुन समाजजागृती करण्याचे आवाहन राज्याचे पाणी पुरवठा व स्वच्छता मंत्री तथा जिल्ह्याचे पालकमंत्री बबनराव लोणीकर यांनी केले.  

            येथील मातोश्री लॉन्स येथे जिल्ह्यातील पत्रकारांसाठी दर्पण दिनाचे आयोजन करण्यात आले होते.  त्याप्रसंगी उपस्थित पत्रकारांशी संवाद साधताना ते बोलत होते.

            व्यासपीठावर जिल्हा परिषदेचे माजी उपाध्यक्ष राहुल लोणीकर, रामेश्वर भांदरगे, दिलीप तौर, भुजंगराव गोरे, आयेशा खान मुलानी, विश्वजित खरात, ज्येष्ठ पत्रकार रमेश खोत, ज्येष्ठ छायाचित्रकार बाबुराव व्यवहारे, अर्पण गोयल, किशोर आगळे, कैलास फुलारी, संदीप बदनापुरकर, रवी दानम, अभयकुमार यादव, पारसनंद यादव,  भगवान साबळे, फकीरा देशमुख, शामसुंदर चित्तोडा, मनोज देशपांडे, नरेंद्र जोगड, श्री तारगे आदींची उप‍स्थिती होती.

पालकमंत्री श्री लोणीकर म्हणाले की, बाळशास्त्री जांभेकरांनी अत्यंत प्रतिकुल परिस्थितीमध्ये ब्रिटीश राजवटीविरुद्ध आपल्या दर्पण या वृत्तपत्रामधून प्रखर असे लिखाण करुन स्वातंत्र्य प्राप्तीसाठी जनतेमध्ये एक चळवळ निर्माण केली होती. त्यांचाच आदर्श घेऊन पत्रकारांनी समाजामधील दुष्ट प्रवृत्तीबद्दल लिखाण करावे.  आजच्या स्पर्धेच्या युगात वृत्तपत्र चालविणे अत्यंत जिकीरीचे बनले असून पत्रकार हे निस्वार्थपणे समाजासाठी लढत असतात.  अशा पत्रकारांना प्रोत्साहन मिळावे या उद्देशाने जिल्ह्यातील सर्व पत्रकारांसाठी गेल्या चार वर्षापासुन आपण दर्पण दिनानिमित्त कार्यक्रम आयोजित करुन पत्रकारांचा सन्मान करत आहोत.   राज्य शासनही पत्रकारांसाठी योजना राबवित असून पत्रकारांना गंभीर आजार झाल्यास, अपघात झाल्यास किंवा अकस्मात निधन झाल्यास त्यांच्या कुटुंबियांना मदत करण्यासाठी शंकरराव चव्हाण सुवर्णमहोत्सवी पत्रकार कल्याण निधीतून मदत केली जाते.  या कल्याण निधीची रक्कम 5 कोटी रुपयांवरुन 10 कोटी रुपये करण्यात आली असुन आतापर्यंत एक कोटी 16 लाख रुपयांचे पत्रकारांना अर्थसहाय्य करण्यात आले आहे.  राज्यात जवळपास 3 हजार पत्रकारांना अधिस्वीकृती पत्रिका प्रदान केल्या असल्याचे सांगत महात्मा फुले जनआरोग्य योजनेत पत्रकारांचा समावेश केला असुन वृत्तपत्रांच्या जाहिरात दरांमध्येसुद्ध भरीव अशी वाढ केली असल्याचेही पालकमंत्री श्री लोणीकर यांनी यावेळी सांगितले.

            आजच्या आधुनिक तंत्रज्ञानाच्या युगात सोशल मिडिया, इलेक्ट्रॉनिक मिडियाच्या माध्यमातून जनतेला बसल्या ठिकाणी जगात चाललेल्या गोष्टींची माहिती काही क्षणात मिळत असली तरी प्रिंट मिडियाचे महत्तव आजही तेवढेच असल्याचेही पालकमंत्र्यांनी यावेळी सांगितले.

            याप्रसंगी ज्येष्ठ पत्रकार सर्वश्री रमेश खोत, बाबुराव व्यवहारे, अभयकुमार यादव, पारसनंद यादव आदींचीही समयोचित भाषणे झाली.

            या कार्यक्रमास संपूर्ण जिल्ह्यातुन उपस्थित राहिलेल्या पत्रकारांचा पालकमंत्री श्री लोणीकर यांच्या हस्ते शाल व पुष्पहार देऊन सत्कार करण्यात आला.

            कार्यक्रमास जिल्ह्यातील विविध वृत्तपत्राचे संपादक, कार्यकारी संपादक, जिल्हा प्रतिनिधी, तालुका वार्ताहर, इलेक्ट्रॉनिक मिडियाचे स्ट्रिंजर, छायाचित्रकार मोठ्या संख्येने उपस्थित होते. *****

मंत्री महादेव जानकर व राज्यमंत्री अर्जुनराव खोतकर यांनी इव्‍हीएम, व्‍हीव्‍हीपॅटची घेतली माहिती पशुसंवर्धन विभागाचा घेतला आढावा

जालना, दि. 21 - जिल्‍हयात २० डिसेंबर ते २० जानेवारी दरम्‍यान इव्‍हीएम, व्‍हीव्‍हीपॅट जनजागृती मोहिम राबविणे सुरू असून याचाच एक भाग   म्‍हणुन आज दिनांक २१ डिसेंबर रोजी जालना जिल्‍हा दौ-यावर आलेले राज्‍याचे पशुसंवर्धन, दुग्‍ध विकास, मस्‍त्‍य व्‍यवसाय मंत्री महादेव जानकर व  पशुसंवर्धन, दुग्‍ध विकास, मस्‍त्‍य व्‍यवसाय, वस्‍त्रोदयोग राज्‍यमंत्री अर्जुनराव खोतकर यांनी जिल्‍हाधिकारी कक्षात इव्‍हीएम, व्‍हीव्‍हीपॅट विषयी माहिती घेतली व स्‍वत या मशिनवर मतदानाचे प्रात्‍यक्षिक केले.

या वेळी जिल्‍हापरिषद अध्‍यक्ष अनिरूद्ध खेातकर, जिल्‍हाधिकारी रविंद्र बिनवडे, जि. प. मुख्‍य कार्यकारी अधिकारी निमा अरोरा, उपजिल्‍हा निवडणुक अधिकारी संगीता सानप, पंडितराव भुतेकर, जिल्हा परिषदेच्या ग्रामीण पाणी पुरवठा विभागाचे कार्यकारी अभियंता डी.एच. डाकोरे  यांची उप‍‍स्थिती होती

दरम्यान पशुसंवर्धन, दुग्‍ध विकास, मस्‍त्‍य व्‍यवसाय मंत्री महादेव जानकर व  पशुसंवर्धन, दुग्‍ध विकास, मस्‍त्‍य व्‍यवसाय, वस्‍त्रोदयोग राज्‍यमंत्री अर्जुनराव खोतकर यांनी जिल्हाधिकारी कार्यालयाच्या सभागृहात पशुसंवर्धन विभागाचा आढावा घेऊन चारानिर्मितीवर भर देऊन गाळपेऱ्यामध्ये चाऱ्याची पिके घ्यावीत, चारानिर्मितीसाठी मागेल त्या शेतकऱ्याला बियाणे उपलब्ध करुन देण्यात यावीत.  मराठवाडा विकास पॅकेजअंतर्गत  आढावा घेऊन बँकांनी अधिकाधिक कर्जप्रकरणे मंजुर करण्यासाठी एक बैठक आयोजित करण्याचे निर्देश जालना जिल्ह्यात भरविण्यात येणाऱ्या पशुप्रदर्शनाचे काटेकोर नियोजन करण्याच्या सुचनाही त्यांनी यावेळी उपस्थित अधिकाऱ्यांना केल्या.

यावेळी पशुसंवर्धन उपायुक्त डॉ.एल.के. कुरेवाड, जिल्हा पशुसंवर्धन अधिकारी एच.पी. गुट्टे, सहाय्यक आयुक्त जगदिश बुकतरे, डॉ. अनिलकुमार दुबे, डॉ. आसरार अहेमद, श्री आदमाने, श्री सुरवे आदींची उपस्थिती होती.

*******