जिल्हा परिषद, पंचायत समिती निवडणूक 2017 जिल्ह्यात सरासरी 70.69 टक्के मतदान 7 लाख 88 हजार 372 मतदारांनी बजावला मतदानाचा हक्क सर्वात जास्त 76.27 टक्के मतदान जाफ्राबाद तालुक्यात तर सर्वात कमी 66.36 टक्के मंठा तालुक्यामध्ये

जालना, दि. 17 –  जिल्हा परिषद, पंचायत समिती निवडणूक -2017 साठी जिल्ह्यात दि. 16 फेब्रुवारी, 2017 रोजी सकाळी 7-30 ते सायंकाळी 5-30 या वेळेत मतदान घेण्यात आले. जिल्ह्यात सरासरी 70.69 टक्के एवढे मतदान झाले असून एकूण 11 लाख 15 हजार 190 मतदारांपैकी 7 लाख 88 हजार 372 एवढ्या मतदारांनी मतदानाचा हक्क बजावला असल्याची माहिती निवडणूक विभागाकडून देण्यात आली असून तालुकानिहाय मतदानाची आकडेवारी खालीलप्रमाणे देण्यात येत आहे. कंसामध्ये एकूण मतदारांची संख्या आहे.

            भोकरदन तालुक्यामध्ये 80 हजार 300 पुरुष मतदारांनी तर 68 हजार 595 स्त्री मतदारांनी मतदानाचा हक्क बजावला (209215), जाफ्राबाद 43 हजार 531 पुरुष, 38 हजार 636 स्त्री (107726),                   बदनापुर 41 हजार 566 पुरुष, 35 हजार 724 स्त्री (103174), जालना 62 हजार 565 पुरुष, 53 हजार 361 स्त्री (170386), मंठा 36 हजार 105  पुरुष, 31 हजार 02 स्त्री (101120), परतूर 39 हजार 725 पुरुष, 34 हजार 968 स्त्री (103971), घनसावंगी 57 हजार 401 पुरुष, 49 हजार 647 स्त्री (154855) तर अंबड तालुक्यामध्ये 62 हजार 200 पुरुष मतदारांनी तर 53 हजार 46 स्त्री मतदारांनी मतदानाचा हक्क बजावला (164743). आठही तालुक्यात असलेल्या 5 लाख 89 हजार 238 पुरुष मतदार व 5 लाख 25 हजार 952 स्त्री मतदार असे एकूण 1115190 एवढ्या मतदारांपैकी 4 लाख 23 हजार 393 पुरुष मतदार व 3 लाख 64 हजार 979 स्त्री मतदार असे एकूण 7 लाख 88 हजार 372 एवढ्या मतदारांनी आपल्या मतदानाचा हक्क बजावला.    जिल्हा परिषद पंचायत समिती निवडणुकीमध्ये सर्वात जास्त 76.27 टक्के मतदान जाफ्राबाद तालुक्यामध्ये झाले तर सर्वात कमी 66.36 टक्के मंठा तालुक्यामध्ये झाले.  भोकरदन तालुक्यात 71.17 टक्के, बदनापुर तालुक्यात 74.91 टक्के, जालना तालुक्यात 68 टक्के, परतूर तालुक्यात 71.84 टक्के, घनसावंगी तालुक्यात 69.13 टक्के तर अंबड तालुक्यामध्ये 69.96 टक्के मतदान झाले.

           

*******

जिल्हा परिषद व पंचायत समिती सार्वत्रिक निवडणुकीसाठी जिल्हा प्रशासन सज्ज – जिल्हाधिकारी शिवाजी जोंधळे

            जालना, – जिल्हा परिषद व पंचायत समिती सार्वत्रिक निवडणुकीसाठी 16 फेब्रुवारी, 2017 रोजी मतदान होत असून या निवडणुका मुक्त, निर्भय व पारदर्शकपणे पार पाडण्यासाठी जिल्हा प्रशासनामार्फत सर्वतोपरी तयारी करण्यात आली असल्याची माहिती जिल्हाधिकारी शिवाजी जोंधळे यांनी दिली.

            जिल्हा परिषद व पंचायत समिती सार्वत्रिक निवडणुक 2017 च्या अनुषंगाने जिल्हाधिकारी कार्यालयाच्या सभागृहात आयोजित करण्यात आलेल्या पत्रकार परिषदेमध्ये माहिती देताना श्री जोंधळे बोलत होते.

            यावेळी जिल्हा पोलीस अधीक्षक श्रीमती ज्योतिप्रिया सिंह, उपजिल्हाधिकारी (सामान्य प्रशासन) डॉ. एन.आर. शेळके, जिल्हा माहिती अधिकारी एस.के. बावस्कर आदींची उपस्थिती होती.

            यावेळी जिल्हाधिकारी श्री जोंधळे म्हणाले की, जिल्हा परिषदेच्या एकूण 56 गटासाठी 139 स्त्री तर 131 पुरुष असे एकूण 270 उमेदवार तर पंचायत समितीच्या 112 गणासाठी 259 स्त्री व 239 पुरुष असे एकूण 498 उमेदवार निवडणूक लढविणार आहेत.  जिल्ह्यात 5 लाख 22 हजार स्त्री मतदार तर 5 लाख 85 हजार 313 असे एकूण 11 लाख 7 हजार 813 मतदार आपल्या मतदानाचा हक्क बजावणार आहेत.   या निवडणुकीसाठी 2 हजार 898 कंट्रोल व बॅलेट युनिट पुरविण्यात आले आहेत. निवडणुकीसाठी 133 क्षेत्रीय अधिकारी, 1 हजार 497 मतदान केंद्राध्यक्ष, 4 हजार 434 मतदान अधिकारी असे एकूण 6 हजार 119 अधिकारी व कर्मचाऱ्यांची नियुक्ती करण्यात आलेली आहे. आचारसंहितेची कडक अंमलबजावणी व्हावी यासाठी प्रत्येक तालुका स्तरावर एक व जिल्हाधिकारी कार्यालयात एक असे एकूण 9 आचारसंहिता कक्षाची स्थापना करण्यात आली असून प्रत्येक तालुक्याच्या ठिकाणी प्रत्येकी दोन भरारी पथकाची स्थापना करण्यात आली आहे.  जिल्ह्यात एकूण 18 चेकपोस्ट, 17 व्हिडीओ सर्व्हीलेन्स पथक व 9 खर्च तपासणी पथके कार्यरत असल्याची माहितीही त्यांनी यावेळी उपस्थित पत्रकारांना दिली.

            मतदानाच्या एक दिवस अगोदर दि. 15 फेब्रुवारी मतदानाचा दिवस 16 फेब्रुवारी व मतमोजणी दि. 23 फेब्रुवारी, 2017 रोजी जिल्ह्यात ड्राय डे पाळण्याच्या सुचना देण्यात आल्या असून मतदानाच्या दिवशी आठवडी बाजार बंद ठेवणे तसेच मतदारांना मतदान करता यावे यासाठी मतदानाच्या दिवशी सुट्टी जाहीर करण्याबाबत सर्व संबंधितांना सुचना देण्यात आल्या असल्याचेही जिल्हाधिकारी श्री जोंधळे यांनी यावेळी सांगितले.

            यावेळी जिल्हा पोलीस अधीक्षक श्रीमती ज्योतिप्रिया सिंह म्हणाल्या की निवडणुकीच्या काळात जिल्ह्यात कायदा व सुव्यवस्था अबाधित रहावी यासाठी पोलीस प्रशासनामार्फत चोख बंदोबस्त ठेवण्यात येणार असून या कालावधीत 9 उप विभागीय पोलीस अधिकारी, 27 पोलीस निरीक्षक, 79 सहाय्यक पोलीस निरीक्ष आणि पोलीस उपनिरीक्षक दर्जाचे अधिकाऱ्यांबरोबरच 1 हजार 152 पोलीस कर्मचारी बंदोबस्तासाठी तैनात करण्यात आले आहेत.   त्याचबरोबर बाहेर जिल्ह्यातील 115 पोलीस कर्मचारी, 240 नवप्रशिक्षणार्थी, एक राज्य राखीव दलाची कंपनी व 600 होमगार्ड यांचीसुद्धा नियुक्ती निवडणुकीसाठी करण्यात आली आहे.           

            निवडणुकीच्या कालावधीमध्ये 107 कलमान्वये 710, कलम 110 अन्वये 165 इसमांवर प्रभावीपणे प्रतिबंधात्मक कारवाई करण्यात आली असून कलम 149 प्रमाणे 454 इसमांना नोटीसा बजावण्यात आल्या आहेत.  त्याचबरोबर कलम 144 (2) अन्वये 8 इसमांवर कारवाई करण्यात आली असून अवैधरित्या दारुची विक्री व वाहतुक आणि साठवणूक करणाऱ्यांच्या संदर्भात 296 गुन्हे दाखल करण्यात आले असल्याची माहितीही पोलीस अधीक्षकांनी यावेळी पत्रकारांना दिली. मतदारांनी कोणाच्याही दबावाला बळी न पडता मतदानाचा हक्क बजावण्याचे आवाहनही श्रीमती ज्योतिप्रिया सिंह यांनी यावेळी केले.

            या पत्रकार परिषदेस विविध वर्तमानपत्राचे प्रतिनिधी, संपादक तसेच इलेक्ट्रॉनिक मिडियाचे प्रतिनिधी उपस्थित होते.

*******

भारतीय प्रजासत्ताक दिनानिमित्त पालकमंत्री बबनराव लोणीकर यांच्या हस्ते मुख्य शासकीय ध्वजारोहण संपन्न

जालना, दि. 26 –  भारतीय प्रजासत्ताक दिनाच्या 67 व्या वर्धापन दिनानिमित्त राज्याचे पाणी पुरवठा व स्वच्छता मंत्री तथा जिल्ह्याचे पालकमंत्री बबनराव लोणीकर यांच्या हस्ते पोलीस मुख्यालयाच्या मैदानावर मुख्य शासकीय ध्वजारोहण करण्यात आले. 

या कार्यक्रमास आमदार राजेश टोपे, आमदार नारायण कुचे, नगराध्यक्षा संगीता गोरंट्याल,  माजी आमदार कैलास गोरंट्याल, माजी आमदार अरविंद चव्हाण, रामेश्वर भांदरगे, विलास नाईक, जिल्हाधिकारी शिवाजी जोंधळे, जिल्हा पोलीसअधीक्षक श्रीमती ज्योतिप्रिया सिंह, जिल्हा परिषदेचे मुख्य कार्यकारी अधिकारी दीपक चौधरी, अपर जिल्हाधिकारी पी.बी. खपले, उपजिल्हाधिकारी (सामान्य प्रशासन) डॉ. एन.आर. शेळके, निवासी उपजिल्हाधिकारी राजेश इतवारे, उपजिल्हाधिकारी (निवडणूक) राजेश जोशी, जिल्हा पुरवठा अधिकारी राजू नंदकर, उप‍ विभागीय अधिकारी केशव नेटके, कार्यकारी अभियंता श्री बेलापट्टे आदींची प्रमुख उपस्थिती होती.

यावेळी पालकमंत्री श्री लोणीकर  यांनी परेडचे निरीक्षण केले.  परेडमध्ये पोलीस दल, राज्य राखीव पोलीस बल गट, महिला पोलीस दल, होमगार्ड, बँडपथक, पार्थ सैनिकी शाळा, ऑक्सफोर्ड इंग्लिश स्कुल, स्काऊट गाईड यांच्यासह दंगल नियंत्रण पथक, अग्निशामक दल आदींचा समावेश होता. याप्रसंगी जिल्हा आरोग्य अधिकारी, वन विभाग, जिल्हा अधीक्षक कृषी अधिकारी, निवडणूक विभागासह विविध विभागांच्या चित्ररथाचाही यामध्ये समावेश होता.

            याप्रसंगी ध्वजदिन निधी संकलनाचे उद्दिष्ट पुर्ण केल्याबद्दल जिल्हाधिकारी शिवाजी जोंधळे यांचा पालकमंत्री महोदयांच्या हस्ते सत्कार करण्यात आला. तसेच परतूर व जाफ्राबाद तालुके हागणदारीमुक्त झाल्याबद्दल स्वच्छता विभागातील अधिकारी, कर्मचारी, तंटामुक्त गाव मोहिमेध्यमे उत्कृष्ट लिखाण करणाऱ्या सतीश पाटेकर व बाबासाहेब म्हस्के या पत्रकारांचा विद्यार्थी, विद्यार्थीनींचा पालकमंत्र्यांच्या हस्ते प्रशस्तीपत्र देऊन गौरव करण्यात आला. याप्रसंगी विद्यार्थी, विद्यार्थीनींनी सांस्कृतिक कार्यक्रम सादर केले.

            कार्यक्रमाचे संचलन निशिकांत मिरकले यांनी केले.  कार्यक्रमास पदाधिकारी, अधिकारी, स्वातंत्र्य सैनिक, नागरिक, पत्रकार,विद्यार्थी, विद्यार्थीनीची मोठ्या प्रमाणात उपस्थिती होती.         

*******

मनोधैर्य योजनेंतर्गत ट्रामा टीमसाठी प्रशिक्षण संपन्न

              जालना, दि. 25 - मनोधैर्य योजनेंतर्गत बलात्कार, ऍ़सिड हल्ला, बाललैंगीक अत्याचार पिडीतांचे पुनर्वसनासाठी स्थापन करण्यात आलेल्या जिल्हा ट्रॉमा टिमसाठी जिल्हाधिकारी कार्यालयाच्या सभागृहात आयोजित प्रशिक्षणाचे उदघाटन जिल्हाधिकारी शिवाजी जोंधळे यांच्या हस्ते नुकतेच करण्यात आले.

            यावेळी व्यासपीठावर जिल्हा महिला बालविकास अधिकारी श्रीमती वर्षा पवार, जिल्हा शल्य चिकीत्सक श्रीमती सरीता पाटील, मानसोपचार तज्ञ श्री पवार, राज्य महिला आयोगाचे जिल्हा समन्वयक ॲड. पी.जे गवारे,  पियुश गडे यांची उपस्थिती होती.

यावेळी मार्गदर्शन करताना जिल्हाधिकारी शिवाजी जोंधळे म्हणाले की, पोलीस,  महिला व बालविकास विभाग, आरोग्य विभाग यांनी सामाजिक दृष्टीकोन ठेऊन संवेदनशिलपणे व तत्परनेते काम करावे. तसेच पोलीस विभागाने पिडीतांचा प्रथम खबरी अहवाल तातडीने नोंदवून घेऊन त्याची प्रत जिल्हा महिला व बालविकास अधिकारी यांच्याकडे पाठविण्याच्या सुचना देऊन मनोधैर्य योजनेसंदर्भात उपस्थितांना सविस्तर असे मार्गदर्शन केले.

राज्य महिला आयोगाचे जिल्हा समन्वयक ॲड. पी.जे गवारे यांनी मनोधैर्य योजना व बालकांचे कायदे या विषयावर मार्गदर्शन करुन उपस्थितांच्या शंकांचे निरसन केले. ॲड पियुष गडे यांनी ट्रॉमा टिमची कार्ये व भुमिका  या बद्दल माहिती विषद केली.

प्रास्ताविकात जिल्हा महिला व बालविकास अधिकारी श्रीमती वर्षा पवार यांनी मनोधैर्य योजनेची पार्श्वभूमी व सध्या जिल्ह्यात या योजनेची अंमलबजावणी कशा पद्धतीने होत आहे याबाबत सविस्तर अशी माहिती दिली.  

            मनोधैर्य योजोंतर्गत प्राप्त प्रकरणांवर केली जाणारी कार्यवाही व पोलीसांची भुमिका याबद्दल जिल्हा संरक्षण अधिकारी व्हि. पी. नागरे यांनी तर परिविक्षा अधिकारी श्री अमोल राठोड यांनी मनोधैर्य योजनेतून अनुदान वाटपाबाबत माहिती दिली.

            कार्यक्रमाचे सुत्रसंचलन विजय राठोड तर आभार समुपदेशक संतोष कऱ्हाळे यांनी मानले.  

*******

तरुणांनी अधिकाधिक संख्येने मतदान प्रक्रियेत सहभागी व्हावे- जिल्हाधिकारी शिवाजी जोंधळे

जालना, दि. 25 –  तरुण वर्ग हा देशाचा आधारस्तंभ आहे. तरुणांनी अधिकाधिक संख्येने पुढे येऊन  मतदान प्रक्रियेत सहभागी होऊन समृद्ध व सशक्त अशा लोकशाहीचा पाया अधिक मजबूत करावा असे आवाहन जिल्हाधिकारी शिवाजी जोंधळे यांनी केले.

            राष्ट्रीय मतदार दिनानिमित्त जिल्हाधिकारी कार्यालयाच्या प्रांगणात आयोजित करण्यात आलेल्या कार्यक्रमात उपस्थितांना मार्गदर्शन करताना जिल्हाधिकारी श्री जोंधळे बोलत होते.

            यावेळी व्यासपीठावर जिल्हा परिषदेचे मुख्य कार्यकारी अधिकारी दीपक चौधरी, अपर जिल्हाधिकारी पी.बी. खपले, उपजिल्हाधिकारी (निवडणूक) राजेश जोशी, जिल्हा पुरवठा अधिकारी राजू नंदकर, उप विभागीय अधिकारी केशव नेटके, निवासी उपजिल्हाधिकारी राजेश इतवारे, तहसिलदार श्री पाटील, उपशिक्षणाधिकारी श्रीमती धुपे,प्रकल्प संचालक मनोज देशमुख, नायब तहसिलदार गणेश पोलास आदींची उपस्थिती होती.

            यावेळी जिल्हाधिकारी श्री जोंधळे म्हणाले की,  भारत निवडणूक आयोगाची स्थापना 25 जानेवारी 1950 या दिवशी झाल्याने हा दिवस राष्ट्रीय मतदार दिवस म्हणून साजरा केला जातो. दिनांक 25 जानेवारी 2011 रोजी पहिला राष्ट्रीय मतदार दिवस साजरा करण्यात आला. मतदारांमध्ये जागृती निर्माण व्हावी हा मतदार दिन साजरा करण्यामागे मुख्य हेतू असल्याचे सांगत जिल्ह्यातीन भावी युवा मतदारांमध्ये मतदानाविषयी जनजागृती करण्यासाठी जिल्हा प्रशासनामार्फत संपूर्ण जिल्हाभर विविध जागृतीपर कार्यक्रमांचे आयोजन करण्यात आले आहे.  सप्टेंबर-ऑक्टोबर या कालावधीत राबविण्यात आलेल्या मोहिमेमध्ये जिल्ह्यात 25 हजार 399 नवीन मतदारांची नोंदणी करण्यात आली असल्याची माहितीही जिल्हाधिकारी श्री जोंधळे यांनी यावेळी दिली.

            संपूर्ण जगामध्ये भारतीय लोकशाही भक्कम व यशस्वी असल्याचे निवडणूक आयोगाने सिद्ध केले आहे. लोकशाहीमध्ये मतदार हा राजा आहे. लोकशाहीच्या बळकटीकरणासाठी व देशाच्या विकासासाठी मतदारांनी पुढे येऊन मतदानाचा पवित्र हक्क बजवावा असे अवाहनही जिल्हाधिकारी श्री जोंधळे यांनी यावेळी केले.

            जिल्हा परिषदेचे मुख्य कार्यकारी अधिकारी श्री चौधरी म्हणाले की, लोकशाहीने दिलेला मतदानाचा हक्क प्रत्येकाने बजवावा.  लोकशाही टिकली तरच देश टिकेल.  समाजाचे नेतृत्व मतदानाच्या माध्यमातून योग्यपणे निवडल्यास देशाचा व पर्यायाने समाजाचा विकास चांगल्या पद्धतीने होणार असल्याचे सांगत शिक्षण विभागाने शाळा, महाविद्यालयांमधून नवमतदारांना मतदानाचे महत्व पटवून द्यावे.  प्रत्येक ग्रामपंचायतीमध्ये होणाऱ्या ग्रामसभांमधून मतदानचे महत्व पटवून देण्यावर भर देण्यात येणार असल्याचेही त्यांनी यावेळी सांगितले.

            उपजिल्हाधिकारी (निवडणूक) राजेशी जोशी यांनी आपल्या प्रास्ताविकात राष्ट्रीय मतदार दिनाचे महत्व विषद करुन ‘सक्षम करूया युवा व भावी मतदार’ हे ब्रीद स्वीकारून सध्या मतदार जनजागृती अभियानाच्या माध्यमातून तरूणाईला प्रोत्साहित करण्यावर भर दिला जात असून भावी युवा मतदारांमध्ये जिल्ह्यात विविध कार्यक्रमांच्या माध्यमातून करण्यात येत असलेल्या जनजागृतीची माहिती दिली.

             यावेळी जिल्हा पुरवठा अधिकारी राजू नंदकर,उप विभागीय अधिकारी केशव नेटके यांच्यासह विद्यार्थी व विद्यार्थीनींनीही आपले मनोगत व्यक्त केले.

            राष्ट्रीय मतदार दिनानिमित्त संपूर्ण जिल्ह्यातील माध्यमिक शाळा व महाविद्यालयामध्ये घेण्यात आलेल्या वक्तृत्व स्पर्धा, निबंध स्पर्धा, रांगोळी, चित्रकला स्पर्धेमध्ये प्राविण्य मिळवलेल्या विद्यार्थी, विद्यार्थींनींचा प्रमाणपत्रे देऊन गौरव करण्यात आला.  याप्रसंगी नवमतदारांना मान्यवरांच्या हस्ते मतदान ओळखपत्राचे वाटपही करण्यात आले.  उपस्थित मतदारांना प्रतिज्ञाही देण्यात आली.

            कार्यक्रमाचे सुत्र संचलन संजय कायंदे यांनी केले तर आभार उप विभागीय अधिकारी केशव नेटके यांनी मानले.

            कार्यक्रमास अधिकारी, कर्मचारी यांच्यासह विविध शाळांचे मुख्याध्यापक, विद्यार्थी, विद्यार्थींनी यांच्यासह नागरिक मोठ्या संख्येने उपस्थित होते.

राष्ट्रीय मतदार दिनानिमित्त रॅली संपन्न

            राष्ट्रीय मतदार दिनानिमित्त भव्य अशा रॅलीचे आयोजन करण्यात आले होते. या मतदार जनजागृती अभियानांतर्गत रॅलीस अपर जिल्हाधिकारी पी.बी. खपले यांनी हिरवी झेंडी दाखवून शुभारंभ केला.
            यावेळी निवडणूक उपजिल्हाधिकारी राजेश जोशी, यांच्यासह अधिकारी, कर्मचारी उपस्थित होते. 
             रॅलीची सुरुवात गांधीचमन येथून करण्यात येऊन जिल्हाधिकारी कार्यालयाच्या प्रांगणात विसर्जित करण्यात आली.  या रॅलीमध्ये बालकामगार संस्था, सरस्वती भुवन प्रशाला, जे.ई.एस. महाविद्यालय, बद्रीनारायण बारवाले महाविद्याल, संस्कार प्रबोधिनी हायस्कूल, जिल्हा परिषद प्रशाला, शिवाजी हायस्कुल, किडस् केंब्रीज हायस्कूलमधील विद्यार्थी, विद्यार्थीनी तसेच राज्य राखीव पोलीस दलातील जवानांनी सहभाग घेतला.

******* 

अधिकारी, कर्मचाऱ्यांनी दिलेले काम चोखपणे व जबाबदारीने पार पाडावे - जिल्हाधिकारी शिवाजी जोंधळे

जालना, दि. 24 – जिल्हा परिषद व पंचायत समिती निवडणूकसाठी नियुक्त करण्यात आलेल्या सर्व अधिकारी, कर्मचाऱ्यांनी त्यांनी दिलेले काम चोखपणे व जबाबदारीने पार पाडण्याच्या सुचना जिल्हाधिकारी शिवाजी जोंधळे यांनी दिल्या.
            जिल्हा परिषद व पंचायत समिती निवडणूक 2017 साठी नियुक्त असलेल्या सर्व अधिकाऱ्यांची आढावा बैठक जिल्हाधिकारी कार्यालयाच्या सभागृहात आयोजित करण्यात आली होती.  त्याप्रसंगी उपस्थित अधिकाऱ्यांना मार्गदर्शन करताना जिल्हाधिकारी श्री जोंधळे बोलत होते.

            यावेळी उपजिल्हाधिकारी (सामान्य प्रशासन) डॉ. एन.आर. शेळके, जिल्हा अधीक्षक कृषी अधिकारी दशरथ तांभाळे, जिल्हा कोषागार अधिकारी चंद्रकांत पाटील, जिल्हा सुचना व विज्ञान अधिकारी रवींद्र पडुळकर, जिल्हा नियोजन अधिकारी रवींद्र जगताप, सहाय्यक आयुक्त, समाजकल्याण श्री शिंदे, तहसिलदार श्रीमती अनिता भालेराव, नायब तहसिलदार श्रीमती खटावकर आदींची उपस्थिती होती.

            यावेळी जिल्हाधिकारी श्री जोंधळे म्हणाले की, निवडणुकीसाठी मोठ्या प्रमाणात वाहने तसेच मनुष्यबळाची आवश्यकता भासणार आहे.  यासाठी आवश्यक तेवढी शासकीय तसेच खाजगी वाहने अधिग्रहीत करण्यात यावीत. उमेदवारांना एकाच ठिकाणी सर्व परवान्याग्या देण्याचे निर्देश निवडणूक आयोगाने दिले असल्याने तालुकास्तरावर एकखिडकीच्या माध्यमातून परवानग्या देण्याची व्यवस्था करण्यात यावी. उमेदवारांना निवडणुकीचा खर्च ऑनलाईन सादर करावयाचा असल्याने तालुकास्तरावर उमेदवारांसाठी प्रशिक्षणाचे आयोजन करण्याच्या सुचना जिल्हाधिकारी श्री जोंधळे यांनी उपस्थित अधिकाऱ्यांना केल्या.

            यावेळी निवडणुकीसाठी लागणाऱ्या ईव्हीएम मशिन्स, ‘कॉप’ (COP) सिटिझन ऑन पेट्रोल मोबाईल अॅप, आचारसंहिता यासह इतर बाबींचाही जिल्हाधिकाऱ्यांनी सविस्तर आढावा घेऊन अधिकाऱ्यांना मार्गदर्शन केले. बैठकीस निवडणुकीसाठी नियुक्त करण्यात आलेले विविध विभागाचे प्रमुख अधिकारी उपस्थित होते.

*******

जिल्हा परिषद, पंचायत समिती निवडणूक 2017 : 23 जानेवारी रोजी राजकीय पक्षांचे प्रतिनिधी व उमेदवारांसाठी बैठक व प्रशिक्षणाचे आयोजन

जालना, दि. 21 – जिल्हा परिषद व पंचायत समिती निवडणुक 2017 च्या अनुषंगाने सर्व राजकीय पक्ष व उमेदवारांसाठी सोमवार दि. 23 जानेवारी, 2017 रोजी सकाळी 11-00 वाजता जिल्हाधिकारी कार्यालयाच्या सभागृहात बैठकीचे आयोजन करण्यात आले आहे.  बैठकीनंतर इच्छुक उमेदवारांना ऑनलाईन पद्धतीने नामनिर्देशन पत्रे भरण्यासंदर्भात प्रशिक्षण देण्यात येणार आहे.

            या बैठकीस व प्रशिक्षणास सर्व राजकीय पक्षांचे प्रतिनिधी, इच्छुक उमेदवार व शासकीय, खाजगी इंटरनेट ऑपरेटर, कॅफेचालक यांनी उपस्थित रहावे, असे डॉ. एन.आर. शेळके, उपजिल्हाधिकारी (सामान्य) प्रशासन तथा निवडणूक नोडल अधिकारी, जालना यांनी प्रसिद्धी पत्रकाद्वारे कळविले आहे.

*******